17th Sep2013

ກອງປະຊຸມເຈົ້າໜ້າທີ່ອາວຸໂສກະກຽມໃຫ້ແກ່ ກອງປະຊຸມລັດຖະມົນຕີອາຊຽນວ່າດ້ວຍ ອາຊະຍາກຳຂ້າມຊາດ ຄັ້ງທີ 9

by somchan

ໃນວັນທີ 16 ກັນຍາ 2013 ນີ້ຢູ່ທີ່ໂຮງແຮມດອນ ຈັນພາເລດ ນະຄອນຫຼວງວຽງຈັນໄດ້ມີການຈັດ ກອງປະຊຸມເຈົ້າໜ້າທີ່ອາວຸໂສເພື່ອກະກຽມໃຫ້ແກ່ ກອງປະຊຸມລັດຖະມົນຕີອາຊຽນວ່າດ້ວຍອາຊະ ຍາກຳຂ້າມຊາດຄັ້ງທີ 9 ຂື້ນ, ໂດຍການເປັນປະ ທານຂອງ ທ່ານ ພົຈວ ສີສະຫວາດ ແກ້ວມາລາວົງ ຫົວໜ້າກົມໃຫຍ່ຕຳຫຼວດກະຊວງປ້ອງກັນຄວາມ ສະຫງົບທັງເປັນຫົວໜ້າຄະນະເຈົ້າໜ້າທີ່ອາວຸໂສ ສປປ ລາວ, ມີບັນດາເຈົ້າໜ້າທີ່ອາວຸໂສຈາກ ປະເທດສະມາຊິກອາຊຽນ, ກອງເລຂາອາຊຽນ ແລະ ປະເທດຄູ່ເຈລະຈາເຂົ້າຮ່ວມ.

ກອງປະຊຸມໄດ້ມີການປຶກສາຫາລື,ຄົ້ນຄວ້າແລກປ່ຽນຄຳຄິດຄຳເຫັນນຳກັນໃນບັນຫາຕ່າງໆ ທີ່ພົວພັນເຖິງບັນຫາອາຊະຍາກຳຂ້າມຊາດ ໂດຍສະເພາະແມ່ນການລັກລອບຄ້າຂາຍຢາເສບຕິດ,ການກໍ່ການຮ້າຍ,ການຄ້າຂາຍອາວຸດເຖື່ອນ,ການຄ້າມະນຸດອາຊະຍາກຳທາງທະເລ,ອາຊະຍາກຳທາງດ້ານເສດຖະກິດ,ອາຊະຍາກຳທາງຄອມພິວເຕີ ການປອມແປງເອກະສານເດີນທາງ ແລະ ການເຂົ້າ-ອອກເມືອງຢ່າງຜິດກົດ ໝາຍ ແລະ ອື່ນໆອີກ. ຫຼັງຈາກນັ້ນກໍ່ໄດ້ຮ່າງບົດລາຍງານດັ່ງກ່າວ ຢ່າງເປັນເອກະພາບ ເພື່ອນໍາເຂົ້າພິຈາລະນາ ແລະ ຮັບຮອງ ເອົາຢູ່ໃນກອງປະຊຸມລັດຖະມົນຕີອາຊຽນວ່າດ້ວຍ ອາຊະຍາກຳຂ້າມຊາດ ຄັ້ງທີ ທີ9.

ພ້ອມດຽວກັນນີ້ ກໍ່ຍັງໄດ້ມີກອງປະຊຸມປຶກສາຫາລືຂອງເຈົ້າໜ້າທີ່ອາວຸໂສອາຊຽນບວກ 3 ວ່າດ້ວຍອາຊະຍາກຳຂ້າມຊາດ ຄັ້ງທີ 6, ກອງປະຊຸມເຈົ້າໜ້າທີ່ອາວຸໂສອາຊຽນບວກ ສ.ປ ຈີນ ວ່າດ້ວຍອາຊະຍາກຳຂ້າມຊາດ ຄັ້ງທີ 3 ແລະ ກອງປະຊຸມເຈົ້າໜ້າທີ່ອາວຸໂສອາຊຽນບວກຍີ່ປຸ່ນວ່າດ້ວຍອາຊະຍາກໍາຂ້າມຊາດ ຄັ້ງທີ 1.  ເຊີ່ງບັນດາກອງປະຊຸມດັ່ງກ່າວໄດ້ມີການທົບທວນຄືນກ່ຽວກັບການຈັດຕັ້ງປະຕິບັດແຜນການພົວພັນຮ່ວມມື ໃນວຽກງານອາຊະຍາກຳຂ້າມຊາດລະຫວ່າງອາຊຽນ ແລະ ປະເທດຄູ່ເຈລະຈາ ໃນໄລຍະຜ່ານມາ. ພ້ອມນີ້ກໍ່ໄດ້ມີການປຶກສາຫາລືກ່ຽວກັບການເພີ່ມທະວີສາຍພົວພັນໃນດ້ານຕ່າງໆ ໂດຍສະເພາະແມ່ນການຊ່ວຍເຫຼືອເຊີ່ງກັນແລະກັນ ໃນການຕ້ານ ແລະ ສະກັດກັ້ນບັນຫາອາຊະຍາກຳຂ້າມຊາດ,ຊ່ວຍເຫຼືອໃນດ້ານການຍົກລະດັບຄວາມຮູ້ຄວາມສາມາດໃຫ້ກັບບຸກຄະລາກອນ,ແລກປ່ຽນບົດຮຽນ,ຂໍ້ມູນຂ່າວສານຕ່າງໆທີ່ມີປະໂຫຍດ ໃນການແກ້ໄຂບັນຫາອາຊະຍາກຳລະຫວ່າງຊາດທີ່ຈະເກີດຂື້ນ ແລະ ພ້ອມກັນແກ້ໄຂຢ່າງມີປະສິດທິຜົນ, ທັງນີ້ກໍ່ເພື່ອເຮັດໃຫ້ສາຍພົວພັນຮ່ວມມືລະຫວ່າງອາຊຽນ ແລະ ປະເທດຄູ່ເຈລະຈາ ໃນວຽກງານອາຊະຍາກຳຂ້າມຊາດມີຄວາມຮັດແໜ້ນຂື້ນເລື້ອຍໆ.

Off

Comments are closed.