27th Mar2021

ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ອັດລົງຢ່າງສະຫງ່າງາມ

by somchan

ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ອັດລົງຢ່າງສະຫງ່າງາມ ໃນຕອນບ່າຍວັນທີ 26 ມີນາ 2021 ທີ່ຫໍປະຊຸມສະພາແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານ ຂອງ ທ່ານໄຊສົມພອນ ພົມວິຫານ ປະທານສະພາແຫ່ງຊາດໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ມີບັນດາທ່ານການນຳພັກລັດ, ພະນັກງານອາວຸໂສບໍານານ, ບັນດາສະມາຊິກສະພາແຫ່ງຊາດ ແລະ ຜູ້ຕາງໜ້າພາກສ່ວນຕ່າງໆ ເຂົ້າຮ່ວມ.

ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ໄດ້ດໍາເນີນມາເປັນເວລາ 5 ວັນ ດ້ວຍບັນຍາກາດອັນຟົດຟື້ນ ແລະ ເຄັ່ງຮ້ອນເເຫ່ງການເສີມຂະຫຍາຍສິດປະຊາທິປະໄຕ ຂອງບັນດາທ່ານສະມາຊິກສະພາແຫ່ງຊາດ ໃນການພິຈາລະນາ ແລະ ຮັບຮອງເອົາບັນດາເນື້ອໃນສຳຄັນ ທີ່ນໍາມາພິຈາລະນາໃນກອງປະຊຸມຄັ້ງນີ້ ໄດ້ມີຜົນສໍາເລັດຢ່າງຈົບງາມ.

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ປະທານກອງປະຊຸມໄດ້ກ່າວປິດກອງປະຊຸມວ່າ:​ ກອງປະຊຸມ ໄດ້ຮັບຟັງການລາຍງານຂອງຄະນະກຳມະການເລືອກຕັ້ງລະດັບຊາດ ກ່ຽວກັບຜົນຂອງການເລືອກຕັ້ງ ແລະຢັ້ງຢືນຄຸນລັກສະນະຂອງສະມາຊິກສະພາແຫ່ງຊາດ ຊຸດທີ IX, ກອງປະຊຸມໄດ້ດໍາເນີນການເລືອກຕັ້ງເອົາຕຳແໜ່ງສຳຄັນຕ່າງໆ  ເຊັ່ນ: ປະທານສະພາແຫ່ງຊາດ, ຮອງປະທານສະພາແຫ່ງຊາດ, ຄະນະປະຈຳສະພາແຫ່ງຊາດ; ເລືອກຕັ້ງປະທານປະເທດ, ຮອງປະທານປະເທດ, ນາຍົກລັດຖະມົນຕີ, ຫົວໜ້າອົງການໄອຍະການປະຊາຊົນສູງສຸດ, ປະທານສານປະຊາຊົນສູງສຸດ, ປະທານອົງການກວດສອບແຫ່ງລັດ ປະທານອົງການກວດກາແຫ່ງລັດ, ພ້ອມດຽວກັນນັ້ນ, ໄດ້ຮັບຮອງເອົາກົງຈັກການຈັດຕັ້ງຂອງ ສະພາແຫ່ງຊາດ, ໂຄງປະກອບກົງຈັກຂອງລັດຖະບານ, ຮັບຮອງເອົາການແຕ່ງຕັ້ງຮອງນາຍົກລັດຖະມົນຕີ, ປະທານກໍາມາທິການ, ເລຂາທິການສະພາແຫ່ງຊາດ, ຮອງປະທານກໍາມາທິການ ຂອງສະພາແຫ່ງຊາດ ແລະ ສະມາຊິກລັດຖະບານຕາມກົດໝາຍກຳນົດໄວ້. ການເລືອກຕັ້ງບຸກຄະລາກອນໃນຕຳແໜ່ງສໍາຄັນຂອງລັດ, ການຮັບຮອງເອົາກົງຈັກການຈັດຕັ້ງ ແລະ ບຸກຄະລາກອນຂອງອົງການລັດ, ເປັນບາດກ້າວສໍາຄັນ ໃນການສືບຕໍ່ບູລະນະລະບົບອໍານາດລັດ ປະຊາທິປະໄຕ ປະຊາຊົນ ໃຫ້ໜັກແໜ້ນເຂັ້ມແຂງ ແລະ ເພື່ອສືບຕໍ່ຈັດຕັ້ງປະຕິບັດແຜນວຽກ ຂອງແຕ່ລະອົງການ ໃນ 5 ປີ ຕໍ່ໜ້າ ຕາມມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍຫັນເປັນແຜນງານໂຄງການອັນລະອຽດຂອງແຕ່ລະຂະແໜງການ, ອົງການ ແລະ ຫັນເຂົ້າສູ່ຊີວິດສັງຄົມຢ່າງແທດເຖິງ.

