16th Jan2021

ຊົມເຊີຍຜົນສຳເລັດຂອງກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ

by somchan

ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນປະຕິວັດລາວ ​ແມ່ນດຳເນີນເປັນເວລາ 3 ວັນ, ​ເຊິ່ງ​ໄດ້​ໄຂ​ຂື້ນ​ຢ່າງ​ເປັນ​ທາງ​ການ​ໃນ​ວັນ​ທີ 13 ​ແລະ ປິດ​ລົງຢ່າງສະຫງ່າງາມ​ໃນ​ວັນ​ທີ 15 ມັງກອນ 2021, ທີ່ນະຄອນຫຼວງວຽງຈັນພາຍໃຕ້ຄຳຂວັນ “ຍົກສູງຄວາມສາມາດນໍາພາຂອງພັກ, ເພີ່ມທະວີຄວາມສາມັກຄີເປັນປຶກແຜ່ນຂອງປະຊາຊົນໃນຊາດ,  ຮັບປະກັນສະຖຽນລະພາບດ້ານການເມືອງຢ່າງໜັກແໜ້ນ,  ຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ,  ສ້າງການຫັນປ່ຽນການພັດທະນາເສດຖະກິດ-ສັງຄົມໄປສູ່ຄຸນນະພາບໃໝ່ ຢ່າງແຂງແຮງ, ຍົກລະດັບຄຸນນະພາບຊີວິດຂອງປະຊາຊົນໃຫ້ສູງຂຶ້ນ,  ສືບຕໍ່ນໍາປະເທດຊາດພົ້ນຈາກສະຖານະພາບດ້ອຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມ”. ກອງປະຊຸມຄັ້ງນີ້ແມ່ນພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກສະໄໝທີ 10. ໂດຍມີຜູ້ແທນສົມບູນເຂົ້້າຮ່ວມທັງໝົດ 768 ສະຫາຍ, ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວປະເທດ 348.686 ສະຫາຍ, ພ້ອມທັງ ມີແຂກຖືກເຊີນເຂົ້າຮ່ວມຈໍານວນ 147 ສະຫາຍ.

