02nd May2021

ກອງບັນຊາການ ປກສ ນະຄອນຫຼວງວຽງຈັນ ຈັດກອງປະຊຸມຊີ້ນຳທາງດ້ານວິຊາການ ໃນການຈັດຕັ້ງປະຕິບັດວຽກງານສືບສວນ-ສອບສວນ

by somchan

ໃນວັນທີ 29 ເມສາ 2021 ກອງບັນຊາການ ປກສ ນະຄອນຫຼວງວຽງຈັນ ໄດ້ຈັດກອງປະຊຸມວີດີໂອທາງໄກ ເພື່ອຊີ້ນຳການຜັນຂະຫຍາຍວຽກງານ ສືບສວນ-ສອບສວນ, ຊອກຄົ້ນຫາຜູ້ຕິດເຊື້ອທີ່ບໍ່ປະຕິບັດມາດຕະການສະກັດກັ້ນ, ຄວບຄຸມພະຍາດໂຄວິດ-19 ໃຫ້ແກ່ຄະນະຮັບຜິດຊອບຂັ້ນ ນະຄອນຫຼວງວຽງຈັນ ແລະ ຂັ້ນເມືອງ ໂດຍການເປັນປະທານຂອງ  ພັອ ສຸກພະຈັນ ບຸດດາຄຳ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ໃນໂອກາດນີ້ຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ເນັ້ນໜັກໃຫ້ຄະນະຮັບຜິດຊອບເອົາໃຈໃສ່ລວບລວມບັນດາມາດຕາຕ່າງໆກົດ  ໝາຍອາຍາ, ກົດໝາຍອື່ນໆ ທີ່ພົວພັນກັບການດໍາເນີນຄະດີ, ບັນດານິຕິກຳ, ແຈ້ງການ, ຄຳສັ່ງຂອງສູນກາງ ແລະ ນະຄອນຫຼວງວຽງຈັນ ເພື່ອເປັນບ່ອນອີງໃນການຈັດຕັ້ງປະຕິບັດໜ້າທີ່ວຽກງານ, ດຳເນີນການທ້ອນໂຮມຂໍ້ມູນຫຼັກຖານກ່ຽວກັບບຸກຄົນ, ສະຖານທີ່, ຫົວໜ່ວຍທຸລະກິດ ທີ່ມີການເຄື່ອນໄຫວລະເມີດ ເພື່ອເປັນຫຼັກຖານທາງດ້ານກົດໝາຍ ໃນການດຳເນີນຄະດີທັນທີ ຫຼັງປິ່ນປົວ-ກັກຕົວ,  ກວດກາສັນລະສູດສະຖານທີ່, ປະຫວັດສ່ວນບຸກຄົນທີ່ພົວພັນກັບການຕິດເຊື້ອ, ທີ່ເຫັນວ່າບໍ່ທັນຈະແຈ້ງ, ແລ້ວສັງລວມສົ່ງໃຫ້ພາກສ່ວນທີ່ກ່ຽວຂ້ອງຊອກຄົ້ນຫານຳຕົວມາປິ່ນປົວ,  ຈັດຕັ້ງເຄື່ອນໄຫວຊອກຄົ້ນຫາ ເປົ້າໝາຍທີ່ມີຄວາມສ່ຽງ, ເປົ້າໝາຍຕິດເຊື້ອທີ່ບໍ່ຈິງໃຈລາຍງານຕົວນຳຕົວມາປິ່ນປົວ, ຈັບຕົວ ເປົ້າໝາຍກະທຳຜິດຕ່າງໆເພື່ອດຳເນີນຄະດີ, ດຳເນີນການສືບສວນ-ສອບສວນ, ສ້າງສຳເນົາແຕ່ລະລາຍຄະດີ, ແບ່ງຄວາມຮັບຜິດຊອບລະຫວ່າງຄະນະຂັ້ນກອງບັນຊາການກັບຄະນະປະຈຳ 9 ເມືອງໃຫ້ລະອຽດ,  ເຮັດວຽກງານປະສານສົມທົບກັບຄະນະສະເພາະກິດນະຄອນຫຼວງວຽງຈັນ, ສູນປິ່ນປົວ, ສູນກັກກັນ ເພື່ອຕິດຕາມ ແລະ ນຳຕົວຜູ້ລະເມີດມາດຳເນີນຄະດີ, ສົມທົບກັບພາກສ່ວນທີ່ກ່ຽວຂອງເພື່ອຄວາມເປັນເອກະພາບໃນດ້ານຂໍ້ມູນຫຼັກຖານ ແລະ ຜົນເສຍຫາຍທີ່ບຸກຄົນ ແລະ ຫົວໜ່ວຍທຸລະກິດກໍ່ຂຶ້ນ,  ໃຫ້ຄ້າຍຄຸມຂັງຕ່າງໆໃນນະຄອນຫຼວງວຽງຈັນ ກຽມສະຖານທີ່ກັກຂັງ, ຈັດຕັ້ງກຳລັງປ້ອງກັນ, ຈັດລະບົບຫ້ອງຂັງ, ແຍກລະຫວ່າງຮັບຜູ້ມາໃໝ່ ແລະ ຜູ້ປອດເຊື້ອໃຫ້ລະອຽດ,ຕໍ່ກັບຮ້ານກິນດື່ມບັນເທິງ, ຮ້ານອາບອົບນວດ ແລະ ອື່ນໆ ທີມີຄຳສັ່ງ, ແຈ້ງການໃຫ້ປິດແຕ່ຍັງລະເມີດບໍ່ປິດ ຖ້າເຫັນວ່າການລະເມີດນັ້ນເກີດຂຶ້ນ ພາຍຫຼັງມີຄຳສັ່ງອອກມາແມ່ນໃຫ້ເບິ່ງເປັນແຕ່ລະກໍລະນີ, ກໍລະນີບໍ່ມີການແຜ່ເຊື້ອໃຫ້ເຮັດບົດລາຍງານຂະແໜງການກ່ຽວຂ້ອງ, ກໍລະນີລະເມີດເປັນສາເຫດການແຜ່ເຊື້ອພະຍາດໃຫ້ເປີດການສືບສວນ-ສອບສວນທາງຄະດີອາຍາ ແລະ ສົມທົບກັບພາກສ່ວນກ່ຽວຂອງລວບລວມຂໍ້ມູນຜູ້ເຈັບເປັນ, ຜົນເສຍຫາຍທາງແພ່ງ, ຄ່າໃຊ້ຈ່າຍຕ່າງໆ ປະກອບເຂົ້າສຳນວນສົ່ງໄອຍະການ, ຕໍ່ກັບຜູ້ທີ່ສ້າງຄວາມປັ່ນປ່ວນ, ສ້າງຂໍ້ມູນເທັດ ເຮັດໃຫ້ສັງຄົມແຕກຕື່ນ ຖ້າພົບເຫັນແມ່ນໃຫ້ດຳເນີນຄະດີຕາມລະບຽບກົດໝາຍ.

 

Off

Comments are closed.