18th Feb2021

ພະແນກຕຳຫຼວດຈະລາຈອນ ນ.ວ ຮ່ວມກັບ ພະແນກໂຍທາທິການ ແລະ ຂົນສົ່ງ ນ.ວ ລົງກວດກາ, ແກ້ໄຂການສັນຈອນ ຢູ່ເສັ້ນທາງ 450 ປີ

by somchan

ໃນວັນທີ 17 ກຸມພາ 2021ນີ້ ພະແນກຕຳຫລວດຈະລາຈອນ ຫ້ອງຕຳຫລວດ ກອງບັນຊາການ ປກສ ນະຄອນຫລວງວຽງຈັນ ຮ່ວມກັບ ພະແນກໂຍທາທິການແລະຂົນສົ່ງ ນ.ວ ໄດ້ລົງກວດກາ, ແກ້ໄຂການສັນຈອນໄປ – ມາຂອງນັກຂັບຂີ່ທີ່ລະເມີດກົດລະບຽບຈະລາຈອນ ເປັນຕົ້ນຂີ່ລົດໄວ, ລົດບັນທຸກທີ່ບັນທຸກເກີນກຳນົດ, ບໍ່ໃສ່ຜ້າປົກປິດເວລາຂົນສົ່ງ ແລະ ຂັບຂີ່ສວນທາງຈະລາຈອນ ຢູ່ເສັ້ນທາງ 450 ປີ ໂດຍການນຳພາຂອງ ພັທ ຄຳໄຕ ຫນັ້ນໂນລິນ ຮອງຫົວໜ້າພະແນກຕຳຫຼວດຈະລາຈອນ ນະຄອນຫລວງວຽງຈັນ ມີ ທ່ານບຸນປອນ ພົມສຸວັນ ຫົວຫນ້າຫນ່ວຍງານຂົນສົ່ງ ພະແນກ ໂຍທາທິການແລະຂົນສົ່ງ ນ.ວ ມີບັນດາຄະນະຮັບຜິດຊອບກວດກາແລະພະນັກງານເຂົ້າຮ່ວມ.

ພັທ ຄຳໄຕ ຫນັ້ນໂນລິນ ຮອງຫົວໜ້າພະແນກຕຳຫຼວດຈະລາຈອນ ນະຄອນຫລວງວຽງຈັນ ໄດ້ກ່າວວ່າ ການລົງກວດກາໃນຄັ້ງນີ້ ເພື່ອເຮັດໃຫ້ການຈັດສັນມີຄວາມເປັນລະບຽບຮຽບຮ້ອຍ ໃຫ້ຜູ້ຂັບຂີ່ຫັນເຂົ້າສູ່ລະບຽບຢ່າງເຂັ້ມງວດ ເຮັດໃຫ້ຜູ້ໃຊ້ລົດ-ໃຊ້ຖະຫນົນປະຕິບັດລະບຽບກົດຫມາຍ ວ່າດ້ວຍ ຈະລາຈອນທາງບົກ ຜ່ານມາສັງເກດເຫັນວ່າມີນັກຂັບຂີ່ຈໍານວນຫນື່ງແມ່ນບໍ່ປະຕິບັດ ຕາມລະບຽບການຂັບຂີ່ລົດດ້ວຍຄວາມປະຫນາດ ບໍ່ຄໍານຶງເຖິງລະບຽບການວາງອອກ ລະເມີດລະບຽບຈະລາຈອນເປັນຕົ້ນແມ່ນລົດບັນທຸກດິນ, ຫີນ, ຊາຍເກີນກຳນົດ, ບໍ່ໃຊ້ຜ້າປົກປິດເຮັດໃຫ້ດິນ,ຊາຍ,ຫີນຕົກເຮ່ຍ ຕາມເສັ້ນທາງເຮັດໃຫ້ເສັ້ນທາງເປີ້ເປື້ອນ,ຮ້າຍໄປກວ່ານັ້ນແມ່ນການລະເມີດ ລະບຽບພາໃຫ້ເກີດອຸປະຕິເຫດຢູ່ເສັ້ນທາງດັ່ງກ່າວ ໃຫ້ມີຜົນເສຍຫາຍທາງດ້ານ ວັດຖຸ ສັບສິນ ແລະ ຊີວິດ ໃນອັດຕາທີ່ສູງ.


Off

Comments are closed.