17th Apr2021

ບົດຖະແຫຼງຂ່າວພິເສດ ຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດ​ອັກ​ເສບ​ປອດ​ທີ່​ເກີດ​ຈາກ​ເຊື້ອຈຸລະ​ໂລກ​ສາຍ​ພັນໃໝ່ COVID-19 ປະຈໍາວັນເສົາ ວັນທີ 17 ເມສາ 2021

by somchan


ຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ໄດ້ຕາງໜ້າກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19, ຖະແຫຼງຂ່າວປະຈຳມື້ວັນເສົາ ວັນທີ 17 ເມສາ 2021ວ່າ:      

ການເຝົ້າລະວັງ COVID-19 ຢູ່ ສປປ ລາວ ປະຈຸບັນ ທົ່ວປະເທດ ມີສູນຈໍາກັດບໍລິເວນທັງໝົດ 41 ສູນ,​ ມີຜູ້ຈຳກັດບໍລິເວນທັງໝົດ 3,643 ຄົນ, ທຸກຄົນແມ່ນໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19. ສະເພາະ ໃນວັນທີ 16 ເມສາ 2021 ໄດ້ເກັບຕົວຢ່າງມາກວດວິເຄາະທັງໝົດ 369 ຄົນ; ຜົນກວດວິເຄາະທັງໝົດ ແມ່ພົບຜູ້ຕິດເຊື້ອໃໝ່ 4 ຄົນ, ຄື: ກໍລະນີຢັ້ງຢືນທີ 55 ເປັນເພດຍິງ, ອາຍຸ: 25 ປີ, ສັນຊາດ: ລາວ, ອາຊີບ: ແມ່ບ້ານ ເຮັດວຽກຢູ່ບາງກອກ ປະເທດໄທ.  ຄອບຄົວ: ມີລູກສາວ ອາຍຸ 1 ປີ 10​ ເດືອນ ແລະ ຜົວ ຍັງເຮັດວຽກຢູ່ຮ້ານອາຫານຢູ່ບາງກອກ.  ທີ່ຢູ່ປະຈຸບັນ: ເມືອງຫີນບູນ, ແຂວງຄຳມ່ວນ. ປະຫວັດການເຄື່ອນໄຫວ: ວັນທີ 14ເມສາ 2021 ຜູ້ກ່ຽວ ແລະ ລູກສາວ ໄດ້ຂື້ນລົດໂດຍສານຢູ່ບາງກອກປະເທດໄທ, ມີຜູ້ໂດຍສານທັງໝົດ 9 ຄົນ ມາສະຖານີຂົນສົ່ງ ນະຄອນພະນົມ. ມາຮອດ ສປປ ລາວ ຜ່ານດ່ານ ຂົວມິດຕະພາບແຫ່ງທີ 3ເຂົ້າມາຖືກຕາມລະບຽບຫຼັກການ ແລະ ຖືກຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ໃນ  ເມືອງທ່າແຂກ. ວັນທີ 15 ເມສາ 2021, ໄດ້ຖືກເກັບຕົວຢ່າງມາກວດຢູ່ໂຮງໝໍແຂວງຄຳມ່ວນ ແລະ ຜູ້ກ່ຽວເລີ່ມມີໄຂ້ ແທກອຸນຫະພູມໄດ້ 37.9 ອົງສາ ຈຶ່ງໄດ້ກິນຢາປາຣາຫຼັງຈາກນັ້ນອາການດີຂຶ້ນ. ຮອດວັນທີ 16 ເມສາ 2021 ຜົນກວດວິເຄາະ ພົບເຊື້ອ COVID-19 .ປະຈຸບັນ ຜູ້ກ່ຽວເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວ ຢູ່   ສະຖານທີ່ປິ່ນປົວ ທີ່ທາງແຂວງກຳນົດໄວ້. