12th Mar2021

ພິທີມອບ-ຮັບ ໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ໃຫ້ 2 ໜ່ວຍພັກຂຶ້ນກັບຄະນະພັກຮາກຖານພະແນກ ປທສ ແຂວງອຸດົມໄຊ

by somchan

ໃນທ້າຍອາທິດຜ່ານານີ້, ຢູ່ທີ່ພະແນກ ໄປສະນີ,ໂທລະຄົມມະນາຄົມ ແລະ ການສື່ສານ ແຂວງອຸດົມໄຊ ​ໄດ້ຈັດພິທີມອບ-ຮັບ ໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ໃຫ້ 2 ໜ່ວຍພັກທີຂຶ້ນກັບ, ​ໂດຍ​ການ​ເປັນ​ປະທານ​ຂອງ ທ່ານ ອ່ອນແກ້ວ ອຸ່ນອາລົມ ກຳມະການພັກແຂວງ ຮອງເຈົ້າແຂວງອຸດົມໄຊ, ມີແຂກເຊີນ ແລະ ສະມາຊິກພັກ​ເຂົ້າ​ຮ່ວມ.

​ໃນ​ກອງ​ປະຊຸມ ຕ່າງໜ້າໜ່ວຍພັກພະແນກ ໄປສະນີ, ໂທລະຄົມມະນາຄົບ ແລະ ການສື່ສານ ກັບບໍລິສັດຄົມມະນາຄົມ ມະຫາຊົນ ໄດ້ຜັດປ່ຽນກັນຜ່ານບົດສະຫຼຸບການກໍ່ສ້າງໜ່ວຍພັກປອດໄສ ປະຈຳປີ 2020 ແລະ ທິດທາງແຜນການປະຈຳປີ 2021 ຕີ​ລາຄາ​ສະພາບ​ການຈັດ​ຕັ້ງ​ຊີ້​ນຳ-​ນຳພາ ຂອງ​ຄະ​ນະ​ພັກ​ໃນ​ໄລຍະ​ຜ່ານ​ມາ ຄະນະ​ພັກ​ແຕ່ລະ​ຂັ້ນ​ໄດ້​ເອົາ​ໃຈ​ໃສ່​ສຶກສາ​ອົບຮົມ​ການ​ເມືອງ-​ນຳພາ​ແນວ​ຄິດ​ໃຫ້​ແກ່​ສະມາຊິກ​ພັກ, ພະນັກງານ​ໃນ​ຄວາມ​ຮັບຜິດຊອບ​ຂອງ​ຕົນ​ເປັນ​ປົກກະຕິ ​ໄດ້​ນຳພາ​ດຳ​ເນີນ​ຊີວິດ​ການ​ເມືອງ ຕິດ​ພັນ​ກັບການ ​ເຊື່ອມ​ຊຶມ​ແນວທາງ​ນະ​ໂຍບາຍ, ມະ​ຕິ, ຄຳ​ສັ່ງ​ຂອງ​ພັກ, ລະບຽບ​ກົດໝາຍ​ຂອງ​ລັດ ​ເຮັດ​ໃຫ້​ສະມາຊິກ​ພັກ ພະນັກ​ງານ ມີ​ຄຸນ​ທາດ​ການ​ເມືອງ​ໜັກ​ແໜ້ນ, ມີ​ສະຕິ​ຕໍ່​ການຈັດ​ຕັ້ງ ​ແລະ ​ເປັນ​ເອກະ​ພາບ​ສູງ​ຕໍ່ການ​ນຳພາ​ຂອງ​ຄະນະ​ພັກ ຄະນະ​ພັກ​ແຕ່ລະ​ຂັ້ນ​ໄດ້​ເອົາ​ໃຈ​ໃສ່​ປັບປຸງ​ແບບ​ແຜນ​ນຳພາ-​ວິທີ​ເຮັດ​ວຽກ ຕາມ​ຫຼັກການ​ນຳພາ​ຂອງ​ພັກ​ ຈາກ​ນັ້ນ​ ທ່ານ ນ.ລີຈັນ ສີສຸທຳ ກໍ່ໄດ້ຜ່ານມະຕິຕົກລົງມອບໃບຢັ້ງຢືນໃຫ້ແກ່ 2 ໜ່ວຍພັກທີ່ຂຶ້ນກັບພະແນກ ໄປສະນີ,ໂທລະຄົມມະນາຄົມ ແລະ ການສື່ສານ ແຂວງອຸດົມໄຊ ໃນນີ້ມີໜ່ວຍພັກພະແນກໄປສະນີ ໂທລະຄົມມະນາຄົມ ແລະ ການສື່ສານ ແລະ ໜ່ວຍພັກບໍລິສັດ ຄົມມະນາຄົມມະຫາຊົນ.

ຕອນທ້າຍ ທ່ານ ອ່ອນແກ້ວ ອຸ່ນອາລົມ ໄດ້ໂອ້ລົມເນັ້ນໜັກໃຫ້ພ້ອມກັນເອົາໃຈໃສ່ຍົກສູງຄວາມເປັນເຈົ້າການໃນການ ນໍາພາຈັດຕັ້ງປະຕິບັດວຽກງານໃຫ້ມີຄວາມຮັບປະກັນ, ເປັນເຈົ້າການປະຕິບັດລະບຽບຂອງ​ພັກ, ເຄື່ອນໄຫວເຮັດໜ້າທີ່ໃຫ້ມີຄວາມຖືກຕ້ອງໂປ່ງໃສ.

Off

Comments are closed.