09th Apr2021

ກອງບັນຊາການ ປກສ ແຂວງສະຫວັນນະເຂດ ຮັບການອວຍພອນ ເນື່ອງໃນໂອກາດວັນສ້າງຕັ້ງກໍາລັງ ປກສ ຄົບຮອບ 60 ປີ

by somchan

ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 60 ປີ (5/4/1961-5/4/2021 ) ແລະ ປີໃຫມ່ລາວທີ່ຈະຫນູນວຽນມາອີກໃນວາລະຫນຶ່ງ ທີ່ເຕັມໄປດ້ວຍຄວາມຫມາຍຄວາມສຳຄັນ ແລະ ມີເນື້ອໃນອັນເລິກເຊິ່ງ ມາໃນວັນທີ 7 ເມສາ 2021 ນີ້ ຢູ່ທີ່ຫ້ອງປະຊຸມຂອງດ່ານສາກົນແດນສະຫວັນ ແຂວງ ສະຫວັນນະເຂດ ພັນເອກ ສົມຫມາຍ ພົມມະຈັນ ຫົວຫນ້າກອງບັນຊາການ ປກສ ແຂວງ ສະຫວັນນະເຂດ ພ້ອມດ້ວຍຄະນະ ໄດ້ຕ້ອນຮັບການມາ ອວຍພອນ ຂອງຄະນະຜູ້ແທນກອງບັນຊາການຕໍາຫຼວດ ແລະ ກອງບັນຊາການທະຫານຊາຍແດນ ແຂວງ ກວາງຈິ ສສ ຫວຽດນາມ, ນໍາໂດຍ ພັນເອກ ຫງຽນວັນແທງ ຫົວຫນ້າກອງບັນຊາການຕໍາຫຼວດ ແຂວງກວາງຈິ ພ້ອມດ້ວຍຄະນະ ແລະ ພັນເອກ ເລວັນເຟືອງ ຫົວຫນ້າບັນຊາການ ທະຫານຊາຍແດນ ແຂວງກວາງຈິ ພ້ອມດ້ວຍຄະນະ

ໃນໂອກາດນີ້ ຄະນະຜູ້ແທນ ກອງບັນຊາການຕຳຫຼວດ ແລະ ຄະນະຜູ້ແທນກອງບັນຊາການທະຫານຊາຍແດນ ແຂວງກວາງຈິ ສສ ຫວຽດນາມ, ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະໄຊຊະນະ ທີ່ກໍາລັງ ປກສ ຍາດມາໄດ້: ຕະຫຼອດໄລຍະ 60 ປີຜ່ານມາ ແລະ ເຫັນໄດ້ການພົວພັນຮ່ວມມືລະຫວ່າງສອງພັກ-ລັດ ເວົ້າລວມ, ເວົ້າສະເພາະ ສອງກໍາລັງປ້ອງກັນຄວາມສະຫງົບລາວ, ຕໍາຫຼວດ ແລະ ທະຫານຊາຍແດນ ສສ ຫວຽດນາມ, ໃນການພົວພັນຮ່ວມມືມິດຕະພາບ, ຄວາມສາມັກຄີແບບພິເສດ, ການພົວພັນຮ່ວມມືຮອບດ້ານ, ພ້ອມນີ້, ທ່ານຍັງໄດ້ສະແດງຄໍາອວຍພອນໄຊອັນປະເສີດ ໃຫ້ການນໍາພັກລັດ, ກໍ່ຄືການນໍາກອງບັນຊາການ ປກສ ແຂວງ ສະຫວັນນະເຂດ ແລະ ພະນັກງານ-ນັກຮົບ ໃນກໍາລັງປ້ອງກັນຄວາມສະຫງົບຈົ່ງມີຄວາມເຂັ້ມແຂງ, ມີຄວາມຜາສຸກໃນຄອບຄົວ ແລະ ມີຜົນສໍາເລັດໃນຫນ້າທີ່ວຽກງານ ສືບຕໍ່ຊີ້ນໍາ-ນໍາພາ ກໍາລັງ ປກສ ໃຫ ເຕີບໃຫຍ່ເຂັ້ມແຂງຂຶ້ນໄປເລື່ອຍໆງ. ພ້ອມນີ້ ພັອ ສົມຫມາຍ ພົມມະຈັນ, ຫົວຫນ້າກອງບັນຊາການ ປກສ ແຂວງ ສະຫວັນນະເຂດ ໄດ້ສະແດງຄວາມຂອບໃຈ ມາຍັງສອງຄະນະຜູ້ແທນ ກອງບັນຊາການຕໍາຫຼວດ ແລະ ຄະນະຜູ້ແທນ ກອງບັນຊາການທະຫານຊາຍແດນແຂວງ ກວາງຈິ ທີ່ໄດ້ເຂົ້າອວຍພອນພ້ອມຄະນະໃນເທື່ອນີ້ ພ້ອມທັງອວຍພອນໃຫ້ທັງສອງຄະນະ ຈົ່ງມີສຸຂະພາບແຂງແຮງ ສຸກກາຍສະບາຍໃຈ ພ້ອມກັນສືບຕໍ່ເຮັດຫນ້າທີ່ທີ່ພັກ-ລັດມອບຫມາຍໃຫ້ ແລະ ຫັດແຫນ້ນຄວາມສາມັກຄີລະຫວ່າງສອງພັກ ສອງກໍາລັງໃຫ້ເພີ່ມຂຶ້ນໄປເລື້ອຍໆ.

 

Off

Comments are closed.