30th Apr2021

ເມືອງຊະນະສົມບູນ ຕັ້ງດ່ານກວດກາຄົນເຂົ້າອອກເມືອງ ເພື່ອປະຕິບັດມາດຕະການປ້ອງກັນພະຍາດໂຄວິດ19

by somchan

ຄະນະສະເພາະກິດປ້ອງກັນ ສະກັດກັ້ນ ແລະຄວບຄຸມພະຍາດໂຄວິດ-19 ເມືອງຊະນະສົມບູນ ແຂວງຈໍາປາສັກ ໄດ້ຕັ້ງດ່ານກວດກາຄົນເຂົ້າອອກເມືອງທີ່ຫຼັກ 8 ຈຸດເຊື່ອມຕໍ່ເມືອງຊະນະສົມບູນ ແລະ ນະຄອນປາກເຊ ແລະ ຈຸດກວດກາ ແຕ່ລະບ້ານ ເພື່ອເປັນການປ້ອງກັນບໍ່ໃຫ້ການແຜ່ລະບາດຂອງພະຍາດໂຄວິດ 19 ອອກສູ່ວົງກ້ວາງ.

ທ່ານ ຍູງທອງ ຈັນທະລ້ອມ ຄະນະກຳມະການສະເພາະກິດປ້ອງກັນ ແລະສະກັດກັ້ນພະຍາດໂຄວິດ 19 ເມືອງຊະນະສົມບູນ ແຂວງຈໍາປາສັກໃຫ້ສຳພາດວ່າ:ພາຍຫຼັງທີ່ໄດ້ຮັບການຊີ້ນຳຈາກທ່ານເຈົ້າແຂວງໆຈຳປາສັກໃນການເພີ່ມທະວີປ້ອງກັນ ແລະສະກັດກັ້ນການລະບາດພະຍາດໂຄວິດ 19 ແລ້ວ. ທາງຄະນະສະເພາະກິດເມືອງຊະນະສົມບູນ ໄດ້ລົງຊີ້ນຳໃນແຕ່ລະບ້ານໃຫ້ແກ່ປະຊາຊົນຮັບຮູ້ເຂົ້າໃຈຢ່າງເລິກເຊີ່ງຕໍ່ຜົນຮ້າຍຂອງພະຍາດໂຄວິດ19 ແລະວິທີປ້ອງກັນ,ການເວນຍາມເຂົ້າອອກພາຍໃນເມືອງ ແລະ ລະຫວ່າງບ້ານຕໍ່ບ້ານຢ່າງເຂັ້ມງວດ ໂດຍສະເພາະບ້ານທີ່ມີຜູ້ຕິດເຊື້ອແມ່ນ:ຫ້າມອອກຈາກບ້ານ ແລະບ້ານອື່ນໆກໍຫ້າມເຂົ້າມາ.

ຜ່ານການຕັ້ງດ່ານ ແລະ ຈຸດກວດກາແຕ່ລະບ້ານໄດ້ວັດແທກອຸນນະພູມແກ່ຜູ້ສັນຈອນ,ຖ້າກໍລະນີມີໄຂ້ຕ້ອງໄດ້ນໍາສົ່ງໄປປິ່ນປົວ,ກໍລະນີຜູ້ມີຄວາມຈໍາເປັນແທ້ໆ ທາງເຈົ້າໜ້າທີ່ຈິ່ງໄດ້ອອກບັດອະນຸຍາດໃຫ້ສາມາດເຂົ້າອອກເມືອງໄດ້ ຊຶ່ງຜ່ານມາກໍເຫັນວ່າມີຄວາມເປັນລະບຽບຮຽບຮ້ອຍ ປະຊາຊົນມີສະຕິໃນການປ້ອງກັນຕົນເອງ ແລະ ການສັນຈອນທຽວທາງເຂົ້າອອກເມືອງມີຈໍານວນໜ້ອຍລົງ.

ທ່ານ ຍູງທອງ ຈັນທະລ້ອມ ຍັງໄດ້ຮຽກຮ້ອງໃຫ້ປະຊາຊົນຈົ່ງໄດ້ໃຈໃສ່ໃນການປະຕິບັດມາດຕະການປ້ອງກັນພະຍາດໂຄວິດ 19 ຄືໃສ່ຜ້າປິດປາກ ແລະດັງ,ໝັ່ນລ້າງມື ແລະ ຂ້າເຊື້ອພະຍາດດ້ວຍເຈວ ຫຼືທາດເຫຼົ້າ,ຮັກສາໄລຍະຫ່າງທາງສັງຄົມ 1-2 ເເມັດຖ້າບໍ່ຈຳເປັນຫ້າມອອກຈາກເຮືອນຂອງຕົນ.

Off

Comments are closed.