ກອງປະຊຸມ ໄດ້ຮັບຟັງການປະກອບຄວາມເຫັນທີ່ສໍາຄັນ ການກ່າວຮັບໜ້າທີ່ຂອງທ່ານປະທານ ສະພາແຫ່ງຊາດ, ປະທານປະເທດ, ນາຍົກລັດຖະມົນຕີ, ຫົວໜ້າອົງການໄອຍະການປະຊາຊົນສູງ ສູດ, ປະທານສານປະຊາຊົນສູງສຸດ, ປະທານອົງການກວດສອບແຫ່ງລັດ ແລະ ປະທານກວດກາ ແຫ່ງລັດ ທີ່ໄດ້ຮັບການເລືອກຕັ້ງ ຊຶ່ງສະແດງເຖິງຄວາມມຸ້ງໝັ້ນ, ການຕັດສິນໃຈຂອງບັນດາທ່ານ ການນຳຂັ້ນສູງ ໃນການເພີ່ມທະວີຄວາມຮັບຜິດຊອບ ຕໍ່ການປະຕິບັດໜ້າທີ່ຂອງຕົນ ຕາມທີ່ໄດ້ກໍາ ນົດໄວ້ໃນລັດຖະທໍາມະນູນ ແລະ ກົດໝາຍ, ມີຄວາມຮັບຜິດຊອບຕໍ່ສະພາແຫ່ງຊາດ ໃນຖານະທີ່ ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ພ້ອມທີ່ຈະເຮັດ ໜ້າທີ່ອັນສູງສູດທີ່ມີຄວາມໝາຍສໍາຄັນນີ້ ຕາມການມອບໝາຍຂອງຊາດ ແລະ ປະຊາຊົນ ເພື່ອພ້ອມກັນສຸມໃສ່ແກ້ໄຂສະພາບຄວາມຫຍຸ້ງຍາກເຄັ່ງຮ້ອນທາງດ້ານເສດຖະກິດການເງິນ ໃນປັດຈຸບັນນີ້ໃຫ້ໄດ້ ເພື່ອສ້າງໃຫ້ມີການຫັນປ່ຽນໃໝ່ຢ່າງຕັ້ງໜ້າ, ແຂງແຮງ ນຳເອົາປະເທດຊາດກ້າວຂຶ້ນຢ່າງໜັກແໜ້ນ, ກອງປະຊຸມ ໄດ້ສຸມໃສ່ຄົ້ນຄວ້າ, ພິຈາລະນາຮັບຮອງ ແຜນພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດ 5 ປີ ຄັ້ງທີ IX ແຕ່2021-2025, ຄົ້ນຄວ້າ, ພິຈາລະນາ, ຮັບຮອງການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ ແຕ່ 2016-2020 ແລະ ທິດທາງແຜນການເຄື່ອນໄຫວວຽກງານ 5 ປີຕໍ່ໜ້າ ຂອງອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ອົງການກວດສອບແຫ່ງລັດ ແລະ ອົງການກວດກາແຫ່ງລັດ, ຮັບຟັງການລາຍງານ ແລະ ສຸມໃສ່ປະກອບຄຳເຫັນ ພ້ອມທັງ ຮັບຮອງ ເອົາແຜນເຄື່ອນໄຫວວຽກງານ, ແຜນການສ້າງ ແລະ ປັບປຸງກົດໝາຍ 5 ປີ 2021-2025 ຂອງສະພາແຫ່ງຊາດ ເພື່ອເປັນບ່ອນອີງພື້ນຖານໃຫ້ແກ່ການເຄື່ອນໄຫວວຽກງານຂອງສະພາແຫ່ງຊາດ ໃນ 5 ປີ, ຮັບປະກັນການເຄື່ອນໄຫວຂອງຕົນ ຕອບສະໜອງໄດ້ຕາມຄວາມຮຽກຮ້ອງຕ້ອງການອັນຈໍາເປັນ ໃນການພັດທະນາເສດຖະກິດສັງຄົມໃນ 5 ປີຕໍ່ໜ້າ ແລະ ສືບຕໍ່ຍົກສູງຄຸນນະພາບການເຄື່ອນໄຫວວຽກງານຂອງສະພາແຫ່ງຊາດ ໃຫ້ມີປະສິດທິພາບ, ມີປະສິດທິຜົນ ແລະ ມີຄວາມເຂັ້ມງວດໃນການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ.

