24th Apr2021

ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ຢ້ຽມຢາມໂຮງໝໍສູນກາງ 103 ກອງທັບ

by somchan

ພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນ ຕີ, ລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ກວດກາສະພາບການປ້ອງພະຍາດໂຄວິດ-19 ຢູ່ໂຮງໝໍສູນກາງ 103 ກອງ ທັບໃນຕອນເຊົ້າວັນທີ 24 ເມສາ 2021 ໂອກາດນີ້ ທ່ານ ແລະ ຄະນະໄດ້ຮັບຟັງການລາຍງານຈາກ ພັອ ດຣ. ສຸລີພັນ ເພັດຈັນທະລາ, ຫົວໜ້າການທະ ຫານໂຮງໝໍສູນກາງ 103 ກອງທັບ ເປັນຕົ້ນ: ການກະກຽມສະຖານທີ່ຮັບຮອງ, ບຸກຄະລະກອນ, ອຸປະກອນການແພດ ຂໍ້ສະດວກ ແລະ ຂໍ້ຫຍຸ້ງຍາກ ໃນການປ້ອງກັນພະຍາດໂຄວິດ-19.

ສຳລັບ ການກະ ກຽມສະຖານທີ່ໄດ້ຈັດຕັ້ງກວດກາການເຂົ້າ-ອອກໂຮງໝໍຕະຫລອດ 24 ຊົ່ວໂມງ ແລະ ຄວບຄຸມການສັນຈອນພາຍໃນໂຮງໝໍໃຫ້ເປັນລະບົບດຽວ,  ມີຕຶກນອນຄົນເຈັບໃນປະຈຸບັນ 1 ຫຼັງ, 63 ຕຽງ, ມີຫ້ອງສຳລັບຄົນເຈັບໜັກ 8 ຕຽງ, ມີລະບົບອົກຊີ central, ມີລະບົບກຳຈັດຂີ້້ເຫຍື່ອ, ລະບົບປ່ຽນຖ່າຍຊຸດ PPE ແລະ ມີຕຶກໃຫ້ພະນັກງານ ກັກຕົວ 2 ຫຼັງ. ສ່ວນດ້ານບຸກຄະລາກອນ ໄດ້ຈັດຕັ້ງ 05 ທີມ ແຕ່ລະທິມ (20 ຄົນ) ແລະ ມີໜ່ວຍງານສັກວັກຊີນປ້ອງ ກັນພະຍາດໂຄວິດ-19 ໂດຍແບ່ງເປັນ 3 ໜ່ວຍ. ສຳລັບອຸປະກອນການແພດ ໄດ້ກະກຽມຕຶກສະເພາະ, ອົກຊີສັງຕຣານ, ເຄື່ອງຈັກຫາຍໃຈທຽມ, ເຄື່ອງຕິດຕາມຄົນເຈັບ, ຕູ້ເກັບຕົວຢ່າງ, ຈັກລັງສີເຄື່ອນທີ, ເອໂກ ເຄື່ອນທີ ແລະ ອື່ນໆ. ສ່ວນຜົນງານໃນໄລຍະຜ່ານມາ ໄດ້ກັກບໍລິ ເວນ 142 ຄົນ, ປິ່ນປົວດີ 07 ຄົນ, ພວມນອນປີ່ນປົວ 24 ຄົນ, ເກັບຕົວຢ່າງທັງໝົດ 6.718 ຄົນ, ສັກວັກຊິນ  3.500  ຄົນ   ໃນນັ້ນ ເຂັມທີສອງ 150 ຄົນ ແລະ ແທກອຸນນະພຸມ 296,677 ຄົນ.

ໂອກາດດັ່ງກ່າວ  ພົອ ຈັນສະໝອນ ຈັນຍາລາດໄດ້ໂອ້ລົມ ແລະ ໃຫ້ທິດຊີ້ນຳຫລາຍຢ່າງແກ່ແພດໝໍຢູ່ໂຮງໝໍສູນກາງ 103 ກອງທັບ ໃຫ້ເອົາໃຈໃສ່ປະຕິບັດໜ້າທີ່ຂອງຕົນຢ່າງສຸດຄວາມສາມາດເພື່ອປ້ອງກັນພະຍາດໂຄວິດ-19 ເປັນຕົ້ນ: ການກະກຽມສະຖານທີ່, ອຸປະກອນການແພດ ແລະ ແພດໝໍໃຫ້ພຽງພໍກັບຄວາມຕ້ອງການ, ທັງເຮັດທັງຖອດຖອນບົດຮຽນໄປນໍາ, ໄປພ້ອມໆ ກັບການສຶກສາອົບ ຮົມການເມືອງແນວຄິດໃຫ້ແພດໝໍເພື່ອເອົາໃຈໃສ່ປະຕິບັດໜ້າທີ່ ແລະ ປ້ອງກັນຕົວເອງຈາກພະຍາດດັ່ງກ່າວ. ໃນກໍລະນີມີອັນໃດທີ່ບໍ່ສອດຄ່ອງ ຫລື ມີບັນຫາໃຫ້ສະເໜີພາກສ່ວນກ່ຽວ ຂ້ອງຂອງລັດຖະບານຊ່ວຍແກ່ໄຂຢ່າງຮີບດ່ວນ ແລະ ຖືເອົາການແກ້ໄຂບັນຫາທີ່ເກີດຂຶ້ນເປັນສະ ໜາມຮົບສຳຄັນໜຶ່ງທີ່ຕ້ອງໄດ້ເອົາໃຈໃສ່ຈັດຕັ້ງປະຕິບັດໃຫ້ໄດ້ຮັບປະສິດທິຜົນສູງສຸດ.

Off

Comments are closed.