02nd May2021

ຄະນະສະເພາະກິດ ຂັ້ນແຂວງລົງ ຊຸກຍູ້ການປະຕິບັດວຽກງານປ້ອງກັນ,ສະກັດກັ້ນການແພ່ລະບາດພະຍາດໂຄວິດ 19 ຢູ່ເມືອງນາໝໍ້ແຂວງອຸດົມໄຊ.

by somchan

ໃນວັນທີ 26 ເມສາ 2021ນີ້,ພັອ ສີວອນ ໄຊຍະວົງ ຄະນະປະຈຳພັກແຂວງ,ຫົວໜ້າກອງບັນຊາການ ປກສ ແຂວງອຸດົມໄຊ,ຄະນະສະເພາະກິດຂັ້ນແຂວງ ພ້ອມຄະນະໄດ້ເຄື່ອນໄຫວຊຸກຍູ້ການປະຕິບັດວຽກງານຕ້ານ ແລະ ສະກັດກັ້ນການແພ່ລະບາດພະຍາດໂຄວິດ 19 ຢູ່ທີ່ເມືອງນາໝໍ້ ແຂວງອຸດົມໄຊ, ເຂົ້າຮ່ວມມີ ທ່ານ ປອ ວົງສະຫວັນ ໄຊຍະວົງ ເລຂາພັກເມືອງ ເຈົ້າເມືອງ-ເມືອງນາໝໍ້, ຄະນະຮັບຜິດຊອບໜ່ວຍສະເພາະກິດປ້ອງກັນພະຍາດໂຄວິດ-19 ຂັ້ນເມືອງ,ມີບັນດາຄະນະຮັບຜິດຊອບຈາກແຕ່ລະພາກສ່ວນຕະຫຼອດຮອດອົງການຈັດຕັ້ງບ້ານພາຍໃນເມືອງເຂົ້າຮ່ວມ.

ໂອກາດນີ້ ທ່ານ ປອ ວົງສະຫວັນ ໄຊຍະວົງ ເຈົ້າເມືອງ-ເມືອງນາໝໍ້ກໍ່ໄດ້ລາຍງານການຈັດຕັ້ງປະຕີບັດຕ້ານ ແລະ ສະກັດກັ້ນການລະບາດຂອງເຊື້ອພະຍາດໂຄວີດ-19 ຢູ່ເມືອງນາໝໍ້,ໂດຍປະຕິບັດຕາມຄໍາສັ່ງ ຂອງທ່ານນາຍົກລັດຖະມົນຕີ ສະບັບເລກທີ 15/ນຍ,ລົງວັນທີ 21 ເມສາ 2021ວ່າດ້ວຍການເພີ່ມທະວີມາດຕະການສະກັດກັ້ນ,ຄວບຄຸມ ແລະ ກຽມພ້ອມຮອບດ້ານເພື່ອຕ້ານພະຍາດໂຄວິດ 19 ແລະ ຄຳສັ່ງຂອງທ່ານເຈົ້າແຂວງ ເລກທີ 343 ລົງວັນທີ 25 ເມສາ 2021, ເຊີ່ງ ໄດ້ຈັດຕັ້ງຈຸດກວດກາຄົນເຂົ້າ-ອອກ ຢູ່ຈຸດຮາກຖານບ້ານ, ປິດການຂົນສົງໂດຍສານ, ທັງມີການກໍານົດມາດຕະການ, ນີຕີກໍາຕ່າງໆ ຕໍ່ບັນດາຮ້ານບັນເທີງ, ຄາລາໂອເກະ , ແຈ້ງການໃຫ້ບັນດາບ້ານ, ກຸ່ມບ້ານຈັດຕັ້ງ ປກສ ບ້ານ ກວດກາຄົນເຂົ້າ-ອອກ ທີມາຈາກເຂດທີມີຄວາມສ່ຽງ ເພື່ອລາຍງານຕໍ່ຄະນະສະເພາະກິດຂັ້ນເມືອງຢ່າງເປັນປົກກະຕິ ແລະ ມີມາດຕະການຕໍ່ການຂື້ນລາຄາສີນຄ້າໃນຊ່ວງລະບາດເຊື້ອພະຍາດໂຄວີດ-19, ການລົງຊຸກຍູ້ຄັ້ງນີ້ ພັອ ສີວອນ ໄຊຍະວົງ ກໍ່ໄດ້ເນັ້ນໜັກໃຫ້ຄະນະຮັບຜິດຊອບທຸກພາກສ່ວນສືບຕໍ່ເອົາໃຈໃສ່ກວດກາຕິດຕາມສະພາບເຂົ້າ-ອອກຂອງພົນລະເມືອງໃຫ້ເຂັ້ມງວດຂື້ນຕື່ມ, ລົງຮາກຖານປຸກລະດົມໃຫ້ທຸກຊັ້ນຄົນຢູ່ໃນສັງຄົມ ມີຄວາມຮັບຮູ້ເຂົ້າໃຈ ພ້ອມກັນຕ້ານ ແລະ ສະກັດກັ້ນເຊື້ອພະຍາດບໍ່ໃຫ້ມີການແຜ່ລະບາດໃນວົງກ້ວາງ.

Off

Comments are closed.