11th May2021

ປກສ ແຂວງສະຫວັນນະເຂດ ປະກາດປະຕິບັດວິໄນ ຕໍ່ອາດິນາຍຕຳຫຼວດທີ່ລະເມີດກົດໝາຍກ່ຽວຂ້ອງກັບສາເຫດການແຜ່ລະບາດພະຍາດໂຄວິດ-19

by somchan

ວັນທີ 10 ພຶດສະພາ 2021, ກອງບັນຊາການ ປກສ ແຂວງສະຫວັນນະເຂດ ໄດ້ປະຕິບັດວິໄນ ຕໍ່ອາດີດນາຍຕໍາຫຼວດ ທີ່ຂຶ້ນກັບກອງບັນຊາການ ປກສ ແຂວງສະຫວັນະເຂດ, ໂດຍການເຂົ້າຮ່ວມຂອງ  ພັອ ສົມໝາຍພົມມະຈັນ ຫົວໜ້າກອງບັນຊາການ ປກສ ແຂວງ, ມີຄະນະພັກ-ຄະນະບັນຊາ ກອງບັນຊາການ ປກສ ແຂວງ, ພ້ອມດ້ວຍ ປກສ ເມືອງ ສອງຄອນ ແລະບັນດາຫ້ອງອ້ອມຂ້າງເຂົ້າຮ່ວມ.

ພັທ  ຄໍາຜາຍ ຄູນລາດສຸວັນນະວົງ ຫົວໜ້າຫ້ອງ ການເມືອງ ປກສ ແຂວງສະຫວັນນະເຂດ  ໄດ້ຂຶ້ນຜ່ານຂໍ້ຕົກລົງ ຂອງລັດຖະມົນຕີກະຊວງປ້ອງກັນຄວາມສະຫງົບ ສະບັບເລກທີ 825/ປກສ,ລົງວັນ ທີ 7 ພຶດສະພາ 2021 ວ່າດ້ວຍການປະຕິບັດ ວິໄນ ຕໍ່ອາດີດນາຍຕໍາຫຼວດ ທີ່ຂຶ້ນກັບກອງບັນຊາການ ປກສ ແຂວງສະຫວັນນະເຂດ; ດັ່ງນີ້, ລັດຖະມົນຕີກະ ຊວງປ້ອງກັນຄວາມສະຫງົບ ຕົກລົງປະຕິບັດວິໄນຕໍ່ ຮອ ພູໃສ ສີສະຫວັນ ອາຍຸ 34 ປີ, ໜ້າທີ່ຮັບຜິດ ຊອບວິຊາການສັງກັດຢູ່ຫ້ອງການ ຂຶ້ນກັບກອງບັນ ຊາການ ປກສ ແຂວງສະຫວັນນະເຂດ,  ເຫດຜົນຍ້ອນມີການລະເມີດລະບຽບກົດໝາຍ ວ່າດ້ວຍກໍາລັງ ປກສ ພາກທີ V ມາດຕາ 39 ແລະ ຂໍ້ຫ້າມຕໍ່ ນາຍ ແລະ ພົນຕໍາຫຼວດ ມາດຕາ 06 ຂໍ້ 5 ຫ້າມເມີນເສີຍ ແລະ ປ່ອຍປະລະເລີຍໃຫ້ຄົນຕ່າງປະເທດ, ຄົນບໍ່ມີສັນຊາດ ເຂົ້າມາເຄື່ອນໄຫວດຳ ລົງ ຊີວິດ, ລີ້ຊ້ອນ, ພັກເຊົ່າ, ລັກລອບປະກອບອາ ຊີບ ແລະ ຮູບການອື່ນ ໂດຍບໍ່ໄດ້ຮັບອານຸຍາດ ໃນພື້ນທີ່ຂອງຕົນຮັບຜິດຊອບ, ຜູ້ກ່ຽວ ມີການພົວພັນກັບຄົນຕ່າງປະເທດ ໂດຍບໍ່ຖືກກົດໝາຍ ເຊິ່ງເປັນສາເຫດໃຫ້ມີການແພ່ລະບາດ ເຊື້ອພະຍາດໂຄວິດ-19 ຢູ່ ສປປ ລາວ ໃນປັດຈຸບັນ, ຜິດຕໍ່ປະມວນ ກົດໝາຍອາຍາ ມາດຕາ 141ແລະ 244 ຜູ້ກ່ຽວພົວພັນ ການຫຼິ້ນການພະນັນເຖື່ອນ,ພົວພັນຊື້-ຂາຍຊັບຜິດກົດໝາຍ ຫຼື(ຄ້າ-ຂາຍເຖື່ອນ).