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 4 ຄົນ,​ ໄດ້ເກັບຕົວຢ່າງມາກວດວິເຄາະ, ປະຈຸບັນ ແມ່ນຍັງລໍຖ້າຜົນກວດ. ພ້ອມດຽວກັນນັ້ນ ຍັງໄດ້ສືບຕໍ່ເຝົ້າລະວັງ, ດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ. ກໍລະນີຢັ້ງຢືນທີ 56ເປັນເພດຊາຍ,​ ອາຍຸ: 32 ປີ, ສັນຊາດ: ລາວ, ອາຊີບ:​ ພະນັກງານຂາຍເຄື່ອງນອນ ຢູ່ແຖວວົງວຽນໃຫຍ່, ຖະໜົນຈັກກະເພັດພາອຸລັດ,​ ບາງກອກ, ປະເທດໄທ. ກ່ອນເດີນທາງເຂົ້າມາ ສປປ ລາວ ບໍ່ໄດ້ກວດຊອກຫາເຊື້ອ COVID-19. ປະຫວັດການເຄື່ອນໄຫວ ວັນທີ 7 ເມສາ 2021 ອອກເດີນທາງຈາກ ບາງກອກ, ປະເທດໄທ ດ້ວຍລົດໂດຍສານຈາກສະຖານີໝໍຊິດ ເວລາ 19:00​ ໂມງ, ຕະຫຼອດໄລຍະການເດີນທາງ ຜູ້ກ່ຽວໃສ່ຜ້າອັດປາກ-ດັງ ຕະຫຼອດເວລາ. ວັນທີ 8 ເມສາ 2021 ເດີນທາງມາຮອດ ແຂວງມຸກດາຫານ ເວລາ 5:00​ ໂມງເຊົ້າ ມີຜູ້ໂດຍສານຮ່ວມເດີນທາງທັງໝົດ 32 ຄົນ. ຂ້າມດ່ານ ຂົວມິດຕະພາບແຫ່ງທີ​ 2 ແລະ ມາຮອດ ແຂວງສະຫວັນນະເຂດ ເວລາ​ 8:00​ ໂມງເຊົ້າ, ເຂົ້າມາຖືກຕາມລະບຽບຫຼັກການ; ພ້ອມດຽວກັນ ກໍ່ຖືກສົ່ງເຂົ້າສູນຈຳກັດບໍລິເວນທີ່ຄະນະສະເພາະກິດກຳນົດໄວ້ ໃນນະຄອນໄກສອນ. ຜູ້ກ່ຽວຮູ້ສຶກເຈັບຫົວ ແລະ ໄດ້ກິນຢາປາຣາ, ຫຼັງຈາກນັ້ນອາການດີຂຶ້ນ. ໄດ້ຖືກເກັບຕົວຢ່າງກວດຫາເຊື້ອ, ຜົນກວດແມ່ນ ບໍ່ພົບເຊື້ອ COVID-19. ວັນທີ 14 ເມສາ 2021  ຜູ້ກ່ຽວໄດ້ຈ້າງລົດສາມລໍ້ ເພື່ອໄປຂຶ້ນລົດຢູ່ຄິວລົດໂດຍສານ ປະຈຳແຂວງສະຫວັນນະເຂດ ເພື່ອໄປປາກຊ່ອງ, ມີຄົນນັ່ງໃນລົດນຳກັນ 4 ຄົນ​,ໃນນັ້ນ 1 ຄົນ ຢູ່ເມືອງສອງຄອນ, ທີ່ເຫຼືອບໍ່ຮູ້ວ່າມາຈາກເມືອງໃດ.  ຫຼັງຈາກຮອດຄິວລົດປາກຊ່ອງ ຫຼານຜູ້ກ່ຽວໄດ້ມາຮັບເອົາ, ຫຼັງຈາກຮອດເຮືອນໄດ້ປະມານ 1 ຊົ່ວໂມງ ຜູ້ກ່ຽວຮູ້ສຶກໄຂ້ ຈຶ່ງກິນຢາປາຣາໃສ່. ໃນໄລຍະຢູ່ເຮືອນ ມີຄົນມາຫາ 3 ຄົນ ແລະ ໄດ້ກິນເຂົ້າຮ່ວມກັນ. ຮອດວັນທີ 15 ເມສາ 2021 ຈິ່ງມີໄຂ້ ແລະ ໄອ ຈຶ່ງເຂົ້າກວດຢູ່ໂຮງໝໍສອງຄອນ, ຖືກແຍກປ່ຽວ ແລະ ຕິດອາການ. ໃນວັນທີ 16 ເມສາ 2021 ໄດ້ຖືກເກັບຕົວຢ່າງກວດຊອກຫາເຊື້ອອີກຄັ້ງ, ຜົນກວດວິເຄາະ ພົບເຊື້ອ COVID-19; ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍແຂວງສະຫວັນນະເຂດ. