23rd Dec2020

ກອງປະຊຸມໃຫ່ຍຜູ້ແທນຊາວໜຸ່ມທົ່ວປະເທດ ຈະຈັດຂື້ນວັນທີ 24-25 ທັນວາ 2020

by somchan

ສູນກາງຊາວໜຸ່ມປະຊາຊົນປະຕິວັດລາວ ໄດ້ຖະແຫຼ່ງຂ່າວກ່ຽວກັບການດຳເນີນກອງປະຊຸມໃຫ່ຍຜູ້ແທນຊາວໜຸ່ມທົ່ວປະເທດ ຄັ້ງທີ 8 ຂື້ນໃນວັນທີ 22 ທັນວາ ນີ້ ທີ່ສູນກາງຊາວໜຸ່ມປະຊາຊົນ ປະຕິວັດລາວ ເຊິ່ງກອງປະຊຸມໃນຄັ້ງນີ້ຈະຈັດຂື້ນໃນລະຫວ່າງວັນທີ 24 – 25 ທັນວາ 2020 ນີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ.

ທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໄດ້ຖະແຫຼງວ່າ ຕະຫຼອດໄລຍະການກະກຽມກອງປະຊຸມໃຫ່ຍໃນຄັ້ງນີ້ ຄະນະຊາວໜຸ່ມແຕ່ລະຂັ້ນ ໄດ້ພ້ອມກັນຈັດຕັ້ງປະຕິບັດ ຜັນຂະຫຍາຍມະຕິກອງປະຊຸມໃຫ່ຍຄັ້ງທີ 7 ຂອງຊາວໜຸ່ມ, ການປະຕິບັດຂໍ້ແຂ່ງຂັນ 4 ບຸກຕາມແຜນການ, ໂຄງການຈຸດສຸມໃນການພັດທະນາຊາວໜຸ່ມ ແລະ ເຍົາວະຊົນ ຕິດພັນກັບການຫັນລົງກໍ່ສ້າງຮາກຖານການເມືອງຕາມ 4 ເນື້ອໃນ, 4 ຄາດໝາຍ ຕິດພັນກັບວຽກງານສາມສ້າງທີ່ພັກວາງອອກ, ລວມທັງການປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ ເຮັດໃຫ້ວຽກງານຕ່າງໆໄດ້ຮັບຜົນສຳເລັດຢ່າງຈົບງາມ ທັງໝົດນີ້ ແມ່ນມູນເຊື້ອອັນດີງາມ ແລະ ຜົນງານອັນຍິ່ງໃຫ່ຍຂອງຄະນະຊາວໜຸ່ມ, ສະມາຊິກຊາວໜຸ່ມ-ເຍົາວະຊົນລາວບັນດາເຜົ່າທີ່ຍາດມາໄດ້ຕະຫຼອດໄລຍະຜ່ານມາ. ກອງປະຊຸມໃຫ່ຍຜູ້ແທນຊາວໜຸ່ມທົ່ວປະເທດຄັ້ງທີ 8 ນີ້ ແມ່ນມີຄວາມໝາຍສຳຄັນເປັນຢ່າງຍິ່ງຕໍ່ຂະບວນການລວມຂອງພັກຂອງຊາດ ໃນການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ 10 ຂອງພັກ ແລະ ມະຕິ 7 ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ແຜນພັດທະນາຊາວໜຸ່ມ-ເຍົາວະຊົນໃນຍຸກສະໄໝທີ່ກ້າວໜ້າທັນສະໄໝທາງດ້ານເຕັກໂນໂລຊີ ແລະ ທາງດ້ານອຸດສາຫະກຳ.

ສະນັ້ນກອງປະຊຸມໃຫ່ຍຄັ້ງນີ້ ຄະນະຊາວໜຸ່ມແຕ່ລະຂັ້ນໄດ້ພ້ອມກັນກະກຽມຫຼາຍຂະບວນການ, ຫຼາຍກິດຈະກຳ ແລະ ຫຼາຍອະນຸກຳມະການຮັບຜິດຊອບ ໄດ້ເອົາໃຈໃສ່ປະຕິບັດໜ້າທີ່ວຽກງານຂອງຕົນຢ່າງຫ້າວຫັນ ແລະ ຟົດຟື້ນ ມາຮອດປະຈຸບັນນີ້ ແມ່ນມີຄວາມພ້ອມແລ້ວໃນທຸກດ້ານແລ້ວ ທີ່ຈະໄຂກອງປະຊຸມໃຫ່ຍຜູ້ແທນຊາວໜຸ່ມທົ່ວປະເທດຄັ້ງທີ 8 ຂື້ນຢ່າງເປັນທາງການ.

Off

Comments are closed.