16th Apr2021

ບົດຖະແຫຼງຂ່າວພິເສດຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ວັນສຸກ ວັນທີ 16 ເມສາ ປີ 2021

by somchan

ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19,ໄດ້ຖະແຫຼງຂ່າວພິເສດຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ ເກີດຈາກເຊື້ອຈຸລະໂລກສາຍພັນໃໝ່ COVID-19 ໃນວັນສຸກ ວັນທີ 16 ເມສາ 2021 ວ່າ: ການເຝົ້າລະວັງ COVID-19 ຢູ່ ສປປ ລາວ ເຊັ່ນ: ການຕິດຕາມຜູ້ຖືກຈຳກັດບໍລິເວນ ຢູ່ໃນສະຖານທີ່ ທີ່ກຳນົດໄວ້ ໃນຂອບເຂດທົ່ວປະເທດ ປະຈຸບັນ ທົ່ວປະເທດ ມີສູນຈໍາກັດບໍລິເວນທີ່ຍັງເປີດນຳໃຊ້ຢູ່ ທັງໝົດ 41 ສູນ, ຜູ້ທີ່ຍັງສືບຕໍ່ຈຳກັດບໍລິເວນ

ມີ 3,741 ຄົນ, ທຸກຄົນແມ່ນໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19. ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 15 ເມສາ 2021 ໄດ້ເກັບຕົວຢ່າງມາກວດວິເຄາະທັງໝົດ 1,155 ຄົນ; ຜົນກວດວິເຄາະທັງໝົດ ແມ່ນພົບຜູ້ຕິດເຊື້ອໃໝ່ 1 ຄົນ ຄືກໍລະນີຢັ້ງຢືນທີ 54 ເປັນເພດຊາຍ, ອາຍຸ: 32 ປີ, ສັນຊາດ: ລາວ, ອາຊີບ: ຂາຍຜັກຢູ່ເຂດລາດພ້າວ, ປະເທດໄທ. ຄອບຄົວຜູ້ກ່ຽວ ມີທັງໝົດ 8 ຄົນ. ສະພາບໂດຍລວມ ຜູ້ກ່ຽວບໍ່ມີພະຍາດປະຈໍາຕົວ ແລະ ເປັນຄົນມີສຸຂະພາບແຂງແຮງ.
ຄື ວັນທີ 11 ເມສາ 2021 ຜູ້ກ່ຽວເດີນທາງ ມາ ສປປ ລາວ ໂດຍຂື້ນລົດທົວຈາກລາດພ້າວ, ປະເທດໄທ ເວລາ 23:00 ໂມງ ແລະ ລັກລອບຂ້າມມາທາງດ່ານປະເພນີປາກສະພານ, ເມືອງລະຄອນເພັງ, ແຂວງສາລະວັນ ໂດຍເຮືອຫາງຍາວ ພ້ອມດ້ວຍໝູ່ 1 ຄົນ ເຊິ່ງເປັນເພດຍິງໄວກາງຄົນ, ພ້ອມດຽວກັນ ກໍ່ມີຄົນມາຮັບເອົາພວກກ່ຽວຢູ່ດ່ານ ດ້ວຍລົດຮູນໃດ ບໍ່ຮູ້ທະບຽນລົດ ແລະ ມານອນພັກຢູ່ເຮືອນເຈົ້າຂອງລົດ. ວັນທີ 12 ເມສາ 2021 ເວລາ 3:00 ໂມງເຊົ້າ ເຈົ້າຂອງລົດຮູນໃດ ໄດ້ຂັບລົດມາສົ່ງພວກກ່ຽວ ຢູ່ເມືອງຄົງເຊໂດນ. ເວລາ 4:00 ໂມງເຊົ້າ ເມຍຂອງກໍລະນີທີ 54 ໄດ້ມາຮັບເອົາຜູ້ກ່ຽວກັບບ້ານນາເຕີຍ, ເມືອງຄົງເຊໂດນ, ແຂວງສາລະວັນ. ເວລາ 4: 00 ໂມງເຊົ້າ ຜູ້ຮ່ວມເດີນທາງ ທີ່ເປັນເພດຍິງໄວກາງຄົນ ໄດ້ຂຶ້ນລົດໂດຍສານ ຈາກເມືອງຄົງເຊໂດນ ມຸ່ງໜ້າສູ່ຫຼັກ 35 ແຂວງສະຫວັນນະເຂດ ເຊິ່ງບໍ່ຮູ້ທະບຽນ ແລະ ປະເພດລົດໂດຍສານ. ວັນທີ 13 ເມສາ 2021 ນາຍບ້ານພົບວ່າຜູ້ກ່ຽວ ຫຼື ກໍລະນີຜູ້ຕິດເຊື້ອທີ 