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 8 ຄົນ,​ ໄດ້ເກັບຕົວຢ່າງມາກວດວິເຄາະ, ປະຈຸບັນ ແມ່ນຍັງລໍຖ້າຜົນກວດ. ພ້ອມດຽວກັນນັ້ນ ຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ. ກໍລະນີຢັ້ງຢືນທີ 57 ເປັນເພດຊາຍ, ອາຍຸ 24 ປີ, ສັນຊາດ: ລາວ, ເຮັດວຽກຢູ່ຮ້ານອາຫານ ຢູ່ເຂດລາມກຳແຫງລາດພ້າວ, ປະເທດໄທ.  ທີ່ຢູ່ປະຈຸບັນ: ເມືອງສອງຄອນ, ແຂວງສະຫວັນນະເຂດ;  ກ່ອນເດີນທາງເຂົ້າມາ ສປປ ລາວ ບໍ່ໄດ້ກວດຊອກຫາເຊື້ອCOVID-19. ປະຫວັດການເຄື່ອນໄຫວ ວັນທີ 14 ເມສາ 2021 ເວລາ​ 19:00 ໂມງ ເດີນທາງອອກຈາກບາງກອກ, ປະເທດໄທ ພ້ອມດ້ວຍໝູ່ 1 ຄົນ  (ເປັນຄົນແຂວງສະຫວັນນະເຂດ) ດ້ວຍລົດໂດຍສານ ຢູ່ສະຖານີລົດໝໍຊິດ, ມີຜູ້ໂດຍສານຮ່ວມເດີນທາງ 28 ຄົນ. ວັນທີ 15 ເມສາ 2021 ມາຮອດມຸກດາຫານ ເວລາ 06:30 ​ ແລະ ຂ້າມດ່ານມາແຂວງສະຫວັນນະເຂດ, ເຂົ້າມາຖືກຕາມລະບຽບຫຼັກການ. ຜູ້ກ່ຽວມີອາການໄອ, ເຈັບຄໍ ແລະ ກິນອາຫານບໍ່ຮູ້ລົດຊາດ. ໄດ້ເກັບຕົວຢ່າງກວດຫາເຊື້ອ ແລະ ຖືກສົ່ງໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ ໃນນະຄອນໄກສອນ, ວັນທີ 16 ເມສາ 2021  ຜົນກວດວິເຄາະ ພົບເຊື້ອ COVID-19; ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍແຂວງສະຫວັນນະເຂດ. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 20 ຄົນ,​ ໄດ້ເກັບຕົວຢ່າງມາກວດວິເຄາະ, ຜົນກວດທັງໝົດ ແມ່ນບໍ່ພົບເຊື້ອ. ພ້ອມດຽວກັນ ຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ. ກໍລະນີຢັ້ງຢືນທີ 58ເປັນເພດຍິງ, ອາຍຸ: 25 ປີ, ສັນຊາດ:​ລາວ, ອາຊີບ: ແມ່ບ້ານ ເຮັດວຽກຢູ່ເມືອງສີລາຊາ, ແຂວງຊົນບູລີ, ປະເທດໄທ.  