08th Apr2021

ວິທະຍາຄານສັນຕິບານປະຊາຊົນ ປະກາດຍ້ອງຍໍໃຫ້ນາຍ ແລະ ພົນຕຳຫຼວດຜູ້ທີ່ມີຜົນງານດີເດັ່ນ ຜົນງານ 10 ປີ

by somchan

ວິທະຍາຄານສັນຕິບານປະຊາຊົນ ກະຊວງປ້ອງກັນຄວາມສະຫງົບ ຈັດພິທີປະກາດການຍ້ອງຍໍໃຫ້ນາຍ ແລະ ພົນຕຳຫຼວດ ວິທະຍາຄານສັນຕິບານປະຊາຊົນ ຜູ້ທີ່ມີຜົນງານດີເດັ່ນ ໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະທີ່ພັກ-ລັດ,ການຈັດຕັ້ງຂັ້ນເທິງ ແລະ ປະຊາຊົນ ມອບໝາຍໃຫ້ໃນໄລຍະຜ່ານມາ. ໃນວັນທີ 7 ເມສາ 2021 ນີ້ ພາຍໃຕ້ການເປັນປະທານຂອງ ພົຈວ ປອ ວັນສົມ ສີສົມບັດ ຄະນະພັກກະຊວງ ຫົວໜ້າອຳນວຍການວິທະຍາຄານສັນຕິບານປະຊາຊົນ ມີຄະນະພັກ-ຄະນະອຳນວຍການ ຄູ-ອາຈານ, ນາຍ ແລະ ພົນຕຳຫຼວດ,ພະນັກງານອາວຸໂສບຳບານເຂົ້າຮ່ວມ.

ພັທ ນາງ ບົວໄຂ ຄ້າຍບຸນໂທມ ຮອງຫົວໜ້າຫ້ອງການເມືອງ ວິທະຍາຄານສັນຕິບານປະຊາຊົນ ໄດ້ຜ່ານດຳລັດຂອງປະທານປະເທດ, ດຳລັດຂອງນາຍົກລັດຖະມົນຕີ, ຂໍ້ຕົກລົງຂອງລັດຖະມົນຕີກະຊວງປ້ອງກັນຄວາມສະຫງົບ ແລະ ຂໍ້ຕົກລົງຂອງຫົວໜ້າກົມໃຫຍ່ການເມືອງປ້ອງກັນຄວາມສະຫງົບ, ໃຫ້ນາຍ ແລະ ພົນຕຳຫຼວດ ວິທະຍາຄານສັນຕິບານປະຊາຊົນທີ່ມີຜົນງານດີເດັ່ນ ປະກອບສ່ວນດ້ານເຫືອແຮງ ແລະ ສະຕິປັນຍາ ເຂົ້າໃນການເຄື່ອນໄຫວວຽກງານວິຊາສະເພາະຕະຫຼອດ 10 ປີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຈຳນວນ 187 ສະຫາຍ ແລະ  5 ກົມກອງ.

ໃນນີ້ໄດ້ຮັບໃບຍ້ອງຍໍຂັ້ນຫຼຽນໄຊແຮງງານຊັ້ນ II ມີ 15 ສະຫາຍ ແລະ 7 ກົມກອງ, ຫຼຽນກາແຮງງານ 37 ສະຫາຍ ແລະ 5 ກົມກອງ ໄດ້ຮັບໃບຍ້ອງຍໍລັດຖະບານ 17 ສະຫາຍ, ໃບຍ້ອງຍໍກະຊວງປ້ອງກັນຄວາມສະຫງົບ 77 ສະຫາຍ ແລະ ໃບຍ້ອງຍໍຂອງກົມໃຫຍ່ການເມືອງປ້ອງກັນຄວາມສະຫງົບ  8 ສະຫາຍ ໃຫ້ກຽດປະດັບຫຼຽນໄຊແຮງງານ ຫຼຽນກາແຮງງານ, ໃບຍ້ອງຍໍລັດຖະບານ, ໃບຍ້ອງຍໍກະຊວງ ປກສ ແລະ ໃບຍ້ອງຍໍກົມໃຫຍ່ການເມືອງ ປກສ ໃນຄັ້ງນີ້ຢ່າງສົມກຽດ ໂດຍ ພົຈວ ປອ ວັນສົມ ສີສົມບັດ ຄະນະພັກກະຊວງ ຫົວໜ້າອຳນວຍການ ສັນຕິບານປະຊາຊົນ.

Off

Comments are closed.