10th Feb2021

ຫົວໜ້າກອງບັນຊາການ ປກສ ແຂວງສະຫວັນນະເຂດ ເນັ້ນໃຫ້ກຳລັງປກຊ-ປກສ ຈົ່ງເພີ່ມທະວີຄວາມເຂັ້ມງວດໃນການຄຸ້ມຄອງນຳໃຊ້ເຮືອປະເພດຕ່າງໆຕາມແມ່ນ້ຳຂອງ

by somchan

ໃນທ້າຍອາທິດຜ່ານມານີ້ ພັອ ສົມໝາຍ ພົມມະຈັນ ຫົວໜ້າກອງບັນຊາການ ປກສ ແຂວງສະຫວັນນະເຂດ ພ້ອມດ້ວຍ ປກສ ນະຄອນໄກສອນພົມວິຫານ, ປກສ ກຸ້ມບ້ານ ແລະ ທະຫານຊາຍແດນທີ່ປະຈຳຢູ່ເຂດ ທ່າວຽງສະຫວັນ ໄດ້ອອກກວດກາຕາມແມ່ນ້ຳຂອງເລີ່ມແຕ່ເຂດ ທ່າວຽງສະຫວັນ ຫາ ທ່າອຸດົມ ແລະ ທ່າດອນເຊັງ ນະຄອນໄກສອນພົມວິຫານ, ເພື່ອຕິດຕາມກວດກາສະພາບການປ້ອງກັນຄວມຄຸມ ແລະ ແກ້ໄຂ ການລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວີດ 19, ພ້ອມທັງສຳຫຼວດກວດກາເບິ່ງສະຖານທີ່ ຫຼື ຈຸດທີ່ອາດຈະມີການລັກລອບເຂົ້າເມືອງບໍ່ຖືກຕ້ອງ ຜ່ານເສັ້ນທາງທຳມະຊາດ ໂດຍປະຕິບັດຕາມການຈັດຕັ້ງປະຕິບັດຄຳສັ່ງ, ຂອງທ່ານເຈົ້າແຂວງ ສະຫວັນນະເຂດ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງນຳໃຊ້ເຮືອປະເພດຕ່າງໆຕາມແມ່ນ້ຳຂອງ.

ໂອກາດດຽວກັນນີ້, ທ່ານຫົວໜ້າກອງບັນຊາການ ປກສ ແຂວງ ຍັງໄດ້ຮັບການລາຍງານ ຈາກກອງຮ້ອຍທະຫານຊາຍແດນ ທີ່ປະຈຳຢູ່ເຂດ ທ່າວຽງສະຫວັນວ່າ: ອຳນາດການປົກຄອງບ້ານໄດ້ພ້ອມກັນປະຕິບັດຄຳສັ່ງ ຂອງທ່ານເຈົ້າແຂວງສະຫວັນນະເຂດ ວ່າດ້ວຍການປ້ອງກັນ ແລະ ສະກັດກັ້ນການລະບາດຂອງພະຍາດໂຄວີດ 19 ທີ່ຕິດພັນກັບການຂົນສົ່ງສິນຄ້າເຂົ້າ-ອອກເມືອງຜ່ານດ່ານຕ່າງໆ, ສະພາບການລັກລອບເຂົ້າມາຂອງແຮງງານລາວ ທີ່ກັບມາຈາກປະເທດເພື່ອນບ້ານສ່ວນຫຼາຍແມ່ນນຳໃຊ້ເຮືອນ້ອຍເຂົ້າມາໃນຕອນຄ່ຳ ຫຼື ຕອນເຊົ້າ ເຂົ້າມາຕາມແຄມຂອງ ຫຼື ດອນຕ່າງໆ ເຮັດໃຫ້ການກວດກາປ້ອງກັນພົບຄວາມຫຍຸ້ງຍາກພໍສົມຄວນ.

ຈາກນັ້ນທ່ານ ຫົວໜ້າກອງບັນຊາການ ປກສ ແຂວງສະຫວັນນະເຂດ ກໍ່ໄດ້ເນັ້ນໜັກ ແລະ ຮຽກຮ້ອງໃຫ້ເຈົ້າໜ້າທີ່ກຳລັງປ້ອງກັນຊາດ, ກຳລັງ ປກສ ນະຄອນໄກສອນ, ປກສ ກຸ້ມບ້ານ ແລະ ເຈົ້າໜ້າທີ່ຈາກຂະແໜງການທີ່ກ່ຽວຂ້ອງ ໃຫ້ສືບຕໍ່ປະສານສົມທົບກັນຈັດຕັ້ງປະຕິບັດຄຳສັ່ງຂອງເຂົ້າແຂວງສະຫວັນນະເຂດ ວ່າການເພີ່ມທະວີຄວາມເຂັ້ມງວດໃນການຄຸ້ມຄອງນຳໃຊ້ເຮືອຕາມແມ່ນ້ຳຂອງຢ່າງເຂັ້ມງວດ, ພ້ອມທັງກວດກາປ້ອງກັນການລັກລອບເຂົ້າເມືອງຕາມຈຸດຕ່າງໆ ເພື່ອຮັບປະກັນບໍ່ໃຫ້ມີຜູ້ຕິດເຊື້ອພະຍາດໂຄວີດ 19 ເຂົ້າມາແຜ່ລະບາດສູ່ຄົນອື່ນຢູ່ພາຍໃນ ສ່ວນແຮງງານລາວທີ່ເຂົ້າມາຕາມການເຂົ້າ-ອອກເມືອງກໍຕ້ອງໄດ້ກັກຕົວ ແລະ ປະຕິບັດມາດຕະການຕ່າງໆ ຢ່າງເຂັ້ມງວດເພື່ອປ້ອງກັນຄວບຄຸມ ແລະ ກ້ໄຂບັນຫາການແຜ່ລະບາດຂອງພະຍາດໂຄວີດ 19.

Off

Comments are closed.