14th Oct2013

ກອງປະຊຸມເປີດກ້ວາງຄະນະບໍລິຫານງານ ພັກກະຊວງປ້ອງກັນຄວາມສະຫງົບ ຄັ້ງທີ 12 ສະໄໝທີ 3

by somchan

ກອງປະຊຸມເປີດກ້ວາງຄະນະບໍລິຫານງານພັກ ກະຊວງປ້ອງກັນຄວາມສະຫງົບຄັ້ງທີ 12 ສະໄໝທີ 3 ໄດ້ສຳເລັດໃນວັນທີ 11 ຕຸລາ 2013 ນີ້ ໂດຍ ພາຍໃຕ້ການເປັນປະທານຂອງສະຫາຍ ດຣ ທອງບັນ ແສງອາພອນ ເລຂາທິການສູນກາງພັກ ລັດຖະມົນຕີວ່າການກະຊວງປ້ອງກັນຄວາມສະຫງົບ ມີຄະນະພັກກະຊວງ ແລະ ບັນດາກົມກອງຂ້າງກະຊວງເຂົ້າຮ່ວມ.

ໃນວາລະກອງປະຊຸມໄດ້ສະຫຼຸບຕີລາຄາຄືນຜົນການຈັດຕັ້ງປະຕິບັດມະຕິກອງປະຊຸມເປີດກວ້າງຄັ້ງທີ 11 ສະໄໝທີ 3 ໂດຍສະເພາະ 4 ຄາດໝາຍ 4 ບຸກທະລຸ 13 ແຜນຍຸດທະສາດ ຂອງກະຊວງວາງອອກ, ພ້ອມທັງໄດ້ຄົ້ນຄ້ວາປະກອບຄຳຄິດຄຳເຫັນ ແລະຮັບຮອງເອົາມະຕິກອງປະຊຸມເປີດກວ້າງຄັ້ງທີ 12 ສະໄໝທີ 3 ນອກນີ້ຍັງໄດ້ຄົ້ນຄ້ວາປັບປຸງຮ່າງກົດໝາຍວ່າດ້ວຍການປ້ອງກັນຄວາມສະຫງົບແຫ່ງຊາດ ເພື່ອນຳເຂົ້າຜ່ານກອງປະຊຸມສະໄໝສາມັນເທື່ອທີ 6 ສະໄໝທີ 7 ຂອງສະພາແຫ່ງຊາດ ໃນການເຄື່ອນໄຫວປະຕິບັດວຽກງານປ້ອງກັນຄວາມສະຫງົບທາງດ້ານການເມືອງ, ເສດຖະກິດ, ວັດທະນະວັດ-ສັງຄົມ ແລະ ອື່ນໆ ຂອງບັນດາກົມກອງໃນກຳລັງປ້ອງກັນຄວາມສະຫງົບໃຫ້ດຳເນີນໄປຢ່າງສອດຄ່ອງກັບແນວທາງນະໂຍບາຍຂອງພັກໃນໄລຍະໃໝ່ ພ້ອມທັງຮັບປະກັນໃນການປ້ອງພັກ-ລັດ, ຮັກສາຄວາມເປັນລະບຽບຮຽບຮ້ອຍໃນສັງຄົມໃຫ້ມີຄວາມສະຫງົບໂດຍພື້ນຖານ.

ໃນໂອກາດນີ້ສະຫາຍ ດຣ ທອງບັນ ແສງອາພອນ ເລຂາທິການສູນກາງພັກ ລັດຖະມົນຕີວ່າການກະຊວງປ້ອງກັນຄວາມສະຫງົບ ຍັງໄດ້ເໜັ້ນບາງບັນຫາເພື່ອໃຫ້ການຄົ້ນຄ້ວາປະກອບຄຳຄິດຄຳເຫັນໃສ່ຮ່າງກົດໝາຍວ່າດ້ວຍການປ້ອງກັນຄວາມສະຫງົບແຫ່ງຊາດມີເນື້້ອ ແລະ ສອດຄ່ອງກັບການພັດທະນະປະເທດຊາດໃນໄລຍະໃໝ່.

Off

Comments are closed.