ກອງປະຊຸມດຳ​ເນີນ​ໄປ​ດ້ວຍ​ບັນຍາກາດ​ແຫ່ງ​ຄວາມ​ປິ​ຕິ​ຊົມ​ຊືນ​ຂອງທົ່ວ​ພັກ, ທົ່ວ​ລັດ, ທົ່ວ​ກຳລັງ​ປະກອບ​ອາວຸດ ​ແລະ ຂອງ​ປວງ​ຊົນ​ລາວ​ບັນດາ​ເຜົ່າທັງຊາດ, ​ເຕັມ​ໄປ​ດ້ວຍ​ຄວາມ​ໝາຍ​ຄວາມ​ສຳຄັນ​ແຫ່ງ​ການຈັດຕັ້ງປະຕິບັດ​ແນວ​ທາງ​ນະ​ໂຍບາຍ​ຂອງ​ພັກ​ເຂົ້າ​ສູ່​ລວງ​ເລິກ, ປະ​ເທດ​ຊາດ​ມີ​ຄວາມ​ໝັ້ນຄົງ, ຮັບປະກັນ​ສະຖຽນ​ລະ​ພາບ​ທາງ​ດ້ານ​ການ​ເມືອງ, ສັງຄົມ​ມີ​ຄວາມ​ສະຫງົບ, ​ເປັນ​ລະບຽບ​ຮຽບຮ້ອຍ, ປະຊາຊົນ​ມີ​ຊີວິດ​ການ​ເປັນ​ຢູ່​ທີ່​ດີ​ຂື້ນ ແລະ ພາຍໃຕ້ບັນຍາກາດແຫ່ງຄວາມສາມັກຄີ, ຄວາມເປັນເອກະພາບ, ຄວາມຮັບຜິດຊອບການເມືອງສູງ, ຄ່ຽງຄູ່ກັບຄວາມສົນໃຈ ແລະ ການຕິດຕາມ ຢ່າງໃກ້ຊິດ ຂອງທົ່ວສັງຄົມ. ກອງປະຊຸມໃຫຍ່ ໄດ້ພ້ອມກັນຄົ້ນຄວ້າ, ຕົກລົງບັນຫາສໍາຄັນຂອງພັກ-ຂອງຊາດ ດ້ວຍຄວາມເອກະພາບສູງ ແລະ ໄດ້ສິ້ນສຸດລົງດ້ວຍຜົນສໍາເລັດອັນຈົບງາມ. ກອງປະຊຸມໃຫຍ່ຄັ້ງນີ້ ໄດ້ຄົ້ນຄວ້າຮັບຮອງເອົາຢ່າງເປັນເອກະສັນຕໍ່ລາຍງານການເມືອງຂອງຄະນະບໍລິຫານງານສູນກາງພັກ ສະໄໝທີ X ເຊິ່ງໄດ້ຕີລາຄາໝາກຜົນແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ໃນ 5 ປີຜ່ານມາ ໄດ້ຮັບຜົນສໍາເລັດ ອັນສໍາຄັນໃຫຍ່ຫລວງ ແລະ ຜົນງານອັນພົ້ນເດັ່ນຮອບດ້ານທີ່ຍາດມາໄດ້, ເຊິ່ງໄດ້ສ້າງໜໍ່ແໜງສໍາຄັນໃນທຸກຂົງເຂດ ເພື່ອເປັນປັດໄຈຍູ້ການຫັນປ່ຽນໃຫ້ແຂງແຮງ ເລິກເຊິ່ງ ແລະ ຮອບດ້ານ ໃນຊຸມປີຕໍ່ໜ້າ, ສືບຕໍ່ນໍາພາປະເທດຊາດ ກ້າວເດີນຕາມເສັ້ນທາງຈຸດໝາຍສັງຄົມນິຍົມ, ພ້ອມໆກັບຜົນສໍາເລັດອັັນສໍາຄັນດັ່ງກ່າວ ກອງປະຊຸມໃຫຍ່ ຍັງໄດ້ເປັນເອກະພາບຢ່າງພາວະວິໄສ ດ້ານຂໍ້ຄົງຄ້າງ, ຂໍ້ຂາດຕົກບົກຜ່ອງ ໃນການນໍາພາຊີ້ນໍາຂອງພັກ ກໍຄືການຈັດຕັ້ງປະຕິບັດໜ້າທີ່, ວຽກງານຈຸດສຸມໃນບາງດ້ານ ທີ່ບໍ່ສາມາດບັນລຸຜົນຕາມຄາດໝາຍທີ່ວາງອອກ, ພ້ອມທັງ ຊີ້ໃຫ້ເຫັນສາເຫດຕົ້ນຕໍ ເພື່ອກໍານົດທິດທາງມາດຕະການແກ້ໄຂທີ່ສອດຄ່ອງ ແລະ ແທດເໝາະ ເພື່ອຮັບປະກັນໃຫ້ແກ່ການຫັນປ່ຽນໃໝ່ ຢ່າງຈິງຈັງ ໃນການຈັດຕັ້ງປະຕິບັດແນວທາງຂອງພັກໃນຕໍ່ໜ້າ. ພ້ອມນັ້ນ ກອງປະຊຸມ ຍັງໄດ້ປະເມີນຜົນກວມລວມບັນດາຜົນສໍາເລັດ ແລະ ບາງດ້ານທີ່ຕ້ອງໄດ້ສືບຕໍ່ເອົາໃຈໃສ່ແກ້ໄຂ ແລະ ຍົກລະດັບກ່ຽວກັບການສ້າງບັນດາປະຖົມປັດໄຈ ໃຫ້ແກ່ການກ້າວເດີນສູ່ສັງຄົມນິຍົມ ຕາມແນວທາງປ່ຽນແປງໃໝ່ຮອບດ້ານ ແລະ ມີຫລັກການຂອງພັກເຮົາ ເຊິ່ງຊີ້ບອກເຖິງສະພາວະຄວາມເປັນຈິງທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດ ທີ່ພັກເຮົາຕ້ອງກໍາແໜ້ນ ແລະ ພິຈາລະນາຢ່າງເປັນລະບົບ ເພື່ອເປັນພື້ນຖານໃນການກໍານົດທິດທາງ ໃນການສືບຕໍ່ບູລະນະລະບອບປະຊາທິປະໄຕປະຊາຊົນ ໃຫ້ສົມບູນຍິ່ງຂຶ້ນໃນຕໍ່ໜ້າ.