54ໄດ້ລັກລອບເຂົ້າມາ ຈຶ່ງໄດ້ນຳສົ່ງໄປຈຳກັດ ບໍລິເວນຢູ່ສູນໂຄກສະຫວາດ, ເມືອງຄົງເຊໂດນ. ວັນທີ 14 ເມສາ 2021 ໄດ້ເກັບຕົວຢ່າງສົ່ງກວດໂຮງໝໍແຂວງຈຳປາສັກ. ວັນທີ 15 ເມສາ 2021 ຜົນກວດພົບເຊື້ອ COVID-19 ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ປິ່ນປົວຢູ່ໂຮງໝໍແຂວງສາລະ
ວັນ. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 32 ຄົນ, ໄດ້ເກັບຕົວຢ່າງມາກວດວິເຄາະ, ປະຈຸບັນ ແມ່ນຍັງລໍຖ້າຜົນກວດ. ພ້ອມດຽວກັນນັ້ນ ຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ.
– ດັ່ງນັ້ນ, ຈຶ່ງຮຽກຮ້ອງໃຫ້ຜູ້ເດີນທາງຮ່ວມນຳກໍລະນີ 54 ທີ່ເປັນເພດຍິງໄວກາງຄົນ ທີ່ໄດ້ຂີ່ເຮືອຫາງຍາວລັກລອບຂ້າມມາຈາກປະເທດໄທນຳກັນ ເຊິ່ງໃນວັນທີ 12 ເມສາ 2021 ຜູ້ກ່ຽວ ໄດ້ຂຶ້ນລົດໂດຍສານ ຈາກຄົງເຊໂດນ ມຸ່ງໜ້າສູ່ຫຼັກ 35 ແຂວງສະຫວັນນະເຂດ ຮຽກຮ້ອງໃຫ້ຮີບຮ້ອນໄປພົບອຳນາດການປົກຄອງທ້ອງຖິ່ນ ຫຼື ເຈົ້າໜ້າທີ່ສາທາລະນະສຸກ ເພື່ອຈະໄດ້ເກັບຕົວຢ່າງກວດຫາເຊື້ອ, ປ້ອງກັນບໍ່ໃຫ້ໄປແຜ່ເຊື້ອສູ່ຄົນອ້ອມຂ້າງ ແລະ ຄົນໃນຄອບຄົວຂອງທ່ານ. ສະເພາະ ລົດໂດຍສານ ທີ່ເດີນທາງຈາກເມືອງຄົງເຊໂດນ ຫາ ຫຼັກ 35 ແຂວງສະຫວັນນະເຂດ ນັ້ນ ສະເໜີໃຫ້ໄປຮີບຮ້ອນ ເຂົ້າພົບເຈົ້າໜ້າທີ່ສາທາລະນະສຸກ ເພື່ອເກັບຕົວຢ່າງກວດຫາເຊື້ອ. ສຳລັບ ເຈົ້າຂອງລົດຮູນໃດ ທີ່ໄດ້ຮັບພວກກ່ຽວ 2 ຄົນໃນມື້ດ່ັງກ່າວ ແລະ ໃຫ້ໄປພັກຢູ່ເຮືອນຂອງຕົນ ສະເໜີໃຫ້ໄປຮີບຮ້ອນພົບເຈົ້າໜ້າທີ່ສາທາລະນະສຸກ ຫຼື ອຳນາດການປົກຄອງທ້ອງຖິ່ນ ເພື່ອເກັບຕົວຢ່າງຊອກຫາເຊື້ອ.
ສຳລັບ ການຕິດຕາມປີ່ນປົວຄົນເຈັບຢູ່ໂຮງໝໍ ປະຈຸບັນ, ຄົນເຈັບຕິດເຊື້ອໂຄວິດ-19 ຍັງນອນຕິດຕາມປິ່ນປົວຢູ່ໂຮງໝໍ ຈຳນວນ 05 ຄົນ, ໃນນັ້ນ ຢູ່ໂຮງໝໍມິດຕະພາບ ນະຄອນຫຼວງວຽງຈັນ 3 ຄົນ, ໂຮງຫມໍແຂວງແຂວງຈຳປາສັກ 1 ຄົນ ແລະ ໂຮງຫມໍແຂວງສາລະວັນ 1 ຄົນ, ທຸກຄົນ ແມ່ນມີສຸຂະພາບຮ່າງກາຍ ຈິດໃຈສົມບູນ ແລະ ແຂງແຮງດີ.
ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຍັງໄດ້ກ່າວອີກວ່າ: ມື້ນີ້ແມ່ນເປັນມື້ປີໃໝ່ລາວ ດັ່ງນັ້ນ ການສະເຫຼີມສະຫຼອງບຸນປີໃໝ່ລາວ ກໍ່ຂໍໃຫ້ບັນດາທ່ານ ສະເຫຼີມສະຫຼອງດ້ວຍຄວາມລະມັດລະວັງ, ຫຼີກລ້ຽງເຂົ້າຮ່ວມງານສັງສັນທີ່ມີຜູ້ຄົນແອອັດຫຼາຍ, ເຊິ່ງມີຄວາມສ່ຽງ ຕໍ່ການຕິດເຊື້ອພະຍາດດັ່ງກ່າວ , ໃນສະພາບປະຈຸບັນ ເຫັນວ່າໃນໂລກ ແລະ ປະເທດອ້ອມຂ້າງ ຍັງມີກໍລະນີໃໝ່ທຸກມື້ ພວກເຮົາທຸກຄົນ ຈົ່ງພ້ອມໃຈກັນປະຕິບັດມາດຕະການທີ່ວາງອອກ ຢ່າງເຂັ້ມງວດ ເພື່ອປ້ອງກັນໂຕເອງ ຄົນອ້ອມຂ້າງ ແລະ ປະຊາຊົນລາວທຸກຄົນ ຈາກພະຍາດ ໂຄວິດ-19;
