10th Dec2020

ຮອງລັດຖະມົນຕີ ກະຊວງ ປກສ ເຂົ້າຮ່ວມກອງປະຊຸມຫຼຽນຢຸນກາງ ຄັ້ງທີ 5 ຜ່ານລະບົບວິດີໂອທາງໄກ

by somchan

ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມຫຼຽນຢຸນກາງ ຄັ້ງທີ 5, ທີ່ກະຊວງປ້ອງກັນຄວາມສະຫງົບ ສປ ຈີນ ເປັນເຈົ້າພາບຈັດຂຶ້ນໃນວັນທີ 9 ທັນວາ 2020 ນີ້ ໂດຍເປັນການເຂົ້າຮ່ວມກອງປະຊຸມຜ່ານລະບົບວິດີໂອທາງໄກ.

ສຳລັບການຈັດກອງປະຊຸມຫຼຽນຢຸນກາງ ຄັ້ງທີ 5 ນີ້ ໂດຍການເປັນປະທານຂອງທ່ານ ຕູ້ຫາງເຫວີຍ ຮອງລັດຖະມົນຕີ ກະຊວງປ້ອງກັນຄວາມສະຫງົບຈີນ ແລະ ມີຄະນະຜູ້ແທນຕຳຫຼວດຈາກບັນດາປະເທດຕ່າງໆ ເກືອບ 20 ປະເທດ ພ້ອມດ້ວຍອົງການຕຳຫຼວດສາກົນ ແລະ ຜູ້ປະກອບການທຸລະກິດຄວາມປອດໄພຈຳນວນໜຶ່ງເຂົ້າຮ່ວມ.

ກອງປະຊຸມຫຼຽນຢຸນກາງ ຄັ້ງທີ 5 ແລະ ບັນດາກອງປະຊຸມທີ່ກ່ຽວຂ້ອງໃນຄັ້ງນີ້ ໄດ້ດຳເນີນພາຍໃຕ້ຫົວຂໍ້ “ການຮັບມືກັບບັນຫາຄວາມປອດໄພ ແລະ ການຮ່ວມມືປະຕິບັດກົດໝາຍຂອງບັນດາປະເທດ ພາຍໃຕ້ສະພາບການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19” ໂດຍນຳໃຊ້ຮູບແບບກອງປະຊຸມວິດີໂອທາງໄກ.

ຈຸດປະສົງແມ່ນປຶກສາຫາລືເພື່ອຮັບມືກັບຮູບການ ແລະ ສິ່ງທ້າທາຍອັນໃຫມ່ ໃນໄລຍະການແຜ່ບາດຂອງພະຍາດໂຄວິດ-19 ທີ່ວຽກງານການຮ່ວມມືປະຕິບັດກົດໝາຍຂອງບັນດາປະເທດຕ່າງໆ ພວມປະເຊີນຢູ່ ທັງເປັນການຄົ້ນຄວ້າຂໍ້ລິເລີ່ມ ໃນການເພີ່ມທະວີການຮ່ວມມື ໄລຍະຫຼັງການແຜ່ລະບາດ ຂອງພະຍາດ ໂຄວິດ-19, ຊຸກຍູ້ໃຫ້ບັນດາປະເທດມີຄວາມສະຫງົບ ແລະ ພັດທະນາຢ່າງຍືນຍົງ; ນອກນັ້ນຍັງສຸມໃສ່ແກ້ໄຂການພະນັນຂ້າມຊາດ ການຕົວະຍົວະຫຼອກຫຼວງທາງໂທລະຄົມ ແລະ ການເຄື່ອນໄຫວອາດຊະຍາກຳຂ້າມຊາດອື້ນໆ ພ້ອມທັງສຶກສາຄົ້ນຄວ້າ ກົນໄກໃໝ່ຂອງການຮ່ວມມືສາກົນ ໃນການສະກັດກັ້ນຂອງອາຊະຍາກຳຂ້າມຊາດແບບໃໝ່.

ຈາກນັ້ນ ໃນວັນທີ 10 ທັນວາ 2020 ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ພ້ອມຄະນະຍັງໄດ້ ສືບຕໍ່ເຂົ້າຮ່ວມບັນດາກອງປະຊຸມຍ່ອຍ ປິ່ນອ້ອມກອງປະຊຸມຫຼຽນຢຸນກາງ ຄັ້ງທີ 5 ຕື່ມອີກ.

 

Off

Comments are closed.