ຢືນບົນຈິດໃຈສ້າງການຫັນປ່ຽນໃໝ່, ກອງປະຊຸມໃຫຍ່ ໄດ້ຮັບຮອງເອົາການເພີ່ມເຕີມບົດຮຽນ 4 ປະການ ທີ່ຖອດຖອນໄດ້ຈາກພຶດຕິກໍາແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ກໍຄືພຶດຕິກໍາຕົວຈິງໃນການນໍາພາຂອງພັກເຮົາ ໃນຫຼາຍສິບປີຜ່ານມາ ເພື່ອບົດຮຽນ ແລະ ເປັນບ່ອນອີງສໍາຄັນໃນການປັບປຸງການນໍາພາຊີ້ນໍາ ແລະ ການຈັດຕັ້ງປະຕິບັດແນວທາງນະໂຍບາຍຂອງພັກໃນຕໍ່ໜ້າ

ເພື່ອສືບຕໍ່ນໍາພາພາລະກິດປ່ຽນແປງໃໝ່ໄປສູ່ຈຸດໝາຍຢ່າງມີໄຊ ໃນຊຸມປີຕໍ່ໜ້າ, ກອງປະຊຸມໃຫຍ່ໄດ້ຍຶດໝັ້ນ ແລະ ເອກະພາບກັນ ສືບຕໍ່ບູລະນະປະຊາທິປະໄຕປະຊາຊົນ ໃຫ້ສົມບູນຍິ່ງຂຶ້ນ, ສ້າງການຫັນປ່ຽນແຂງແຮງ ເລິກເຊິ່ງ ແລະ ຮອບດ້ານ ເພື່ອກ້າວເດີນສູ່ສັງຄົມນິຍົມ ໂດຍຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບ ເປັນໜ້າທີ່ພື້ນຖານ, ການພັດທະນາ ແລະ ການແກ້ໄຂບັນຫາເສດຖະກິດ ເປັນໜ້າທີ່ໃຈກາງ, ການພັດທະນາຊັບພະຍາກອນມະນຸດ ແລະ ສະໜອງແຮງງານສີມື ແກ່ບັນດາໂຄງການພັດທະນາ  ເປັນໜ້າທີ່ແຖວໜ້າ, ການປັບປຸງຄຸນນະພາບຂອງວຽກງານພັກ-ພະນັກງານ ເປັນອັນຕັດສິນແນໃສ່ເຮັດໃຫ້ບັນດາປະຖົມປັດໄຈການກ້າວຂຶ້ນເດີນສູ່ສັງຄົມນິຍົມທີ່ມີໃນປະຈຸບັນ ໄດ້ຮັບການປັບປຸງຍົກລະດັບຢ່າງຕໍ່ເນື່ອງ ແລະ ສາມາດກາຍເປັນອົງປະກອບສໍາຄັນພື້ນຖານໃຫ້ແກ່ການກໍ່ຕົວ ແລະ ຂະຫຍາຍຕົວຂອງຮູບຖານເສດຖະກິດ-ສັງຄົມສັງຄົມນິຍົມໄລຍະຕົ້ນ, ເຮັດໃຫ້ບັນດາຄຸນລັກສະນະອັນດີເລີດ ຂອງລະບອບສັງຄົມນິຍົມຢູ່ປະເທດເຮົາ ສະແດງອອກນັບມື້ພົ້ນເດັ່ນຂຶ້ນເລື້ອຍໆໃນຊີວິດຕົວຈິງ ຂອງປະຊາຊົນ, ບົນພື້ນຖານດັ່ງກ່າວ ກອງປະຊຸມໃຫຍ່ ໄດ້ກຳນົດທັດສະນະ ແລະ ຮັບຮອງເອົາ 8 ແຜນນະໂຍບາຍໃຫຍ່ເພື່ອສູ້ຊົນຜັນຂະຫຍາຍ ແລະ ຈັດຕັ້ງປະຕິບັດ ສໍາລັບ 5 ປີໃນຕໍ່ໜ້າ, ໄດ້ມອບໃຫ້ຄະນະບໍລິຫານງານສູນກາງພັກ ສະໄໝທີ XI  ຊີ້ນໍາຈັດຕັ້ງການຄົ້ນຄວ້າ, ເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ ຄັ້ງນີ້ຢ່າງເປັນລະບົບ, ເລິກເຊິ່ງໂດຍສະເພາະແມ່ນສະມາຊິກພັກ, ພະນັກງານ ຜູ້ທີ່ເປັນຫຼັກແຫຼ່ງຢູ່ທຸກຂັ້ນ ເອົາໃຈໃສ່ຄົ້ນຄວ້າກໍາ ແໜ້ນເນື້ອໃນ ຂອງລາຍງານການເມືອງ, ສຸມສະຕິປັນຍາ, ກໍາລັງວັງຊາ ເປັນແບບຢ່າງນໍາໜ້າຈັດຕັ້ງປະຕິບັດໃຫ້ເກີດໝາກຜົນ; ຊີ້ນໍາອົງການລັດໃຫ້ຫັນເປັນນິຕິກໍາ, ເປັນແຜນງານ ແລະ ໂຄງການວຽກງານລະອຽດໃຫ້ໄວ ເພື່ອຍາດແຍ່ງເວລາຈັດຕັ້ງປະຕິບັດ ໂດຍໄວ ແລະ ໄດ້ຮັບຜົນສໍາເລັດ ອັນສະຫງ່າງາມ.

