17th Mar2021

ລມຕ ກະຊວງ ປກສ ຕີລາຄາສູງຕໍ່ສາຍພົວພັນຂອງສອງກະຊວງ ປກສ ລາວ-ຫວຽດນາມ

by somchan

ພົທ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ລັດຖະມົນຕີ ກະຊວງປ້ອງກັນ ຄວາມສະຫົງບ ໄດ້ໃຫ້ສໍາພາດເນື່ອງໃນໂອກາດ ວັນຊ່ຽວຊານປ້ອງກັນຄວາມສະຫງົບຫວຽດນາມ ປະຈຳ ສປປ ລາວ ຄົບຮອບ 60 ປີ ຄືວັນທີ 22 ມີນາ 1961 ຫາ 22 ມີນາ 2021 ເຊິ່ງທ່ານໄດ້ຕີລາຄາຄຸງ ຕໍ່ການພົວພັນຮ່ວມມືຮອບດ້ານ ລະຫວ່າງຄະນະພັກ-ຄະນະນໍາກະຊວງ ປກສ ລາວ ແລະ ກະຊວງ ປກສ ຫວຽດນາມ, ໂດຍສະເພາະແມ່ນການປະກອບສ່ວນສໍາຄັນ ຂອງຊຽວຊານ ປກສ ຫວຽດນາມ ຕິດພັນກັບມູນເຊື້ອການເຕີບໃຫຍ່ເຂັ້ມແຂງຂອງກໍາລັງປ້ອງກັນຄວາມສະຫງົບປະຊາຊົນລາວ ຕະຫຼອດໄລຍະ 60 ປີ ຜ່ານມາ, ດັ່ງທີ່ຮູ້ນໍາກັນແລ້ວວ່າ ລາວ-ຫວຽດນາມ, ຫວຽດນາມ-ລາວ ແມ່ນປະເທດເພື່ອນມິດຍຸດທະສາດ, ຮ່ວມທຸກຮ່ວມສຸກນໍາກັນມາເປັນເວລາດົນນານ ເປັນບ້ານໃກ້ເຮືອນຄຽງ. ປະຊາຊົນຕັ້ງພູມລໍາເນົາຄົນລະຟາກສາຍພູຫຼວງ,

ຮ່ວມໃຊ້ແມ່ນ້ໍາສາຍດຽວກັນ, ມີມູນເຊື້ອສາມັກຄີຮັກແພງຊ່ວຍເຫຼືອກັນມາແຕ່ດົນນານ ນັບມື້ນັບສະຫນິດແຫນ້ນ ບໍ່ມີປະເທດໃດໃນໂລກຈະມີສາຍພົວພັນອັນບໍລິສຸດຜຸດຜ່ອງ, ຊື່ສັດບໍລິສຸດ ແລະ ເຫຼື້ອມໃສ ຄືລາວ ແລະ ຫວຽດນາມ, ການນໍາຂັ້ນສູງຂອງສອງປະເທດ ບັນດາຂະແຫນງການ ແຕ່ສູນກາງຮອດທ້ອງຖິ່ນ ຕະຫຼອດຮອດປະຊາຊົນສອງຊາດ, ມີຄວາມຮັກແພງກົມກຽວກັນ ແລະ ໄດ້ຜູກເລິກໃນສາຍເລືອດ, ໃນຄວາມຮູ້ສຶກ ກາຍເປັນສະຕິຕື່ນຕົວຂອງທຸກໆຄົນ ຂອງສອງຊາດ, ປະທານ ໂຮ່ຈິມິນ ຜູ້ນໍາທີ່ຍິ່ງໃຫຍ່ ໄດ້ເບິ່ງເຫັນຄວາມສໍາຄັນຈໍາເປັນພາວະວິໄສ. ແລະ ເວົ້າວ່າການປະຕິວັດລາວ ບໍ່ອາດສາມາດຂາດການຊ່ວຍເຫຼືອຂອງການປະຕິວັດ ຫວຽດນາມ ແລະ ການປະຕິວັດຫວຽດນາມ ກໍບໍ່ອາດຂາດການຊ່ວຍເຫຼືອຂອງການປະຕິວັດ ລາວ, ດ້ວຍຄວາມສາມັກຄີຮ່ວມສໍາພັນສູ້ຮົບ ລາວ-ຫວຽດນາມ. ພັກ-ລັດຖະບານ ແລະ ປະຊາຊົນຫວຽດນາມ ເວົ້າລວມ, ເວົ້າສະເພາະ ກະຊວງປ້ອງກັນຄວາມສະຫງົບ ຫວຽດນາມ ໄດ້ສົ່ງພະນັກງານທີ່ດີເດັ່ນ, ລູກຮັກ ຫຼານປະເສີດຂອງຕົນ ມາປະຕິບັດຫນ້າທີ່ຄຽງບາຄຽງໄລກັບກໍາລັງປ້ອງກັນຄວາມສະຫງົບປະຊາຊົນລາວ ບົນຈິດໃຈສາກົນກໍາມະຊີບສູງ ການຊ່ວຍເພື່ອນ ແມ່ນການຊ່ວຍເຫຼືອຕົນເອງ.

ທ່ານຍັງກ່າວຕື່ມວ່າ: ສໍາລັບຂ້າພະເຈົ້າ ຈະເຮັດສຸດຄວາມສາມາດຂອງຕົນ ໃນການຮັດແຫນ້ນຄວາມສາມັກຄີ ຂອງສອງພັກ, ສອງລັດ, ປະຊາຊົນສອງຊາດ ລາວ-ຫວຽດນາມ, ກໍຄືສອງກໍາລັງປ້ອງກັນຄວາມສະຫງົບ. ໂດຍສະເພາະຈະເພີ່ມທະວີການສຶກສາອົບຮົມການເມືອງແນວຄິດ, ສຶກສາ ມູນເຊື້ອຂອງ ຊ່ຽວຊານປ້ອງກັນຄວາມສະຫງົບຫວຽດນາມ, ເພື່ອຍົກສູງຄວາມຮັບຮູ້ ໃຫ້ແກ່ພະນັກງານ, ນາຍ ແລະ ພົນຕໍາຫຼວດ ກ່ຽວກັບນ້ໍາໃຈມິດຕະພາບ , ຄວາມສາມັກຄີພິເສດ ແລະ ການ ຮ່ວມມືຮອບດ້ານເຊິ່ງເປັນມູນເຊື້ອອັນລ້ໍາຄ່າຂອງສອງກະຊວງ, ເພື່ອເສີມຂະຫຍາຍເຮັດໃຫ້ກໍາລັງຮຸ້ນປະຈຸບັນ ແລະ ຮຸ້ນຕໍ່ໆໄປຮັກສາ, ເຄົາລົບ, ສືບຕໍ່ເສີມຂະຫຍາຍ ເຮັດໃຫ້ປະຫວັດສາດມູນເຊື້ອອັນສະຫງ່າງາມ ຂອງການພົວພັນລະຫວ່າງສອງກະຊວງ, ສອງຊາດສວຍສົດງົດງາມຕື່ມອີກ.

Off

Comments are closed.