18th Feb2021

ຖະແຫຼງຂ່າວກ່ຽວກັບການກະກຽມ​ໃຫ້​ແກ່​ການ​ເລືອກ​ຕັ້ງ​ ສສຊ ຊຸດທີ IX ແລະ ສສ ນະຄອນຫຼວງວຽງຈັນ ຊຸດທີ II

by somchan

ບົດຖະແຫຼງຂ່າວ

ເພື່ອ​ກະກຽມ​ໃຫ້​ແກ່​ການ​ເລືອກ​ຕັ້ງ​ ສະມາຊິກສະພາແຫ່ງຊາດ ຊຸດທີ IX

ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ຊຸດທີ II

(ຖະແຫລງຄັ້ງວັນທີ 18 ກຸມພາ 2021)

ຖະແຫຼງຂ່າວໂດຍ: ທ່ານ ນາງ ຄຳຟອງ ພູມວົງໄຊ, ຮອງປະທານ ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ຮອງປະທານສະພາປະຊາົຊນ ນະຄອນຫຼວງ, ຄະນະກຳມະການເລືອກຕັ້ງ ຂັ້ນນະຄອນ ຫຼວງວຽງຈັນ ຄະນະປະຈຳການ.

ຂ້າພະເຈົ້າຮູ້ສຶກເປັນກຽດ ​ແລະ ພາກພູມ​ໃຈ​ເປັນຢ່າງຫຍິ່ງ ທີ່ໄດ້ຕາງໜ້າໃຫ້ຄະນະກຳມະການເລືອກຕັ້ງຂັ້ນ ນະຄອນຫຼວງວຽງຈັນ ຖະແຫຼງຂ່າວຕໍ່​ສື່​ມວນຊົນ ເພື່ອແຈ້ງມາຍັງບັນດາທ່ານພະນັກງານ ລັດຖະກອນ, ທະຫານ-ຕຳຫຼວດ ຕະຫຼອດຮອດປະຊາຊົນບັນດາເຜົ່າໃນທົ່ວ ນະຄອນຫຼວງວຽງຈັນ ຮັບຊາບ ກ່ຽວກັບຄວາມພ້ອມໃນການດຳເນີນການເລືອກຕັ້ງສະມາຊິກ ສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ II ເຊິ່ງຈະດຳເນີນໃນວັນທີ 21 ກຸມພາ 2021 ທີ່ຈະມາເຖິງນີ້.

ຄືດັ່ງທີ່ຮູ້ກັນແລ້ວວ່າ ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນ ນະຄອນ ຫຼວງວຽງຈັນ ຊຸດທີ II ແມ່ນເຫດການການເມືອງທີ່ສຳຄັນ ຂອງຊາດລາວເຮົາ ເຊິ່ງດຳເນີນໃນບັນຍາກາດທີ່ ປະເທດຊາດສືບຕໍ່ໄດ້ຮັບການພັດທະນາຢ່າງຮອບດ້ານ ແລະ ຕໍ່ເນື່ອງຕະຫຼອດໄລຍະ 30 ກວ່າປີ ແຫ່ງການປ່ຽນແປງໃໝ່ ຮອບດ້ານຢ່າງມີຫຼັກການຂອງພັກ, ດຳເນີນຂຶ້ນໃນບັນຍາກາດແຫ່ງຜົນສຳເລັດກອງປະຊຸມ ໃຫຍ່ຄັ້ງທີ XI ຂອງພັກ; ເປັນການຢັ້ງຢືນເຖິງຜົນງານແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາ ຂອງພັກປະຊາຊົນປະຕິວັດລາວຕະຫລອດມາ. ການເລືອກຕັ້ງຄັ້ງນີ້ເປັນໜ້າທີ່ການເມືອງ, ເປັນຄວາມຮັບຜິດຊອບຂອງຄະນະພັກ ແລະ ອົງການປົກຄອງ ທຸກຂັ້ນ, ໃນການນຳພາດຳເນີນການເລືອກຕັ້ງຢ່າງຮອບດ້ານ, ປຸກລະດົມ ປະຊາຊົນເຂົ້າຮ່ວມການເລືອກຕັ້ງໃຫ້ເປັນຂະບວນຟົດຟື້ນ ເຮັດໃຫ້ການເລືອກຕັ້ງບັນລຸຜົນສຳເລັດຕາມຈຸດປະສົງ, ລະດັບຄາດໝາຍທີ່ວາງໄວ້, ແນໃສ່ສ້າງການຫັນປ່ຽນທີ່ແຂງແຮງ, ເລິກເຊິ່ງ, ຮອບດ້ານໃນການເຄື່ອນໄຫວປະຕິບັດພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາແຫ່ງຊາດ ແລະ ສະພາປະຊາຊົນນະຄອນຫຼວງ ໃນຊຸມປີຕໍ່ໜ້າ.