ກອງປະຊຸມໃຫຍ່ໄດ້ສະແດງຄວາມຍ້ອງຍໍຊົມເຊີຍລັດຖະບານ ຊຸດທີ VIII ທີ່ໄດ້ຕັ້ງໜ້າປະຕິບັດ ແລະ ສູ້ຊົນໃຫ້ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ໄດ້ຮັບຜົນສໍາເລັດ ເປັນຢ່າງດີ; ພ້ອມນັ້ນ ກໍສະແດງຄວາມເຫັນດີເຫັນພ້ອມ ແລະ ສະໜັບສະໜູນແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 9 (2021-2025) ເຊິ່ງແມ່ນແຜນຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ເປັນແຜນງານ, ໂຄງການລະດັບຊາດ, ລວມທັງຂອບການລົງທຶນສໍາລັບໂຄງການເຫຼົ່ານັ້ນ, ໃນນັ້ນໄດ້ກຳນົດອອກເປັນ 6 ເປົ້າໝາຍໃຫຍ່ ເພື່ອສືບຕໍ່ປະຕິບັດແຜນພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຢ່າງຕໍ່ເນື່ອງ ຄື: ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະຍືນຍົງ ໂດຍຍູ້ການເຕີບໂຕເສດຖະກິດແຫ່ງຊາດໃຫ້ບັນລຸ 4% ຂຶ້ນໄປ; ພັດທະນາຊັບພະຍາກອນມະນຸດ ມີຄຸນນະພາບສູງຂຶ້ນ ທີ່ສາມາດຕອບສະໜອງຄວາມຕ້ອງການຂອງການພັດທະນາ, ມີຄວາມສາມາດຄົ້ນຄວ້າ ແລະ ນໍາໃຊ້ວິທະຍາສາດ-ເຕັກໂນໂລຊີ ເພື່ອຍົກສູງປະສິດທິພາບ ແລະສ້າງມູນຄ່າເພີ່ມການຜະລິດ ແລະ ການບໍລິການ; ຍົກລະດັບຊີວິດການທາງດ້ານວັດຖຸ ແລະຈິດໃຈຂອງປະຊາຊົນໃຫ້ດີຂຶ້ນເທື່ອລະກ້າວ; ການປົກປັກຮັກສາສິ່ງແວດລ້ອມໃຫ້ມີຄວາມສົມດຸນ ແລະຫຼຸດຜ່ອນຄວາມສ່ຽງຈາກໄພພິບັດທໍາມະຊາດ; ສ້າງພື້ນ ຖານໂຄງລ່າງທີ່ມີຄວາມເຂັ້ມແຂງ, ນໍາໃຊ້ທ່າແຮງ, ກາລະໂອກາດຈາກທີ່ຕັ້ງພູມສາດຂອງປະເທດ, ເຂົ້າຮ່ວມຂະບວນການຮ່ວມມື ແລະການເຊື່ອມໂຍງກັບພາກພື້ນ ແລະສາກົນ ຢ່າງເປັນເຈົ້າການ; ຄຸ້ມຄອງ-ບໍລິຫານລັດ ໃຫ້ມີປະສິດທິພາບ, ສັງຄົມມີຄວາມສະເໝີພາບ, ຍຸຕິທໍາ ແລະໄດ້ຮັບການປົກປ້ອງ ຕາມທິດການປົກຄອງດ້ວຍກົດໝາຍ ທີ່ສັກສິດ ແລະເຂັ້ມງວດ. ໂດຍມອບໃຫ້ຄະນະບໍລິຫານງານສູນກາງພັກ ຊີ້ນໍາລັດຖະບານ ສຸມຄວາມພະຍາຍາມ ກໍຄືເສີມຂະຫຍາຍຄວາມອາດສາມາດບົ່ມຊ້ອນ ແລະກຳລັງແຮງສັງລວມ ເຂົ້າໃສ່ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ໃຫ້ເປັນຈິງ.  ກອງປະຊຸມໃຫຍ່ເລັ່ງທວງໃຫ້ຄະນະບໍລິຫານງານສູນກາງພັກສະໄໝທີ XI ອອກແຮງເສີມຂະຫຍາຍຈຸດດີໃນດ້ານຕ່າງໆ ຢ່າງແຂງແຮງ, ພ້ອມທັງວາງມາດຕະການກໍາຈັດ, ແກ້ໄຂຈຸດບົກຜ່ອງ ແລະຄົງຄ້າງທີ່ຜ່ານມາ ຢ່າງຈິງຈັງ, ຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າ ຂອງຄະນະນໍາຂອງສູນກາງພັກ ໃຫ້ສູງຂຶ້ນ, ເປັນຫຼັກແຫຼ່ງນໍາໜ້າສ້າງການຫັນ ປ່ຽນທີ່ແຂງແຮງ, ເລິກເຊິ່ງ ແລະຮອບດ້ານ ໃນຊຸມປີຕໍ່ໆໄປ, ນອກນີ້ກອງປະຊຸມຍັງໄດ້ມີຜົນສຳເລັດໃນການຮັບຮອງເອົາກົດລະບຽບຂອງພັກ ສະໄໝທີ XI, ເພື່ອໃຫ້ສອດຄ່ອງຮອງຮັບການຈັດຕັ້ງປະຕິບັດແນວທາງການເມືອງຂອງພັກ, ຊຸກຍູ້ວຽກງານກໍ່ສ້າງພັກ ເຮັດໃຫ້ພັກເຮົາ ມີຄວາມປອດໃສ, ເຂັ້ມແຂງ, ໜັກແໜ້ນ, ມີຄວາມສາມາດພຽງພໍໃນການນໍາພາ ພາລະກິດປົກປັກຮັກສາ ແລະພັດທະນາປະເທດຊາດ ໃນໄລຍະໃໝ່ ກ້າວຂຶ້ນຕາມທິດສັງຄົມນິຍົມ ແລະ ທີສຳຄັນກອງປະຊຸມໃຫຍ່ໄດ້ເລືອກຕັ້ງຄະນະບໍລິຫານງານສູນກາງພັກ ສະໄໝທີ XI  ເຊິ່ງປະກອບດ້ວຍກຳມະການສົມບູນ 71 ສະຫາຍ ແລະ ກຳມະການສໍາຮອງ 10 ສະຫາຍ ເພື່ອເປັນແກ່ນສານນໍາພາທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ມີຜົນສໍາເລັດ, ສ້າງບາດກ້າວບຸກທະລຸ ໃນການສ້າງການຫັນປ່ຽນ  ທີ່ແຂງແຮງໃນການພັດທະນາ ແລະ ພາປະເທດຊາດກ້າວຂຶ້ນ ຢ່າງໜັກແໜ້ນຕໍ່ໄປ.

