13th Jan2021

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນ ປະຕິວັດລາວ ໄຂຂື້ນຢ່າງເປັນທາງການ.

by somchan

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວ ໄດ້ໄຂຂື້ນຢ່າງສະຫງ່າຜ່າເຜີຍ ໃນວັນທີ 13 ມັງກອນ 2011 ທີ່ນະຄອນຫຼວງວຽງງຈັນ ທາມກາງບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວ ປວງຊົນລາວທັງຊາດພວມອອກແຮງແຂ່ງຂັນຈັດຕັ້ງປະຕິບັດແນວທາງນະໂຍບາຍຂອງ ພັກຢ່າງເປັນຂະບວນຟົດຟື້ນ.

ກອງປະຊຸມຄັ້ງນີ້ແມ່ນພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ມີກໍາມະການ ກົມການເມືອງ, ຄະນະເລຂາທິການ, ກໍາມະການສູນກາງພັກ, ນັກປະຕິວັດອາວຸໂສ , ວິລະຊົນແຫ່ງຊາດ ພ້ອມດ້ວຍບັນດາຜູ້ແທນສົມບູນຈໍານວນ 768 ສະຫາຍ, ຍິງ 116 ສະຫາຍ ທີ່ໄດ້ຖືກຄັດເລືອກໃຫ້ຕາງຫນ້າອົງຄະນະພັກຂະ ແຫນງການ, ອົງການ ແລະ ທ້ອງຖິ່ນ ໃນຂອບເຂດທົ່ວປະເທດ ແລະ ແຂກຖືກເຊີນຈໍານວນ 147 ສະຫາຍ ທີ່ຕາງຫນ້າໃຫ້ແກ່ພາກສ່ວນຕ່າງໆທັງພາກລັດ ແລະ ເອກະຊົນ ກໍ່ຄືປະຊາຊົນລາວ ບັນດາເຜົ່າ ເຂົ້າຮ່ວມ.

ໃນໂອກາດ ມີຄວາມຫມາຍ ຄວາມສໍາຄັນ ນີ້ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ໄດ້ກ່າວສູນ ທອນພົດໄຂກອງປະຊຸມຢ່າງເປັນທາງການໂດຍສະຫາຍໄດ້ກ່າວວ່າ: ກອງປະຊຸມໃຫຍ່ຜູ້ ແທນທົ່ວປະ ເທດຄັ້ງທີ 11 ຂອງພັກປະຊາຊົນປະຕິວັດລາວໄຂຂື້ນ ໃນທາມກາງ ບັນຍາກາດອັນເບີກບານມ່ວນຊື່ນທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດຫາກໍ່ສໍາເລັດການຈັດຕັ້ງສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊົນລາວ ຄົບຮອບ 45 ປີ ແລະ ວັນເກີດຂອງ ປະທານໄກສອນ ພົມວິຫານ ຜູ້ນໍາທີ່ ແສນເຄົາລົບຮັກຂອງປວງຊົນລາວບັນດາເຜົ່າ ຄົບຮອບ 100 ປີ ເຊິ່ງໄດ້ສະຫຼຸບຕີລາຄາຜົນງານ ແລະ ໄຊຊະນະອັນໃຫຍ່ຫຼວງໃນ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດໄລຍະຜ່ານມາ.

ສະຫາຍ ຍັງໄດ້ກ່າວຕື່ມອີກວ່າກອງປະຊຸມໃຫຍ່ໃນຄັ້ງນີ້ຈະໄດ້ພ້ອມກັນສັງເກດຕີ ລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກ ຕິດພັນກັບການປະ ເມີນຢ່າງກວມລວມການສ້າງບັນດາປະຖົມປັດໄຈໃຫ້ແກ່ການກ້າວຂື້ນສູ່ສັງຄົມນິຍົມໃນ ໄລຍະທີ່ຜ່ານມາ, ຖອດຖອນບົດຮຽນອັນເປັນປະ ໂຫຍດ ແລະ ຕົກລົງ ແນວທາງ, ທິດທາງ, ຫນ້າທີ່ລວມ, ແຜນນະໂຍບາຍໃຫຍ່ ແລະ ວາງທິດຊີ້ນໍາຕໍ່ແຜນພັດທະນາ ເສດຖະກິດ-ສັງຄົມຂອງຊາດ ໃນຕໍ່ຫນ້າ ເພື່ອສືບຕໍ່ບູລະນະລະບອບປະຊາທິປະໄຕ ປະຊາຊົນ, ສ້າງບັນດາປະຖົມປັດໄຈໃຫ້ແກ່ການກ້າວເດີນສູ່ຈຸດຫມາຍສັງຄົມນິຍົມ. ພ້ອມນີ້, ກອງປະຊຸມຈະໄດ້ພິຈາລະນາ ແລະ ຮັບຮອງເອົາຮ່າງກົດລະບຽບສະບັບປັບປຸງ ແນໃສ່ສ້າງພັກປະຊາຊົນປະຕິວັດລາວໃຫ້ນັບມື້ເຕີບໃຫຍ່ ປອດໃສ ເຂັ້ມແຂງ ແລະ ຫນັກແຫນ້ນ ກ້າວຂື້ນເຮັດຫຼ້ອນພາລະກໍາປະຫວັດສາດອັນມີກຽດສະຫງ່າຂອງຕົນໃນໄລຍະໃໝ່ ແລະ ຈະໄດ້ສໍາຫຼວດຕີລາການນໍາພາຂອງຄະນະບໍລິຫານງານສູນກາງພັກສະໄຫມທີ 10 ແລະ ດໍາເນີນການເລືອກຕັ້ງຄະນະບໍລິຫານງານສູນກາງພັກສະໄຫມທີ 11 ເພື່ອແບກຫາບພາລະກິດທີ່ພັກ ແລະ ປະເທດຊາດມອບຫມາຍໃຫ້.

ກອງປະຊຸມໃຫ່ຍຜູ້ແທນທົ່ວປະເທດໃນຄັ້ງນີ້ ຈະດຳເນີນເປັນເວລາ 3 ວັນ ຄືແຕ່ວັນທີ 13-15 ມັງກອນ 2021.

 

Off

Comments are closed.