ຈາກນັ້ນ, ກໍໄດ້ຜ້ານຂໍ້ຕົກລົງ ຂອງກົມໃຫຍ່ການ ເມືອງປ້ອງກັນຄວາມສະຫງົບ ສະບັບເລກທີ 1375/ກມປສ, ລົງວັນທີ 7 ພຶດສະ ພາ 2021 ວ່າດ້ວຍການປະຕິບັດ ວິໄນ ຕໍ່ອາດີດນາຍຕຳຫຼວດ ທີ່ຂຶ້ນກັບກອງບັນຊາການ ປກສ ເມືອງສອງຄອນ ແຂວງສະຫວັນນະເຂດ;ກົມໃຫຍ່ການເມືອງປ້ອງກັນຄວາມສະຫງົບ ຕົກລົງ ປະຕິບັດວິໄນຕໍ່ ຮທ ສອນອາໄລ ໂພທິລາດ ອາຍຸ 33 ປີ, ໜ້າທີ່ຮັບຜິດ ຊອບວິຊາການ ສັງກັດຢູ່ ກອງບັນຊາການ ປກສ ເມຶອງສອງຄອນ  ຂຶ້ນກັບກອງບັນຊາການ ປກສ ແຂວງສະຫວັນນະເຂດ, ເຫດຜົນ: ຍ້ອນມີການກະທໍາຜິດຕໍ່ລະບຽບກົດໝາຍວ່າດ້ວຍກໍາລັງປ້ອງກັນຄວາມສະຫງົບ ພາກທີ V ມາດຕາ 39 ຂໍ້ 08 ແລະ ປະມວນກົດໝາຍອາຍາ ມາດຕາ 141 ແລະ 244 ຜູ້ກ່ຽວສວຍໃຊ້ຖານະຕໍາແໜ່ງສິດອໍານາດໜ້າທີ່ ເພື່ອຫາຜົນປະໂຫຍດສ່ວນຕົວ, ພົວພັນກຸ່ມແກ້ງຄ້າຂາຍຢາເສບຕິດ,ຫຼິ້ນການພະນັນເຖື່ອນ, ຄ້າ- ຂາຍເຖື່ອນ ແລະ ຂາດສະຕິຕໍ່ການຈັດຕັ້ງ, ມີການພົວພັນກັບຄົນຕ່າງປະເທດໂດຍບໍ່ຖືກກົດໝາຍ ເຊິ່ງເປັນສາເຫດໃຫ້ມີການແພ່ລະບາດ ເຊື້ອພະຍາດໂຄວິດ-19 ຢູ່ສປປ ລາວໃນປັດຈຸບັນ.

ຄືໃຫ້ການຈັດຕັ້ງທີ່ກ່ຽວຂ້ອງປະກາດຂໍ້ຕົກລົງ ແລະ ຮັບຮູ້ເຂົ້າໃຈເປັນເອກກະພາບຕໍ່ການປະຕິບັດວິໄນ ຮອ ພູໃສ ສີສະຫວັນ ແລະ  ຮທ ສອນອາໄລ ໂພທິລາດ ອອກຈາກກໍາລັງປ້ອງກັນຄວາມສະຫງົບ ໂດຍບໍ່ໄດ້ຮັບອຸດໜູນ,ນະໂຍບາຍໃດໆ.

Off

Comments are closed.