ທີ່ຢູ່ປະຈຸບັນ: ເມືອງບໍລິຄັນ, ແຂວງບໍລິຄຳໄຊ. ປະຫວັດການເຄື່ອນໄຫວ ວັນທີ 6 ເມສາ 2021ໄດ້ຂຶ້ນຍົນຈາກສະໜາມບິນສົງຂາ ມາຫາ ສະໜາມບິນອຸດອນ. ແລ້ວໄດ້ຂຶ້ນລົດແທັກຊີ, ໃນລົດມີທັງຫມົດ 4 ຄົນ, ຫຼັງຈາກນັ້ນ ໄລຍະ ວັນທີ 6-13 ເມສາ 2021 ໄດ້ ພັກຢູ່ລີສອດບຶງການ,​ ປະເທດໄທ; ໃນວັນທີ 14 ເມສາ 2021  ຜູ້ກ່ຽວໄດ້ໃຫ້ພີ່ນ້ອງເອົາລົດສ່ວນຕົວມາສົ່ງຂຶ້ນເຮືອ, ເວລາ 06:00 ໂມງ ຜູ້ກ່ຽວມາຂຶ້ນເຮືອຢູ່ເຂດບຶງການ ໂດຍມີຜູ້ຂັບເຮືອຈາກຝັ່ງລາວ ຂ້າມໄປຮັບ ເພື່ອມາສົ່ງຢູ່ເຂດເມືອງປາກກະດິງ. ເວລາ 8:00 ໂມງ ເມຍຂອງຜູ້ຂັບເຮືອ ຂີ່ລົດຈັກມາຮັບເອົາຜູ້ກ່ຽວ ໄປພັກຢູ່ເຮືອນຂອງຕົນຊົ່ວຄາວ. ຫຼັງຈາກນັ້ນ ຜູ້ກ່ຽວ ກໍ່ໄດ້ຂຶ້ນລົດວີໂກ້ນຳເຈົ້າຂອງເຮືອ ໂດຍມີລູກເຈົ້າຂອງເຮືອ ອາຍຸ 4 ປີນັ່ງໄປນຳ ແລະ ໄດ້ໄປສົ່ງຜູ້ກ່ຽວຮອດ ເມືອງບໍລິຄັນ ເຊິ່ງມີພໍ່ຜູ້ກ່ຽວ ຂີ່ລົດຈັກມາລໍຖ້າ ແລະ ພາໄປສູນຈຳກັດບໍລິເວນທີ່ຄະນະສະເພາະກິດກຳນົດໄວ້. ວັນທີ 15 ເມສາ 2021 ໄດ້ຖືກເກັບຕົວຢ່າງກວດຫາເຊື້ອ ວັນທີ 16 ເມສາ 2021  ຜົນກວດວິເຄາະ ພົບເຊື້ອ COVID-19; ປະຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍແຂວງບໍລິຄຳໄຊ. ສຳລັບກຸ່ມສໍາຜັດໃກ້ຊິດ ໃນເບື້ອງຕົ້ນ ມີ 04 ຄົນ,​ ໄດ້ເກັບຕົວຢ່າງມາກວດວິເຄາະ, ປະຈຸບັນຍັງລໍຖ້າຜົນກວດ. ພ້ອມດຽວກັນ ຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ.

ສະຫຼຸບລວມແລ້ວ ນັບແຕ່ຕົ້ນເດືອນ ມັງກອນ 2020 ມາເຖິງ ວັນທີ 17 ເມສາ 2021 ຢູ່ ສປປ ລາວ ມີຜູ້ຕິດເຊື້ອໂຄວິດ-19 ຈໍານວນ 58 ຄົນ, ໃນນີ້ ມີຜູຕິດເຊື້ອໃຫມ່ 4 ຄົນ ຄື: ຢູ່ແຂວງສະຫວັນນະເຂດ 2 ຄົນ, ແຂວງຄຳມ່ວນ 1 ຄົນ ແລະ ແຂວງບໍລິຄຳໄຊ 1 ຄົນ; ປະຈຸບັນຄົນເຈັບຕິດເຊື້ອໂຄວິດ-19 ຍັງນອນຕິດຕາມປິ່ນປົວຢູ່ໂຮງໝໍ ມີຈຳນວນທັງຫມົດ 9 ຄົນ,​ ໃນນັ້ນ: ູ່ນະຄອນຫຼວງວຽງຈັນ 3 ຄົນ, ແຂວງຈຳປາສັກ 1 ຄົນ, ແຂວງສາລະວັນ 1​ ຄົນ, ແຂວງສະຫວັນນະເຂດ 2 ຄົນ, ແຂວງຄຳມ່ວນ 1 ຄົນ ແລະ ແຂວງບໍລິຄຳໄຊ 1 ຄົນ; ເຊິ່ງທຸກຄົນ ແມ່ນມີສຸຂະພາບຮ່າງກາຍ ຈິດໃຈສົມບຸນ ແລະ ແຂງແຮງດີ.

