19th May2021

ປະຊາຊົນເມືອງໂຂງ 254 ຄອບຄົວໄດ້ຮັບຜົນກະທົບຈາກພະຍຸລະດູຮ້ອນ

by somchan

ຕາມການລາຍງານຈາກ ທ່ານ ອານຸແສງ ຈັນທະລາວົງ ຫົວໜ້າຫ້ອງການແຮງງານ ແລະ ສະຫວັດດີການສັງຄົມ ເມືອງໂຂງ ແຂວງຈຳປະສັກ ໃຫ້ຮູ້ວ່າ: ປະຊາຊົນເມືອງໂຂງ ຈຳນວນ 9 ບ້ານ, 254 ຄອບຄົວ ໄດ້ຮັບຜົນກະທົບຈາກພາຍຸລະດູຮ້ອນ ໃນຕອນຄໍ່າວັນທີ 17 ພຶດສະພາ 2021 ເຊິ່ງໄດ້ເຮັດໃຫ້ເຮືອນຊານບ້ານຊ່ອງໄດ້ຮັບຄວາມເສຍຫາຍ.

ໃນວັນທີ 18 ພຶດສະພາ ນີ້, ທ່ານນາງ ຄຳພູ ລິດທິສັກ ເຈົ້າເມືອງໂຂງ ພ້ອມພາກສ່ວນກ່ຽວຂ້ອງ ໄດ້ລົງຕິດຕາມເບິ່ງຜົນກະທົບຕົວຈິງຢ່າງຮີບດ່ວນ, ພ້ອມທັງໄດ້ຮັບຟັງການລາຍງານຈາກຫົວໜ້າຫ້ອງການແຮງງານ ແລະ ສະຫວັດດີການສັງຄົມວ່າ: ພະຍຸລະດູຮ້ອນຄັ້ງນີ້ ໄດ້ສ້າງຄວາມເສຍຫາຍເປັນບໍລິເວນກວ້າງພໍສົມຄວນ ໂດຍມີ 9 ບ້ານ, 254 ຄອບຄົວ ໄດ້ຮັບຜົນກະທົບຈາກພາຍຸລະດູຮ້ອນ ຄື: ບ້ານໂຂງຫາດງິ້ວ ໄດ້ຮັບຜົນກະທົບ 23 ຄອບຄົວ, ບ້ານໂຂງແຫລມ 19 ຄອບຄົວ, ບ້ານຫົວສັນ 52 ຄອບຄົວ, ບ້ານຫາງສັນ 36 ຄອບຄົວ, ບ້ານແສນລ່າມ 37 ຄອບຄົວ, ບ້ານນາລານ 30 ຄອບຄົວ, ບ້ານຫ້ວຍໄຮ 52 ຄອບຄົວ, ບ້ານລົມພັດ 5 ຄອບຄົວ ແລະ ບ້ານນາແສນພັນ 28 ຄອບຄົວ.

 

ປັດຈຸບັນ, ຄະນະກໍາມະການຕ້ານໄພພິບັດຂັ້ນເມືອງ ພວມສຸມກຳລັງເລັ່ງລົງເກັບກຳຂໍ້ມູນຜົນເສຍຫາຍຕົວຈິງ ເພື່ອສະຫລຸບ ແລ້ວລາຍງານຕໍ່ອຳນາດການປົກຄອງເພື່ອເລັ່ງໃນການຊ່ວຍ ເຫລືອຂັ້ນຕົ້ນຢ່າງຮີບດ່ວນ.

Off

Comments are closed.