05th Jul2013

ລັດຖະມົນຕີຊ່ວຍວ່າການກະຊວງ ປກສ ເຄື່ອນໄຫວ ຊີ້ນຳວຽກງານ ປກສ ຢູ່ກອງບັນຊາການ ປກສ ນະຄອນ ຫຼວງວຽງຈັນ

by somchan

ທ່ານ ພົຈວ ກົງທອງ ພົງວິຈິດ ຄະນະປະຈຳພັກກະຊວງ ລັດຖະມົນຕີຊ່ວຍວ່າການກະຊວງປ້ອງກັນຄວາມສະຫງົບ ໄດ້ເຄື່ອນໄຫວພົບປະ ແລະ ຊີ້ນຳວຽກງານປ້ອງກັນຄວາມ ສະຫງົບຢູ່ກອງບັນຊາການ ປກສ ນະຄອນຫຼວງວຽງຈັນ ໃນວັນທີ 04 ກໍລະກົດນີ້, ໂດຍມີຄະນະກອງບັນຊາການ, ຫ້ອງ, ພະແນກ ແລະ ພະນັກງານ ຫຼັກແຫຼ່ງໃຫ້ການຕ້ອນຮັບ.

ໃນໂອກາດນີ້ ທ່ານ ພົຈວ ດຣ ບຸນຊູ ນາມມະຈັກ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ລາຍງານກ່ຽວກັບການຊີ້ນຳ-ນຳພາ ຈັດຕັ້ງປະຕິບັດວຽກງານປ້ອງກັນຄວາມສະຫງົບ, ຮັກສາຄວາມເປັນລະບຽບຮຽບຮ້ອຍໃນສັງຄົມ ໃນໄລຍະຜ່ານມາ,ເຊີ່ງກອງບັນຊາການ ປກສ ນະຄອນຫຼວງວຽງຈັນ ແມ່ນໄດ້ສຸມໃສ່ຈັດຕັ້ງປະຕິບັດ 6 ແຜນງານເຊັ່ນ: ແຜນງານສະກັດກັ້ນແກ້ໄຂຄະດີອາຊະຍາກຳ,ປຸ້ນຈີ້,ຊິງຊັບ,ລັກຊັບພົນລະເມືອງ,ແຜນງານສະກັດກັ້ນແກ້ໄຂຄວາມບໍ່ເປັນລະບຽບຮຽບຮ້ອຍໃນສັງຄົມ; ແຜນງານສະກັດກັ້ນແກ້ໄຂການຄ້າ-ຂາຍມົ້ວສຸມຢາເສບຕິດ;ແຜນງານປ້ອງກັນເວນຍາມ ລາດຕະເວນຕາມຈຸດສຳຄັນຕາມສາຍທາງ;ແຜນງານຄຸ້ມຄອງຄົນເຂົ້າ-ອອກເມືອງ,ຄຸ້ມຄອງຄົນຕ່າງປະເທດ,ຄຸ້ມຄອງນັກທ່ອງທ່ຽວ ແລະ ແຜນງານຫັນລົງກໍ່ສ້າງຮາກຖານ. ຜ່ານການຈັດຕັ້ງປະຕິບັດ ສາມາດຮັບປະກັນ ເຮັດໃຫ້ທົ່ວນະຄອນຫຼວງວຽງຈັນ ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ.

ພ້ອມກັນນີ້ ທ່ານ ພົຈວ ກົງທອງ ພົງວິຈິດ ຄະນະປະຈຳພັກກະຊວງ ລັດຖະມົນຕີຊ່ວຍວ່າການກະຊວງ ປກສ ຍັງໄດ້ໃຫ້ທິດຊີ້ນຳ ແລະ ເນັ້ນໜັກບາງບັນຫາທີ່ ຄະນະກອງບັນຊາການ ປກສ ນະຄອນຫຼວງວຽງຈັນ ຈະຕ້ອງສືບຕໍ່ເອົາໃຈໃສ່ຊີ້ນຳບັນດາເຫຼົ່າຮົບວິຊາສະເພາະ,ຈັດຕັ້ງປະຕິບັດໃນຕໍ່ໜ້າ ເປັນຕົ້ນແມ່ນ ວຽກງານສະກັດກັ້ນ,ແກ້ໄຂ,ເລີກຮື້,ກຸ່ມແກ້ງ ໜໍ່ແໜງເປົ້າໝາຍກໍ່ຄວາມບໍ່ສະຫງົບ ຄວາມບໍ່ເປັນລະບຽບຮຽບຮ້ອຍໃນສັງຄົມ ເຮັດໃຫ້ປະກົດການຫຍໍ້ທໍ້ຕ່າງໆຫຼຸດລົງຢ່າງຈະແຈ້ງ; ການຊີ້ນຳນຳພາຈັດຕັ້ງປະຕິບັດໜ້າທີ່ວຽກງານ ຕ້ອງມີແບບແຜນຢ່າງຄັກແນ່; ເປັນເຈົ້າການປະສານສົມທົບແໜ້ນກັບພາກສ່ວນທີ່ກ່ຽວຂ້ອງ ຮ່ວມກັນຈັດຕັ້ງປະຕິບັດວຽກງານໃຫ້ມີຜົນສຳເລັດ ແລະ ວຽກງານສຳຄັນອື່ນໆ. ທັງນີ້ກໍ່ເພື່ອຮັບປະກັນ ເຮັດໃຫ້ທົ່ວນະຄອນຫຼວງວຽງຈັນ ມີຄວາມສະຫງົບປອດໄພ,ເປັນລະບຽບຮຽບຮ້ອຍ ໜ້າຢູ່ໜ້າທ່ຽວຊົມ ແລະ ເພື່ອອຳນວຍຄວາມສະດວກໃຫ້ແກ່ການພັດທະນາສ້າງສາໃນຂົງເຂດວຽກງານອື່ນໆ.

Off

Comments are closed.