06th May2021

ມີບາງກິດຈະການຈຳນວນໜຶ່ງຍັງລະເມີດຄຳສັງຂອງນາຍົກລັດຖະມົນຕີ

by somchan

ພັທ ບົວໄລ ໄຊຍະລາດ ຮອງຫົວໜ້າກອງພັນປ້ອງກັນເຄື່ອນທີ່ ກອງບັນຊາການ ປກສ ນະຄອນຫຼວງວຽງຈັນ ໄດ້ໃຫ້ຮູ້ວ່າ: ໃນວັນທີ 4 ພຶດສະພາ 2021, ກອງພັນປ້ອງກັນເຄື່ອນທີ່ ນະຄອນຫຼວງວຽງຈັນ ໄດ້ອອກເຄື່ອນໄຫວລາດຕະເວນ ໄດ້ພົບເຫັນບາງກິດຈະການຍັງບໍ່ທັນປະຕິບັດເຂັ້ມງວດຕາມຄໍາສັ່ງເລກທີ 15/ນຍ ລົງວັນທີ 21 ເມສາ 2021 ວ່າດ້ວຍການເພີ່ມທະວີການສະກັດກັ້ນ, ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານການແຜ່ລະບາດພະຍາດໂຄວິດ-19.

ໃນນີ້, ມີກິດຈະການຕູ້ເກມຢູ່ບ້ານດົງໂພສີ ເມືອງຫາດຊາຍຟອງ ຍັງເປີດໃຫ້ບໍລິການໃຫ້ລູກຄ້າເຂົ້າມາຫຼິ້ນເກມ, ຮ້ານອິນເຕີເນັດຄາເຟ ຢູ່ບ້ານຫົວຂົວ ເມືອງໄຊເສດຖາ, ຮ້ານອິນເຕີເນັດຄາເຟ ຢູ່ບ້ານໂນນແກ້ວ ເມືອງສີໂຄດຕະບອງ ແລະ ໄດ້ກັກຕົວໄວ້ໜຸ່ມທ່ຽວເດິກ ຈໍານວນ 3 ຄົນ ຢູ່ເຂດເມືອງສີໂຄດ ນະຄອນຫຼວງວຽງຈັນ. ໂດຍແຕ່ລະກໍລະນີທາງເຈົ້າໜ້າທີ່ໄດ້ສຶກສາອົບຮົມ ແລະ ເຮັດບົດບັນທຶກກ່າວເຕືອນ ຖ້າຫາກມີການລະເມີດອີກຈະດຳເນີນມາດຕະການຢ່າງເດັດຂາດຕາມລະບຽບກົດໝາຍ.

ຕໍ່ກັບບັນຫາດັ່ງກ່າວຈຶ່ງຂໍຮຽກຮ້ອງມາຍັງເຈົ້າຂອງກິດຈະການ, ຫົວໜ່ວຍທຸລະກິດຕ່າງໆ ໃຫ້ຕື່ນຕົວເອົາໃຈໃສ່ປະຕິບັດມາດຕະການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ ເພື່ອຄວາມປອດໄພຂອງຄອບຄົວ, ຕົວທ່ານເອງ ແລະ ສັງຄົມ.

 

Off

Comments are closed.