ສຳລັບຢູ່ ນະຄອນຫຼວງວຽງຈັນ ພວກເຮົາ ພາຍຫຼັງໄດ້ຮັບການຊີ້ນຳຈາກ ຄະນະກຳມະການເລືອກຕັ້ງລະດັບຊາດ ກໍໄດ້ຮີບຮ້ອນແຕ່ງຕັ້ງຄະນະກຳມະການເລືອກຕັ້ງ ຂັ້ນນະຄອນຫຼວງວຽງຈັນ, ແຕ່ງຕັ້ງ 5 ອະນຸກຳມະການ ຊ່ວຍວຽກ, ແຕ່ງຕັ້ງ ຄະນະກຳມະການເລືອກຕັ້ງ ຂັ້ນເມືອງ ລົງຮອດຂັ້ນຄະນະຮັບຜິດຊອບໜ່ວຍປ່ອນບັດ ເລືອກຕັ້ງ ທັງໝົດ ໃນທົ່ວນະຄອນຫຼວງວຽງຈັນ.

ຈາກນັ້ນກໍ​ໄດ້​ສຸມ​ໃສ່​ຈັດ​ຕັ້ງ​ປະຕິບັດ​ບັນດາ​ໜ້າ​ວຽກໄປຕາມ 4 ບາດກ້າວ ທີ່ກຳນົດຢູ່ໃນແຜນດຳເນີນງານ ເປັນຕົ້ນ: ການແບ່ງຄວາມຮັບຜິດຊອບພາຍໃນຄະນະ, ​​ ປຶກສາຫາລືຄົ້ນຄວ້າວຽກງານທີ່ສໍາຄັນ ແລະ ຈໍາເປັນ ໂດຍອີງໃສ່ມາດຖານເງື່ອນໄຂທີ່ໄດ້ກຳນົດໄວ້ໃນກົດໝາຍ ເຊິ່ງສາມາດສະຫຼຸບໄດ້ ດັ່ງນີ້:

  1. ຄົ້ນຄວ້າ, ທາບທາມ, ຄັດເລືອກເປົ້າໝາຍຜູ້ລົງສະໝັກຮັບເລືອກຕັ້ງ ແລະ  ລາຍງານໃຫ້ຄະນະກຳມະການ ເລືອກຕັ້ງລະດັບຊາດຮັບຮອງ, ໃນນະຄອນຫຼວງວຽງຈັນ ມີຜູ້ສະໝັກຮັບເລືອກຕັ້ງເປັນ ສະມາຊິກສະພາແຫ່ງຊາດ ຊຸດ   ທີ IX ຈຳນວນ 23 ທ່ານ, ຍິງ 6 ທ່ານ; ຜູ້ສະໝັກຮັບເລືອກຕັ້ງ ເປັນສະມາຊິກສະພາປະຊາຊົນ ນະຄອນຫຼວງ ຈຳນວນ 49 ທ່ານ, ຍິງ 12 ທ່ານ ​ ເລືອກເອົາ 35 ທ່ານ.
  2. ໄດ້ຮັບຮອງເອົາຈຳນວນ ພົນລະເມືອງທັງ​ໝົດ 871.462 ຄົນ, ຍິງ 438.122 ຄົນ, ໃນນັ້ນ, ຜູ້ມີສິດເລືອກຕັ້ງມີ 600.469 ຄົນ, ຍິງ 304.669 ຄົນ ແລະ ມີໜ່ວຍເລືອກຕັ້ງ 839 ໜ່ວຍ, ໃນນີ້, ໜ່ວຍເລືອກຕັ້ງຢູ່ສະຖານທູດ, ສະຖານກົງສູນ ແລະ ສຳນັກຜູ້ຕາງໜ້າຖາວອນ ຂອງ ສປປ ລາວ ຢູ່ຕ່າງປະເທດ 40 ໜ່ວຍ.
  3. ໄດ້ຈັດຕັ້ງ​ຝຶກ​ອົບ​ຮົມ ໃຫ້ພະນັກງານຫຼັກແຫຼ່ງ ຢູ່ອົງການ ຈັດຕັ້ງ ຂັ້ນຕ່າງໆ ຮອດຂັ້ນບ້ານ ໄດ້ທັງໝົດ 378 ຄັ້ງ, ເຊິ່ງມີຜູ້​ເຂົ້າ​ຮ່ວມ​ທັງ​ໝົດ 205.924 ຄົນ, ຍິງ 75.544 ຄົນ.
  4. ທຸກໜ່ວຍປ່ອນບັດເລືອກຕັ້ງ ໄດ້ແບ່ງຄວາມຮັບຜິດຊອບ ແລະ ໄດ້ກະກຽມ ຢ່າງເປັນລະບົບຄົບຊຸດ ເຊິ່ງ ພ້ອມແລ້ວທີ່ຈະດຳເນີນການປ່ອນບັດເລືອກຕັ້ງ.
  5. ການໂຄສະນາຫາສຽງຂອງຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ດຳເນີນມາແຕ່ວັນທີ 9-17 ກຸມພາ 2021 ໄດ້ທັງໝົດ 216 ຈຸດ, ມີຜູ້ເຂົ້າຮ່ວມທັງໝົດ 35.281 ຄົນ, ຍິງ 7.324 ຄົນ. (ການລົງຫາສຽງຈະສຳເລັດໃນວັນທີ 19 ກຸມພາ 2021) ເຊິ່ງຜ່ານການໂຄສະນາຫາສຽງ ໄດ້ຮັບຄວາມສົນໃຈ ແລະ ຕ້ອນຮັບບັນດາທ່ານຜູ້ສະໝັກຮັບເລືອກຕັ້ງ ຢ່າງອົບອຸ່ນ ແລະ ມີບັນຍາກາດຟົດຟື້ນດີ.
  6. ໄດ້ສ້າງຂະບວນການ ແລະ ປະດັບປະດາ ເພື່ອຄຳນັບຮັບຕ້ອນວັນເລືອກຕັ້ງ, ຂະບວນການອອກແຮງງານຂະບວນການປ້ອງກັນຄວາມສະຫງົບ, ຂະບວນການຮັກສາຄວາມສະອາດ ແລະ ຂະບວນການສິນລະປະວັນນະຄະດີ ເພື່ອ ປຸກລະດົມໃຫ້ອົງການຈັດຕັ້ງພັກ-ລັດ ແລະ ສັງຄົມ ຕິດຕັ້ງປ້າຍຄຳຂວັນ ຕາມສຳນັກງານ, ຖະໜົນຫຼັກ, ບ້ານເຮືອນ ເປັນການສະແດງອອກໃນ ຄວາມຕຶ່ນຕົວ, ສິດເປັນເຈົ້າ ແລະ ສິດປະຊາທິປະໄຕ ຂອງພົນລະເມືອງ ຕາມກົດໝາຍ. ພ້ອມດຽວກັນນັ້ນ ໄດ້ໂຄສະນາເຜີຍແຜ່ ຂໍ້ມູນຂະບວນການກະກຽມດຳເນີນການເລືອກຕັ້ງ, ຊີວະປະຫວັດຂອງຜູ້ລົງສະໝັກຮັບເລືອກຕັ້ງ ຜ່ານສື່ມວນຊົນ, ເຮັດໃຫ້ຜູ້ມີສິດເລືອກຕັ້ງ ຢູ່ພາຍໃນ ແລະ ຕ່າງປະເທດ ໄດ້ເຂົ້າເຖິງຂໍ້ມູນຜູ້ສະໝັກຮັບເລືອກຕັ້ງຢ່າງກວ້າງຂວາງ.
  7. ດ້ານປ້ອງກັນຊາດ-ປ້ອງກັນຄວາມສະຫງົບ ກໍ່ໄດ້ເອົາໃຈໃສ່ ໃນການວາງແຜນ ແລະ ກຽມພ້ອມ ເພື່ອເຮັດໃຫ້ການເລືອກຕັ້ງຄັ້ງນີ້ ຮັບປະກັນຄວາມສະຫງົບ, ປອດໄພ ແລະ ຄວາມເປັນລະບຽບຮຽບຮ້ອຍ ໃຫ້ແກ່ການເລືອກຕັ້ງ.

