28th Dec2020

ແຂວງວຽງຈັນຈັດພິທີອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ ປະຈຳປີ 2020

by somchan

ໃນວັນທີ 23 ທັນວາ 2020 ແຂວງວຽງຈັນໄດ້ຈັດພິທີ ປະກາດການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວ ຜູ້ທີ່ມີຄວາມກ້າວໜ້າຫ້າວຫັນ ຢູ່ທີ່ຄ້າຍຄຸມຂັງ-ດັດສ້າງ ປກສ ແຂວງວຽງຈັນ  ໂດຍການເປັນປະທານຂອງ ທ່ານ ທອງສະຫວັນ ວົງສຳພັນ ຮອງເລຂາພັກແຂວງ ປະທານແນວລາວສ້າງຊາດແຂວງ, ມີຄະນະກຳມະການອະໄພຍະໂທດຂັ້ນແຂວງ, ແຂກຖືກເຊີນຈາກພະແນກການອ້ອມຂ້າງ, ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ

ການປະກາດອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດຄັ້ງນີ້ແມ່ນປະຕິບັດຕາມລັດຖະດຳລັດຂອງປະທານປະເທດ ວ່າດ້ວຍການ ໃຫ້ອະໄພຍະໂທດ ແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດ

ທ່ານ ທອງໃບ ສຸທຳມະວົງ ຮອງປະທານສານປະຊາຊົນແຂວງ ທັງເປັນຄະນະກຳມະການອະໄພຍະໂທດຂັ້ນແຂວງ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານອະໄພຍະໂທດປະຈຳປີ 2020 ແລະ ແຜນການຈັດຕັ້ງປະຕິບັດວຽກງານອະໄພຍະໂທດປະຈຳປີ 2021 ຢູ່ຄ້າຍຄຸມຂັງ-ດັດສ້າງ ປກສ ແຂວງວຽງຈັນ ປະຈຸບັນມີນັກໂທດທັງໝົດ 818 ຄົນ, ຍິງ 105 ຄົນ, ຕ່າງປະເທດ 1 ຄົນ, ຍິງ 1 ຄົນ ໃນນີ້ນັກໂທດທີ່ໄດ້ຮັບການອະໄພຍະໂທດຕາມລັດຖະດຳລັດຂອງປະທານປະເທດປະຈຳປີ 2020 ມີທັງໝົດ 169 ຄົນ, ຍິງ 28 ຄົນ, ນັກໂທດທີ່ໄດ້ຮັບການ, ຫຼຸດຜ່ອນໂທດ ມີທັງໝົດ 132ຄົນ, ຍິງ 21 ຄົນ ແລະ ນັກໂທດທີ່ໄດ້ຮັບການປ່ອຍຕົວມີທັງໜົດ  37 ຄົນ ຍິງ 07 ຄົນ ນັກໂທດທີ່ໄດ້ຮັບການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວໃນຄັ້ງນີ້ ແມ່ນຜູ້ທີ່ມີຄວາມກ້າວໜ້າ, ໄດ້ຜ່ານການຝຶກຝົນຫຼໍ່ຫຼອມຕົນເອງ ປະຕິບັດກົດລະບຽບຂອງຄ້າຍຄຸມຂັງ-ດັດສ້າງໄດ້ດີ ແລະ ຮູ້ສຶກກີນແໜງແຄງໃຈ ຕໍ່ກັບການກະທຳຜິດ

ທ່ານ ທອງສະຫວັນ ວົງສຳພັນ ຮອງເລຂາພັກແຂວງ ປະທານແນວລາວສ້າງຊາດແຂວງ ເຊີ່ງໄດ້ຍົກໃຫ້ເຫັນຄວາມໜາຍຄວາມສຳຄັນໃນການຈັດຕັ້ງປະຕິບັດພິທີປະກາດການອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ ພ້ອມນັ້ນທ່ານຍັງໄດ້ຍ້ອງຍໍຊົມເຊີຍຕໍ່ນັກໂທດຕ້ອງຫາ ທີ່ມີຄວາມຮູ້ສຶກກິນແໜງແຄງໃຈ ຍອມຮັບປ່ຽນແປງຕໍ່ກັບການກະທຳຜິດ ມີຄວາມກ້າວໜ້າ ຫ້າວຫັນໃນການຝຶກຝົນຫຼໍ່ຫຼອມຕົນເອງ ພ້ອມທັງຮຽກຮ້ອງໃຫ້ນັກໂທດທີ່ໄດ້ຮັບການອະໄພຍະໂທດ ຫຼຸດຜ່ອນໂທດຄັ້ງນີ້ ຈົ່ງຕັ້ງໃຈຝຶກຝົນຫຼໍ່ຫຼອມຕົນເອງ ປະຕິບັດກົດລະບຽບຂອງຄ້າຍຄຸມຂັງ-ດັດສ້າງໃຫ້ດີ ຕໍ່ກັບຜູ້ທີ່ຖຶກປ່ອຍຕົວກັບຄືນສູ່ຄອບຄົວແລ້ວຕ້ອງ ເປັນພົນລະເມືອງດີ,ບໍ່ໄປເຄື່ອນໄຫວກະທຳຜິດຄືທີ່ຜ່ານມາ ແລະ ຊອກວຽກເຮັດງານທຳສ້າງເສດຖະກິດຄອບຄົວໃຫ້ຖຶກຕ້ອງຕາມກົດໜາຍ

Off

Comments are closed.