ຕໍ່ໝາກຜົນຄວາມສຳເລັດໃນການດຳເນີກອງປະຊຸມໃຫຍ່ດັ່ງກ່າວມານັ້ນແມ່ນໝາກຜົນລວມຍອດຂອງການປະກອບສ່ວນອັນສຳຄັນຂອງບັນດາສະມາຊິກພັກ, ພະນັກງານ, ທະຫານ, ຕໍາຫລວດ, ຜູ້ປະກອບການຜະລິດ-ທຸລະກິດ-ບໍລິການ ແລະປະຊາຊົນລາວ ບັນດາເຜົ່າ, ບັນດາຊັ້ນຄົນ ໃນຂອບເຂດທົ່ວປະເທດ ແລະພີ່ນ້ອງເຊື້ອຊາດລາວຜູ້ຮັກຊາດ ທີ່ດຳລົງຊີວິດ ແລະທໍາມາຫາກິນ ຢູ່ຕ່າງປະເທດ ກໍຄືຊາວຕ່າງປະເທດ ທີ່ອາໄສຢູ່ ສປປ ລາວ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນພາ ລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ອັນເປັນການສ້າງພື້ນຖານ ແລະຖ່ວງທ່າໃໝ່ ໃຫ້ແກ່ການນໍາເອົາປະເທດເຮົາ ສືບຕໍ່ກ້າວຂຶ້ນສູ່ຈຸດໝາຍທີ່ວາງໄວ້.

