28th May2021

ກົມຕໍາຫຼວດເສດຖະກິດ ຮັບເຄື່ອງຊຸກຍູ້ປ້ອງກັນໂຄວິດ ຈາກ 4 ພາກສ່ວນ

by somchan

ໃນວັນທີ 24 ພຶດສະພາ 2021 ນີ້, ທ່ານ ຄໍາແກ້ວ ວິສີສົມບັດ ຫົວໜ້າກົມບໍລິການ ທະນາຄານກາງ, ບໍລິສັດ ກໍ່ສ້າງຂົວທາງ ຊົນລະປະທານ, ບໍລິສັດ ມີໂຊກການຄ້າ ແລະ ທີ່ປຶກສາຄົບວົງຈອນ ແລະ ບໍລິສັດ ແອ່ວເອັມ (LM) ສຶກສາ ພ້ອມດ້ວຍຄະນະ ໄດ້ນໍາອຸປະກອນປ້ອງກັນພະຍາດໂຄວິດ-19 ມາຊຸກຍູ້ໃຫ້ກົມຕໍາຫຼວດເສດຖະກິດ ກົມໃຫຍ່ຕໍາຫຼວດ ກະຊວງ ປກສ ເຊິ່ງກ່າວຮັບໂດຍ ພັອ ປອ ຄໍາແຝງ ວັນດີໄຊ ຫົວໜ້າກົມຕໍາຫຼວດເສດຖະກິດ ພ້ອມດ້ວຍຄະນະ.

ຕາງໜ້າທັງ 4 ພາກສ່ວນ ໃຫ້ຮູ້ວ່າ: ເຄື່ອງທີ່ນໍາມາຊຸກຍູ້ອຸປະຖໍາໃນຄັ້ງນີ້ ປະກອບມີ ຜ້າອັດປາກ-ດັງ, ເຈວລ້າງມື, ເຫຼົ້າເກົ້າສິບ, ເຄື່ອງວັດແທກອຸນຫະພູມ ແລະ ໜ້າກາກໃສ ລວມມູນຄ່າ 6.000.000 ກວ່າກີບ; ທັງນີ້ກໍເພື່ອເປັນການປະກອບສ່ວນຊ່ວຍເຫຼືອເຂົ້າໃນວຽກງານຕ້ານ ແລະ ສະກັດກັ້ນການແພ່ລະບາດຂອງພະຍາດໂຄວິດ-19 ໃຫ້ຫຼຸດໜ້ອຍຖອຍລົງ ແລະ ຍັງເປັນການປ້ອງກັນເບື້ອງຕົ້ນຕໍ່ບັນດາອ້າຍນ້ອງກໍາລັງກົມຕໍາຫຼວດເສດຖະກິດທີ່ກໍາລັງປະຕິບັດໜ້າທີ່ຕໍ່ວຽກງານດັ່ງກ່າວບໍ່ໃຫ້ຕົກເປັນກຸ່ມສ່ຽງຕໍ່ການຕິດເຊື້ອພະຍາດ.

ໂອກາດດຽວກັນ, ພັອ ປອ ຄໍາແຝງ ວັນດີໄຊ ຍັງໄດ້ກ່າວສະແດງຄວາມຂອບໃຈ ພ້ອມທັງມອບໃຍຍ້ອງຍໍໃຫ້ທັງ 4 ພາກສ່ວນ ທີ່ເຫັນໄດ້ຄວາມສໍາຄັນໂດຍການໄດ້ນໍາເຄື່ອງດັ່ງກ່າວມາມອບໃຫ້ໃນຄັ້ງນີ້ ເຊິ່ງເຄື່ອງດັ່ງກ່າວແມ່ນຈະໄດ້ນໍາໄປເບີກຈ່າຍໃຫ້ພະນັກງານຂອງກົມໃຫ້ທົ່ວເຖິງ ແລະ ໃຫ້ເກີດປະໂຫຍດສູງສຸດ.

Off

Comments are closed.