24th Dec2020

ແຈ້ງການ: ຫ້າມນຳເຂົ້າຊົ່ວຄາວ ອາຫານທະເລ ສົດ ແລະ ແຊ່ແຂງ ທຸກປະເພດ ຈາກລາຊະອານາຈັກໄທ.

by somchan

ກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການ ໃນວັນທີ 23 ທັນວາ 2020 ເລື່ອງ: ຫ້າມນຳເຂົ້າຊົ່ວຄາວ ອາຫານທະເລ ສົດ ແລະ ແຊ່ແຂງ ທຸກປະເພດ ຈາກລາຊະອານາຈັກໄທ.

ອີງໃສ່ການລະບາດຮອບໃຫມ່ຂອງພະຍາດໂຄວິດ-19 ຢູ່ໃນລາຊະອານາຈັກໄທ ທີ່ພົບເຫັນຢູ່ ເຂດຕະຫຼາດຈໍາຫນ່າຍອາຫານທະເລ ທີ່ມີຄວາມສຽງວ່າພະຍາດ ໂຄວິດ-19 ອາດເຈືອປົນກັບອາຫານທະເລສົດ ແລະ ແຊ່ແຂງ, ສະນັ້ນ ເພື່ອເປັນການສະກັດກັ້ນ, ຄວບຄຸມ ແລະ ຈໍາກັດ ການແຜ່ລະບາດຂອງພະຍາດໂຄວິດ-19. ດັ່ງນັ້ນ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ຈຶ່ງໄດ້ອອກແຈ້ງການ:

  1. ຫ້າມນໍາເຂົ້າຊົ່ວຄາວ ອາຫານທະເລ ສົດ ແລະ ແຊ່ແຂງ ທຸກປະເພດ ທີ່ນໍາເຂົ້າມາຈາກ ລາຊະອານາຈັກໄທ.
  2. ມາດຕະການຫ້າມນໍາເຂົ້ານີ້ເປັນມາດຕະການຊົ່ວຄາວ ແລະ ຈະມີຜົນສັກສິດນໍາໃຊ້ຈົນກວ່າ ເຈົ້າຫນ້າທີ່ ທີ່ກ່ຽວຂ້ອງຂອງ ສປປ ລາວ ແລະ ລາຊະອານະຈັກໄທ ຈະສາມາດປຶກສາຫາລືມາດຕະການໃນການກວດສອບ, ຄັດ ກອງ ແລະ ຢັ້ງຢືນຄວາມປອດໄພຂອງອາຫານທະເລທີ່ສົ່ງອອກມາຈາກ ລາຊະອານາຈັກໄທ ວ່າບໍ່ພົບການເຈືອຝົນຂອງ ເຊື້ອພະຍາດ ໂຄວິດ-19.
  3. ມອບໃຫ້ ກົມອາຫານ ແລະ ຢາ ເປັນເຈົ້າການ ສົມທົບກັບພາກສ່ວນກ່ຽວຂ້ອງ ຂອງ ສປປ ລາວ ແລະ ລາຊະອານາຈັກໄທ ເພື່ອຮີບຮ້ອນຊອກຫາມາດຕະການແກ້ໄຂ ຕາມທີ່ໄດ້ລະບຸໄວ້ໃນຂໍ້ 2 ຂ້າງເທິງ.
  4.  ແຈ້ງການສະບັບນີ້ ມີຜົນສັກສິດ ນັບແຕ່ມື້ລົງລາຍເຊັນເປັນຕົ້ນໄປ ຈົນກວ່າຈະມີແຈ້ງການສະບັບໃຫມ່ປ່ຽນ.

Off

Comments are closed.