ໃນໂອກາດທີ່ມີຄວາມໝາຍສໍາຄັນນີ້, ທ່ານ ໄຊສົມພອນ ພົມວິຫານ ຕາງໜ້າໃຫ້ກອງປະຊຸມຄັ້ງປະຖົມມະລຶ ຂອງສະພາແຫ່ງຊາດ ຊຸດທີIX, ຮຽກຮ້ອງມາຍັງຄະນະປະຈໍາສະພາແຫ່ງຊາດ, ລັດຖະບານ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ອົງການກວດສອບແຫ່ງລັດ, ອົງການກວດກາແຫ່ງລັດ ກໍຄື ບັນດາທ່ານ ສະມາຊິກສະພາແຫ່ງຊາດ ທີ່ປະຈຳຢູ່ແຕ່ລະເຂດເລືອກຕັ້ງຈົ່ງໄດ້ຮີບຮ້ອນ ຈັດຕັ້ງຜັນຂະຫຍາຍເນື້ອໃນກອງປະຊຸມຄັ້ງນີ້ ໃຫ້ທົ່ວເຖິງ ທັນເວລາ, ຮຽກຮ້ອງມາຍັງທຸກຂະແໜງການ ແລະ ອົງການປົກຄອງທ້ອງຖິ່ນທຸກຂັ້ນ, ປະຊາຊົນລາວບັນດາເຜົ່າ ແລະ ທຸກພາກສ່ວນ ຈົ່ງໃຫ້ການຮ່ວມມື, ເປັນເຈົ້າການເຂົ້າຮ່ວມຈັດຕັ້ງປະຕິບັດໃຫ້ເກີດດອກອອກຜົນເປັນຈິງ. ໄປຄຽງຄູ່ກັນນັ້ນ, ສະເໜີໃຫ້ລັດຖະບານ ຈົ່ງຮີບຮ້ອນປັບປຸງກົງຈັກການຈັດຕັ້ງ, ບຸກຄະລາກອນ ໃຫ້ແທດເໝາະກັບ. ພາລະບົດບາດ, ສິດ ແລະ ໜ້າທີ່ຂອງຕົນ ເພື່ອຮັບປະກັນເຮັດໃຫ້ການເຄື່ອນໄຫວວຽກງານ ໃນ 5 ປີ ຕໍ່ໜ້າມີປະສິດທິຜົນສູງຂຶ້ນ ແລະ ສາມາດບັນລຸບັນຕາຄາດ ໝາຍທີ່ໄດ້ກຳນົດໄວ້. ກອງປະຊຸມສະເໜີມາຍັງອົງການແນວລາວສ້າງຊາດ, ສະຫະພັນນັກຮົບເກົ່າລາວ, ບັນດາອົງການຈັດຕັ້ງມະຫາຊົນ ແລະ ການຈັດຕັ້ງທາງສັງຄົມຈິ່ງເປັນເຈົ້າການໃນການຕິດຕາມກວດກາ ການປະຕິບັດໜ້າທີ່ຂອງບັນດາອົງການອໍານາດລັດ ຕາມສິດ ແລະ ໜ້າທີ່ຂອງຕົນ ຕາມທີ່ກົດໝາຍກໍານົດ ເພື່ອຮັບປະກັນເຮັດໃຫ້ບັນດາເນື້ອໃນທີ່ຖືກຮັບຮອງໃນກອງປະຊຸມຄັ້ງນີ້ ໄດ້ຮັບການຈັດຕັ້ງປະຕິບັດຢ່າງ ມີໝາກຜົນ, ນໍາເອົາຜົນປະໂຫຍດຕົວຈິງມາໃຫ້ປະຊາຊົນບັນດາເຜົ່າ.

Off

Comments are closed.