ເຖີ່ງວ່າກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກຈະອັດລົງດ້ວຍຜົນສຳເລັດຢ່າງຈົບງາມແຕ່ກໍ່ເປັນພຽງບາດກ້າວທຳອິດເທົ່ານັ້ນ. ເພາະບັນດາໜ້າວຽກ ແລະ ພາລະກິດອັນຫຍິ່ງໃຫຍ່ຂອງຊາດຍັງລໍຖ້າຢູ່ເບື້ອງໜ້າ ດັ່ງນັ້ນ,  ມັນຈຶ່ງມີຄວາມຈຳເປັນທີຈະຕ້ອງໄດ້ຮຽກຮ້ອງມາຍັງຄະນະພັກທຸກຂັ້ນ, ສະມາຊິກພັກທຸກສະຫາຍ ຈົ່ງເຊີດຊູຄວາມເປັນແບບຢ່າງນໍາໜ້າໃນທຸກດ້ານ ນໍາພາມະຫາຊົນ ປະຕິບັດມະຕິຂອງກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ. ພ້ອມກັນນີ້ ກໍຮຽກຮ້ອງມາຍັງພະນັກງານ, ນັກຮົບ, ປະຊາຊົນລາວບັນດາເຜົ່າ, ບັນດາຊັ້ນຄົນ ແລະ ພີ່ນ້ອງເຊື້ອຊາດລາວຜູ້ຮັກຊາດທີ່ດໍາລົງຊີວິດ ແລະ ທໍາມາຫາກິນຢູ່ຕ່າງປະເທດ ຈົ່ງເຊີດຊູນໍ້າໃຈຮັກຊາດ, ເສີມຂະຫຍາຍມານະຈິດບາກບັ່ນບຸກບືນເຂົ້້າໃສ່ການປະຕິບັດໜ້າທີ່, ທໍາມາຫາກິນ ແລະ ສ້າງສາ, ບູລະ ນະລະບອບປະຊາທິປະໄຕປະຊາຊົນ ກ້າວເດີນສູ່ຈຸດ ໝາຍສັງຄົມນິຍົມຢ່າງໜັກແໜ້ນ.

ຊົມເຊີຍຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ  XI ຂອງພັກປະຊາຊົນປະຕິວັດລາວຢ່າງສຸດໃຈ!

Off

Comments are closed.