13th Jan2021

ສື່ມວນຊົນ ກຽມພ້ອມໃນການຮັບໃຊ້ ກອງປະຊຸມໃຫຍ່ ຄັ້ງທີ XI ຂອງພັກ

by somchan

ໃນວັນທີ 11 ມັງກອນ 2021 ນີ້ ບັນດາຂະແໜງສື່ມວນຊົນນັບທັງສື່ອີເລັກໂຕຣນິກ ແລະ ສື່ສິ່ງພິມ ໄດ້ພ້ອມກັນປຶກສາຫາລືເພື່ອກະກຽມຄວາມພ້ອມໃນການຮັບໃຊ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ທີ່ຈະຈັດຂຶ້ນຢ່າງເປັນທາງການ ໃນລະຫວ່າງ ວັນທີ 13-15 ມັງກອນ 2021 ທີ່ນະຄອນຫລວງວຽງຈັນ. ໂດຍການເປັນປະທານຂອງ ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.

ການປຶກສາຫາໃນຄັ້ງນີ້ເພື່ອແນໃສ່ເຮັດວຽກງານໂຄສະນາ ແລະ ເຜີຍແຜ່ຂໍ້ມູນຂ່າວສານສຳຄັນຕ່າງໆ ໃນການຮັບໃຊ້ກອງປະຊຸມໃຫຍ່ ຄັ້ງທີ XI ຂອງພັກ ໃຫ້ມີປະສິດທິພາບ, ມີປະສິດທິຜົນ, ມີຄວາມເປັນລະບຽບຮຽບຮ້ອຍ ແລະ ເຮັດລ້ອນໜ້າທີ່ຕາມຈຸດປະສົງ ແລະ ຄາດໝາຍທີ່ວາງໄວ້.

ມາຮອດປັດຈຸບັນສື່ມວນຊົນທຸກຂະແໜ່ງການແມ່ນມີຄວາມພ້ອມໃນທຸກດ້ານ ແລະ ໄດ້ແບ່ງ ຄວາມຮັບຜິດຊອບເປັນອັນລະອຽດ ເປັນຕົ້ນແມ່ນ: ສຳເລັດການແຕ່ງຕັ້ງຈຸບັນນາທິການປະຈຳສູນຂ່າວ,ຈຸເຄື່ອນໄຫວຖ່າຍພາບນິ້ງ, ພາບວິດີໂອ ແລະ ຖ່າຍທອດສົດປະຈຳຢູ່ໃນຫ້ອງປະຊຸມ ແລະ ຈຸອື່ນໆ ເພື່ອອຳນວຍຄວາມສະດວກໃນການປະຕິບັດໜ້າທີ່ຢູ່ສູນຂ່າວ, ການປະສານງານທາງດ້ານເອກະສານຕ່າງໆ ແລະ ຕິດຕາມ, ກວດກາ, ຄຸ້ມຄອງ ຄວາມເປັນລະບຽບຮຽບຮ້ອຍຂອງນັກຂ່າວ, ສື່ມວນຊົນ ພາຍໃນ ແລະ ຕ່າງປະເທດ ທີ່ເຄື່ອນໄຫວຢູ່ກອງປະຊຸມ.

ພ້ອມກັນນັ້ນກໍໄດ້ມີການປຶກສາຫາລືເພື່ອເຮັດໃຫ້ວຽກງານໂຄສະນານັບທັງຢູ່ພາຍໃນກອງປະຊຸມ ແລະ ວຽກງານອື່ນໆທີ່ກ່ຽວຂ້ອງໃຫ້ມີຫລາຍຮູບຫລາຍສີ, ຫລາກຫລາຍສີສັນ, ລວມທັງການສະແດງຄວາມຄິດເຫັນ ແລະ ຄວາມຮູ້ສຶກຂອງປະຊາຊົນ, ພໍ່ຄ້າຊາວຂາຍ, ທະຫານ, ຕຳຫລວດ ແລະ ອື່ນໆ ທີ່ມີຕໍ່ກອງປະຊຸມ. ຄຽງຄູ່ກັນນັ້ນ ກໍໄດ້ມີການເຜີຍແຜ່ ລະບຽບການຕ່າງໆ ສຳລັບສື່ມວນຊົນທີຈະເຂົ້າໄປເຄື່ອນໄຫວເກັບກຳຂ່າວຕະຫລອດໄລຍະດຳເນີນກອງປະຊຸມ, ພ້ອມທັງໄດ້ເນັ້ນໃຫ້ເອົາໃຈໃສ່ຕໍ່ມາດຕະການປ້ອງກັນ ແລະ ຄວບຄຸມການລະບາດຂອງພະຍາດ ໂຄວິດ-19 ຢ່າງເຂັ້ມງວດ.

Off

Comments are closed.