02nd Apr2021

ມອບ-ຮັບຫນ້າທີ່ ລັດຖະມົນຕີກະຊວງສຶກສາທິການ ແລະ ກິລາ ຜູ້ໃຫມ່

by somchan

ພິທີມອບ-ຮັບຫນ້າທີ່ ລັດຖະມົນຕີ ກະຊວງສຶກສາທິການ ແລະ ກິລາ ລະຫວ່າງ ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ຜູ້ເກົ່າ ແລະ ຮສ ປອ ພຸດ ສິມມາລາວົງ ກໍາມະການສູນກາງພັກ, ລັດຖະມົນຕີກະຊວງສຶກສາທິການ ແລະ ກິລາ ຜູ້ໃຫມ່ ໄດ້ຈັດໃນວັນທີ 1 ເມສາ 2021 ນີ້ ໂດຍການເຂົ້າຮ່ວມຂອງ ສຈ ປອ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ມີບັນດາຄະນະພັກ-ຄະນະນໍາ ແລະ ພະນັກງານຫຼັກແຫຼ່ງເຂົ້າຮ່ວມ.

ທ່ານ ນາງ ແສງເດືອນ ຫລ້າຈັນທະບູນ ດ້ກ່າວວ່າ: ຕະຫລອດໄລຍະ 5 ປີຜ່ານມາ ພ້ອມດ້ວຍໝູ່ຄະນະຂັ້ນຕ່າງໆໄດ້ພ້ອມກັນຄົ້ນຄວ້າ ແລະ ເສີມຂະຫຍາຍ ແນວທາງນະໂຍບາຍຂອງພັກ, ໄດ້ຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກກະຊວງ ກໍຄືແຜນພັດທະນາຂະແຫນງການສຶກສາ ແລະ ກິລາ ຄັ້ງທີ VIII ເຊິ່ງມີຜົນສໍາເລັດສູງສົມຄວນ. ສໍາລັບສິ່ງທີ່ຍັງຄົງຄ້າງ ແລະ ບໍ່ທັນສໍາເລັດແມ່ນໄດ້ມີການຕີລາຄາ ແລະ ໄດ້ກໍານົດວິທີແກ້ໄຂໄວ້ຢູ່ໃນແຜນພັດທະນາຂະແຫນງການສຶກສາ ແລະ ກິລາ ໃນ 5 ປີ ຄັ້ງທີ IX ເພື່ອໃຫ້ຄະນະນໍາຂອງກະຊວງຊຸດໃຫມ່ ໄດ້ນໍາໄປຜັນຂະຫຍາຍເຂົ້າສູ່ຕົວຈິງໃຫ້ມີຜົນສໍາເລັດເປັນກ້າວໆ.

ໂອກາດນີ້, ສຈ ປອ ກິແກ້ວ ໄຂຄໍາພິທູນ ກໍໄດ້ໃຫ້ກຽດໂອ້ລົມຕໍ່ພິທີວ່າ: ການສັບປ່ຽນຫນ້າທີ່ ຫລື ການສືບທອດປ່ຽນແທນຂອງພະນັກງານການນໍາຂັ້ນສູງຂອງພັກ-ລັດ ບໍ່ວ່າຈະຢູ່ສູນກາງ ຫລື ທ້ອງຖິ່ນ ແມ່ນນະໂຍບາຍ, ຫລັກການ ແລະ ເປັນລະບຽບການຂອງພັກ ແລະ ລັດ ທີ່ກໍານົດໄວ້ ແນ່ໃສ່ປັບປຸງການຈັດຕັ້ງ ແລະ ບຸກຄະລາກອນ ໃຫ້ສອດຄ່ອງ ແລະ ຕອບສະຫນອງກັບຄວາມຮຽກຮ້ອງຕ້ອງການຂອງຫນ້າທີ່ວຽກງານໃນໄລຍະໃຫມ່, ພ້ອມທັງໄດ້ເນັ້ນໃຫ້ຄະນະພັກ, ຄະນະນໍາ ແລະ ພະນັກງານທົ່ວ ກະຊວງສຶກສາທິການ ແລະ ກິລາ ເພີ່ມທະວີຄວາມເອົາໃຈໃສ່ໃນບາງບັນຫາສໍາຄັນ ໂດຍເປັນເຈົ້າການເຮັດວຽກງານສຶກສາອົບຮົມນໍາພາແນວຄິດ ຂອງພະນັກງານ, ສະມາຊິກພັກຢູ່ແຕ່ລະຂັ້ນ, ສຸມໃສ່ຈັດຕັ້ງປະຕິບັດວຽກງານວິຊາສະເພາະຕາມເປົ້າຫມາຍທີ່ ກອງປະຊຸມໃຫຍ່ ຂອງກະຊວງສຶກສາ ແລະ ກິລາ ໄດ້ວາງໄວ້ໃຫ້ປາກົດຜົນເປັນຈິງ, ບໍາລຸງກໍ່ສ້າງ ແລະ ຍົກລະດັບຄວາມຮູ້ ຄວາມສາມາດໃຫ້ພະນັກງານ, ປັບປຸງຄວາມຮູ້ທາງດ້ານວິຊາການ ແລະ ທັກສະດ້ານການສິດສອນຂອງຄູຊັ້ນປະຖົມສຶກສາ ໂດຍໃຫ້ບຸລິມະສິດໃນການຈັດສັນຊັບພະຍາກອນ ທີ່ມີເຂົ້າໃນວຽກງານປະຖົມສຶກສາໃຫ້ພຽງພໍ, ສະຫນອງການສຶກສາຂັ້ນພື້ນຖານທີ່ມີຄຸນນະພາບ ໂດຍສະເພາະຊັ້ນມັດທະຍົມສຶກສາຕອນປາຍ, ອາຊີວະສຶກສາ ແລະ ການສຶກສາຊັ້ນສູງ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ ກໍຄືການສ້າງຄວາມເຂັ້ມແຂງໃຫ້ແກ່ຜູ້ບໍລິຫານການສຶກສາ ແລະ ກິລາ ໃນທຸກລະດັບ ເພື່ອປັບປຸງປະສິດທິພາບ, ປະສິດທິຜົນ ເພື່ອແກ້ ໄຂຄວາມແຕກໂຕນໃນວຽກງານການສຶກສາ ແລະ ກິລາຢູ່ຕົວເມືອງ ແລະ ຊົນນະບົດ, ພ້ອມທັງສືບຕໍ່ກໍ່ສ້າງ ແລະ ພັດທະນາບຸກຄະລາກອນການກິລາ-ກາຍະກໍາ ໃຫ້ມີຄຸນະພາບ ແລະ ສາມາດແຂ່ງຂັນກັບພາກພື້ນ ແລະ ສາກົນໄດ້ເທື່ອລະກ້າວ.

 

 

Off

Comments are closed.