ທັງໝົດນັ້ນ ແມ່ນການກະກຽມຜ່ານມາ, ມາຮອດມື້ນີ້ ຄະນະກຳມະການເລືອກຕັ້ງ ຂັ້ນນະຄອນຫຼວງວຽງຈັນ ຈິ່ງສາມາດຢັ້ງຢືນວ່າ ນະຄອນຫຼວງວຽງຈັນ ແມ່ນມີຄວາມພ້ອມຮອບດ້ານ ທີ່ຈະດຳເນີນ ການເລືອກຕັ້ງ ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ຊຸດທີ II ໃນວັນທີ 21 ກຸມພາ 2021 ນີ້ ແລະ ເຊື່ອໝັ້ນວ່າຈະຮັບປະກັນໄດ້ 4 ຄາດໝາຍໃຫຍ່ ຄື:

  1. ຮັບປະກັນໃຫ້ແກ່ການກະກຽມ ແລະ ດຳເນີນການເລືອກຕັ້ງ ໄດ້ດຳເນີນໄປຕາມຈິດໃຈຊີ້ນໍາ ທີ່ໄດ້ກໍານົດໄວ້ ໃນມະຕິຂອງກົມການເມືອງສູນກາງພັກ ວາງອອກ ຢ່າງຖືກຕ້ອງ, ສອດຄ່ອງກັບລັດຖະທຳມະນູນ ແລະ ກົດໝາຍ.
  2. ຮັບປະກັນເລືອກໃຫ້ໄດ້ ຜູ້ມີມາດຖານ ເງື່ອນໄຂ ຄົບຖ້ວນ ເຂົ້າເປັນສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ຊຸດທີ II.
  3. ຮັບປະກັນໃຫ້ຜູ້ມີສິດເລືອກຕັ້ງຕື່ໄປໃຊ້ສິດປ່ອນບັດເລືອກຕັ້ງຢ່າງຄົບຖ້ວນ; ຮັບປະກັນການລົງຄະແນນສຽງຖືກຕ້ອງຄົບຖ້ວນ; ຮັບປະກັນ ຄວາມສະຫງົບ ແລະ ຄວາມເປັນລະບຽບຮຽບຮ້ອຍ ໃຫ້ແກ່ການເລືອກຕັ້ງ.
  4. ຮັບປະກັນໃຫ້ການນັບຄະແນນມີຄວາມວ່ອງໄວ, ຖືກຕ້ອງ, ຊັດເຈນ ແລະ ຍຸຕິທໍາ.

ສຸດທ້າຍນີ້ ຂ້າພະເຈົ້າຕາງໜ້າ ຄະນະ​ກຳມະການ​ເລືອກ​ຕັ້ງ​ ຂັ້ນ​ນະຄອນຫຼວງ​ວຽງ​ຈັນ ຂໍຮຽກຮ້ອງ​ມາ​ຍັງ​ ຄະນະກຳມະການເລືອກຕັ້ງ ຂັ້ນເມືອງ, ຄະນະຮັບຜິດຊອບໜ່ວຍເລືອກຕັ້ງ, ອົງການ​ຈັດຕັ້ງພັກ-ລັດ, ອົງການຈັດຕັ້ງ​ສັງຄົມທຸກ​ພາກສ່ວນ ໂດຍສະເພາະຜູ້ມີສິດປ່ອນບັດເລືອກຕັ້ງ ຢູ່ນະຄອນຫຼວງວຽງຈັນ ຈົ່ງຍົກສູງຄວາມຮັບຜິດຊອບ, ​ຕື່ນ​ຕົວ, ສະ  ໝັກໃຈ ​ແລະ ​ເປັນ​ເຈົ້າ​ການເຂົ້າຮ່ວມໃນການກະກຽມ ແລະ ດໍາເນີນການເລືອກຕັ້ງຊຸດນີ້ ຢ່າງເປັນເຈົ້າການ ແລະ ພ້ອມພຽງກັນ. ເຮັດໃຫ້ການເລືອກຕັ້ງຄັ້ງນີ້ ເປັນປາງບຸນໃໝ່ຂອງຊາດ ຂອງຊາວນະຄອນຫຼວງວຽງຈັນ ແລະ ຮັບປະກັນໃຫ້ບັນລຸບັນດາຄາດໝາຍ ທີ່ກ່າວມາຂ້າງເທິງນັ້ນຢ່າງຈົບງາມ.

 

(ຂໍຂອບໃຈ)

Off

Comments are closed.