26th Mar2021

ທະນາຄານ ແຫ່ງ ສປປ ລາວ ປາຖະກະຖາມູນເຊື້ອມ ວັນສ້າງຕັ້ງກໍາລັງ ປ້ອງກັນຄວາມສະຫງົບ ຄົບຮອບ 60 ປີ

by somchan

ທະນາຄານແຫ່ງ ສປປ ລາວ ໄດ້ຈັດຕັ້ງປາຖະກະຖາມູນເຊື້ອມ ວັນສ້າງຕັ້ງກໍາລັງ ປ້ອງກັນ ຄວາມສະຫງົບ ຄົບຮອບ 60 ປີ ໃນວັນທີ 26 ມີນາ 2021 ນີ້ ທີ່ວິທະຍາໄລການທະນາຄານ ໂດຍ ການປາຖະກະຖາຂອງ ພົຕ ບຸນມີ ແສງຄໍາຢອງ ອາດີດຫົວຫນ້າກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ເຂົ້າຮ່ວມຮັບຟັງມີ ທ່ານ ນາງ ຂັນແກ້ວ ຫລ້າມະນີເງົາ ກໍາມະການປະຈໍາພັກປະຈໍາ ພັກທະນາຄານແຫ່ງ ສປປລາວ ຫົວຫນ້າກົມບັນຊີ ແລະ ການເງິນ ມີບັນດາ ເລຂາຫນ່ວຍພັກ ພະນັກງານຫລັກແຫລ່ງ ອ້ອມຂ້າງເຂົ້າຮ່ວມ.

ພົຕ ບຸນມີ ແສງຄໍາຢອງ ອາດີດຫົວຫນ້າກົມໃຫຍ່ສັນຕິບານ ໄດ້ກ່າວວ່າ:ວັນທີ 5 ເມສາ ປີ 1961 ແມ່ນວັນສ້າງຕັ້ງກໍາລັງປ້ອງກັນຄວາມສະຫງົບ ປະຊາຊົນ ເປັນວັນປະຫວັດສາດສໍາຄັນ ຂອງຊາດ, ຂອງພັກ, ຂອງກໍາລັງປ້ອງກັນຄວາມສະຫງົບທີ່ໄດ້ຫມູນວຽນມາບັນຈົບ ຄົບຮອບ 60 ປີ ແມ່ນກໍາລັງປະກອບອາວຸດປະຕິວັດ ເຊິ່ງແມ່ນພັກປະຊາຊົນປະຕິວັດລາວ ເປັນຜູ້ສ້າງຕັ້ງຂຶ້ນ ແລະ ເຕີບໃຫຍ່ຂະຫຍາຍຕົວໃນເງື່ອນໄຂ, ສະພາບແວດລ້ອມ ແລະ ຄວາມຈໍາເປັນ ພາວະວິໄສຂອງພາລະກິດຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານລ່າເມືອງຂຶ້ນ ແລະ ພວກປະຕິການ, ລູກແຫຼ້ງຕີນມືຜູ້ຂາຍຊາດ;

ກໍາລັງປ້ອງກັນຄວາມສະຫງົບ ປະຊາຊົນ ໄດ້ຕໍ່ສູ້ປາບປາມພວກຝືນປະຕິວັດ, ພວກຂາຍຊາດ, ພວກອິດທິກໍາລັງປໍລະປັກ, ພວກຕ້ອງໂທດອາຍາຕ່າງໆ ສາມາດປົກປັກ ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງປະເທດຊາດ, ປົກປັກຮັກສາຊີວິດ, ຊັບສິນ, ຜົນປະໂຫຍດອັນຊອບທໍາຂອງປະຊາຊົນລາວບັນດາເຜົ່າ; ກໍາລັງປ້ອງກັນຄວາມສະຫງົບໄດ້ ຕໍ່ສູ້ພິລະອາດຫານ, ເດັດດ່ຽວຫນຽວແຫນ້ນບໍ່ຍອມຈໍານົນ, ເສຍສະຫຼະ, ຜ່ານຜ່າຄວາມຫຍຸ້ງຍາກຕີເອົາ ຊະນະສັດຕູທຸກໂຕ ພ້ອມກັບກອງທັບ ແລະ ປະຊາຊົນລາວບັນດາເຜົ່າໃນໄລຍະການປະຕິວັດປົດປ່ອຍປະເທດຊາດ, ພາຍຫຼັງປະເທດຊາດໄດ້ຮັບການປົດປ່ອຍກຳລັງປ້ອງກັນຄວາມສະຫງົບ ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ, ສົມຊື່ວ່າເປັນກໍາລັງປະ ກອບອາວຸດທີ່ແຫມຄົມ, ຈົງຮັກພັກດີຕໍ່ພັກ, ຕໍ່ປະຊາຊົນລາວບັນດາເຜົ່າ; ສົມແລ້ວເປັນກໍາລັງປະກອບ ອາວຸດວິລະຊົນ ຂອງຊາດລາວວິລະຊົນ.

Off

Comments are closed.