02nd Apr2021

ຮອງລັດຖະມົນຕີກະຊວງ ປກສ ນຳພາເອກອັກຄະລັດຖະທູດ ແລະ ອົງການຜູ້ຕ່າງໜ້າກະຊວງປ້ອງກັນຄວາມສະຫງົບ ຫວຽດນາມປະຈຳລາວ ເຂົ້າຊົມຫໍພິພິທະພັນ ປກສ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກໍາລັງ ປກສ ຄົບຮອບ 60 ປີ

by somchan

ໃນວັນທີ 2 ເມສາ 2021  ນີ້  ພົຕ ທອງເຫຼັກ ມັງຫນໍ່ເມກ ຮອງລັດຖະມົນຕີ ກະຊວງ ປກສ ພ້ອມດ້ວຍທ່ານ ຫງຽນ ບາຮຸ່ງ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາ ສປປ ລາວ ແລະ ຄະນະອົງການຜູ້ຕາງຫນ້າກະຊວງປ້ອງກັນຄວາມສະຫງົບຫວຽດນາມປະຈໍາ ລາວ ໄດ້ເຂົ້າຊົມຫໍພິພິທະພັນປ້ອງກັນຄວາມສະຫງົບ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກໍາລັງປ້ອງກັນຄວາມສະຫງົບ ທີ 5 ເມສາ ຄົບຮອບ 60 ປີ, ໂດຍການຕ້ອນຮັບຂອງ ພົຈວ ປອ ມາລາ ວິລະຈິດ ຫົວຫນ້າກົມຄົ້ນຄວ້າວິທະຍາສາດ ແລະ ປະຫວັດສາດ ກະຊວງປ້ອງກັນຄວາມສະຫງົບ, ການເຂົ້າຢ້ຽມຊົມຫໍມູນເຊື້ອໃນກຄັ້ງນີ້ວ່າ: ເພື່ອເປັນການສຶກສາຮຽນຮູ້ກ່ຽວກັບມູນເຊື້ອ, ຜົນງານ ການກຳເນີດ, ເຕີບໃຫຍ່ຂະຫຍາຍຕົວ ແລະ ການປະຕິບັດໜ້າທີ່ຂອງກຳລັງປ້ອງກັນຄວາມສະຫງົບປະຊາຊົນ; ກໍຄື ບັນດາມູນເຊື້ອ, ຜົນງານການພົວພັນຮ່ວມມືລະຫວ່າງກຳລັງປ້ອງກັນຄວາມສະຫງົບລາວ ແລະ ຫວຽດນາມ; ເພື່ອພ້ອມກັນປົກປັກຮັກສາ ແລະ ເສີມຂະຫຍາຍ; ພ້ອມທັງ ເປັນການປະກອບສ່ວນເຂົ້າໃນການປົກປັກຮັກສາ, ເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບແບບພິເສດ ແລະ ການຮ່ວມມືຮອບດ້ານ ລະຫວ່າງ 2 ພັກ-ລັດ ແລະ ປະຊາຊົນສອງຊາດລາວ-ຫວຽດນາມ ແລະ ຫວຽດນາມ-ລາວ ໃຫ້ຫມັ້ນຄົງ ແລະ ແໜ້ນແຟ້ນຍິ່ງໆຂຶ້ນ.

ໃນມື້ດຽວກັນນີ້ ຄະນະຮັບຜິດຊອບຫໍພິພິທະພັນປ້ອງກັນຄວາມສະຫງົບ ຍັງໄດ້ຕ້ອນຮັບການເຂົ້າຢ້ຽມຊົມຂອງ ຄະນະນະບໍລິຫານງານສູນກາງຊາວຫນຸ່ມປະຊາຊົນປະຕິວັດລາວ ນໍາໂດຍທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວຫນຸ່ມປະຊາຊົນປະຕິວັດລາວ, ພ້ອມດ້ວຍຄະນະຊາວຫນຸ່ມກົມສື່ມວນຊົນ ແລະ ຄະນະຊາວຫນຸ່ມກົມກິລາ ກົມໃຫຍ່ການເມືອງປ້ອງກັນຄວາມສະຫງົບ.

ເຊິ່ງການເຂົ້າຊົມຫໍພິພິທະພັນປ້ອງກັນຄວາມສະຫງົບຄັ້ງນີ້ ຄະນະຮັບຜິດຊອບໄດ້ອະທິບາຍ ແລະ ຍົກໃຫ້ເຫັນເຖິງການກໍາເນີດເຕີບໃຫຍ່ຂອງກໍາລັງປ້ອງກັນຄວາມສະຫງົບ ຕະຫຼອດໄລຍະ 60 ປີ, ໂດຍສະເພາະແມ່ນ ການອະທິບາຍບັນດາຮູບພາບ ແລະ ວັດຖຸພັນ ທີ່ນຳມາຈັດວາງສະແດງຢູ່ພາຍໃນຫໍພິພິທະພັນ; ເພື່ອສຶກສາ, ຄົ້ນຄວ້າ, ຮໍ່າຮຽນເອົາແບບຢ່າງທາງດ້ານຄຸນສົມບັດສິນທຳປະຕິວັດ ຂອງອາດີດພະນັກງານ-ນັກຮົບ, ນັກຮົບປະຕິວັດອາວຸໂສບຳນານ ແລະ ຄະນະພັກ-ຄະນະນຳ ກະຊວງປ້ອງກັນຄວາມສະຫງົບ ແຕ່ລະໄລຍະ ເພື່ອຫມູນໃຊ້ເຂົ້າໃນຊີວິດວຽກງານ ກໍຄື ການປະຕິບັດໜ້າທີ່ການເມືອງໃນໄລຍະໃຫມ່ໃຫ້ມີຜົນສຳເລັດ.

Off

Comments are closed.