ຖ້າຫາກທ່ານໃດ ຮູ້ສຶກບໍ່ສະບາຍ ໃຫ້ທ່ານໄປພົບແພດທັນທີ ເພື່ອຊອກຫາສາເຫດ ແລະ ຮັບການປິ່ນປົວ ຫຼື ຖ້າພົບເຫັນ ກຸ່ມຄົນທີ່ມີອາການ ໄຂ້, ໄອ ຕ້ອງລາຍງານແກ່ສະຖານທີ່ບໍລິການສາທາລະນະສຸກທັນທີ ເພື່ອເກັບຕົວຢ່າງ ມາກວດຊອກຫາເຊື້ອໂຄວິດ-19; ຮຽກຮ້ອງໃຫ້ອົງການປົກຄອງທ້ອງຖິ່ນ ເອົາໃຈໃສ່ເຝົ້າລະວັງ ຕາມຈຸດຜ່ານແດນທ້ອງຖິ່ນ ແລະ ດ່ານຂ້າມລອຍ ຢ່າງເຄັ່ງຄັດ ໂດຍສະເພາະແມ່ນ ການລັກລອບເຂົ້າເມືອງ ແບບບໍ່ຖືກລະບຽບຫຼັກການ ເຊິ່ງອາດມີຄວາມສ່ຽງໃນການນຳເອົາເຊື້ອພະຍາດເຂົ້າມາໃນປະເທດ;
ສຳລັບ ສະພາບການລະບາດຂອງພະຍາດ COVID-19 ຢູ່ໃນທົ່ວໂລກ ປະຈຸບັນ ມີການລາຍງານການລະບາດຂອງພະຍາດ COVID-19 ທັງໝົດ 219 ປະເທດ, ຜູ້ຕິດເຊື້ອສະສົມ 139,625,295 ຄົນ, ເສຍຊິວິດສະສົມ 2,997,766 ຄົນ ແລະ ປີ່ນປົວຫາຍດີ 118,667,492 ຄົນ; ປະເທດອາເມຣິກາ ຍັງເປັນອັນດັບໜຶ່ງ ມີຜູ້ຕິດເຊື້ອສະສົມຫຼາຍກວ່າຫມູ່ ຄື 32,220,316 ຄົນ ແລະ ເສຍຊີວິດສະສົມ 578,964 ຄົນ; ອັນດັບສອງ ແມ່ນປະເທດ ອິນເດຍ ມີຜູ້ຕິດເຊື້ອສະສົມ 14,287,740 ຄົນ ແລະ ເສຍຊີວິດສະສົມ 174,335 ຄົນ; ສຳລັບບັນດາປະເທດອາຊຽນ ຄື ປະເທດອິນໂດເນເຊຍ ມືຜູ້ຕິດເຊື້ອສູງອັນດັບ 1 ຂອງອາຊຽນ ມີຜູ້ຕິດເຊື້ອສະສົມ 1,5 ລ້ານຄົນ, ຖັດລົງມາແມ່ນປະເທດ ຟີລິບປິນ, ມາເລເຊຍ, ມຽນມ້າ ຕາມລຳດັບ; ສຳລັບສະພາບການແຜ່ລະບາດຂອງພະຍາດໂຄວິດ-19 ຢູ່ປະເທດອ້ອມຂ້າງ ສປປ ລາວ ມີ ປະເທດໄທ: ມີລາຍງານການລະບາດພາຍໃນປະເທດຮອບໃໝ່ ໃນເດືອນເມສາ ເຊິ່ງມີລາຍງານໃນແຕ່ລະວັນເພິ່ມສູງຂຶ້ນຫຼາຍຮ້ອຍຄົນຕໍ່ມື້, ສຳລັບ ມື້ວານນີ້ ມີຈຳນວນຜູ້ຕິດເຊື້ອໃໝ່ 1,543 ຄົນ ແລະ ບໍ່ມີເສຍຊີວິດເພິ່ມ; ກຳປູເຈຍ: ມີລາຍງານຜູ້ຕິດເຊື້ອໃໝ່ 344 ຄົນ ແລະ ເສຍຊີວິດ 1 ຄົນ ສປ ຈີນ: ຕິດເຊື້ອໃໝ່ 09 ຄົນ, ບໍ່ມີຜູ້ເສຍຊີວິດ; ສສ ຫວຽດນາມ: ມີກໍລະນີຕິດເຊື້ອໃໝ່ 10 ຄົນ, ບໍ່ມີຜູ້ເສຍຊີວີດ ແລະ ມ້ຽນມາ: ມີກໍລະນີຕິດເຊື້ອໃໝ່ 5 ຄົນ ແລະ ບໍ່ມີລາຍງານຜູ້ເສຍຊີວິດ.

Off

Comments are closed.