ດຣ. ຣັດຕະນະໄຊ ເພັດສຸວັນ ຍັງໄດ້ກ່າວອີກວ່າ: ຈໍານວນຜູ້ຕິດເຊື້ອໃຫມ່ທັງໝົດ 4 ຄົນ, ລ້ວນແຕ່ແມ່ນແຮງງານລາວທີ່ເຂົ້າມາ ສປປລາວ ໃນໄລຍະປີໃໝ່ ຈາກປະເທດເພື່ອນບ້ານ ທີ່ກຳລັງມີການລະບາດຮອບໃໝ່ພາຍໃນປະເທດ;​ ເຊິ່ງເຫັນໄດ້ວ່າ ມີຈຳນວນໜຶ່ງ ແມ່ນເຂົ້າມາໂດຍບໍ່ຖືກຕ້ອງຕາມກົດໝາຍ ເຊິ່ງສົ່ງຜົນໃຫ້ເກີດມີຄວາມສ່ຽງ ແລະ ຜົນກະທົບທີ່ຕາມມາ. ດັ່ງນັ້ນ,​ ຕໍ່ກັບສະພາບການດັ່ງກ່າວທີ່່ໃນໂລກ ແລະ ປະເທດອ້ອມຂ້າງ ຍັງມີກໍລະນີໃໝ່ທຸກມື້, ທຸກຄົນ ຈົ່ງພ້ອມໃຈກັນປະຕິບັດມາດຕະການ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ແລະ ຄຳແນະນຳເພິ່ມເຕີມຂອງຄະນະສະເພາະກິດ, ທີ່ວາງອອກຢ່າງເຂັ້ມງວດ; ເພື່ອປ້ອງກັນົນເອງ, ຄົນອ້ອມຂ້າງ ແລະ ປະຊາຊົນລາວທຸກຄົນ ຈາກພະຍາດໂຄວິດ19; ຮຽກຮ້ອງມາຍັງອົງການປົກຄອງທ້ອງຖິ່ນ, ທະຫານຊາຍແດນ, ເຈົ້າໜ້າທີ່ຕຳຫຼວດ ເອົາໃຈໃສ່ເຝົ້າລະວັງ, ກວດຂັນຕາມຈຸດຜ່ານແດນທ້ອງຖິ່ນ ແລະ ຈຸດຂ້າມລອຍ ຢ່າງເຄັ່ງຄັດ ແລະ ເຖິງຄອບຄົວຍາດຕິພີ່ນ້ອງ ຈົ່ງເປັນຫູເປັນຕາຊ່ວຍກັນ ຫາກຮູ້ວ່າມີຄົນໃນຄອບຄົວຂອງທ່ານ ເດີນທາງມາຈາກປະເທດໃກ້ຄຽງ ທີ່ກຳລັງມີການລະບາດຢູ່, ຈົ່ງຮີບຮ້ອນ ນຳຜູ້ກ່ຽວໄປແຈ້ງຕໍ່ເຈົ້າໜ້າທີ່ ເພື່ອສົ່ງຜູ້ກ່ຽວໄປສູນຈຳກັດບໍລິເວນ ແລະ ເກັບຕົວຢ່າງມາກວດຫາເຊື້ອໂດຍໄວ; ເພື່ອສະກັດກັ້ນການແຜ່ເຊື້ອໃສ່ຄົນອ້ອມຂ້າງ ແລະ ໄປສູ່ສັງຄົມ; ຖ້າຫາກທຸກຄົນ ຫາກຮ່ວມມືກັນ ປະເທດຂອງພວກເຮົາ ກໍ່ຈະປອດໄພຈາກການລະບາດໃນຄັ້ງນີ້ໄດ້.

Off

Comments are closed.