ກົມໃຫຍ່ການເມືອງ ປກສ ມອບເງິນຈຳນວນ 30 ລ້ານກີບໃຫ້ ກອງບັນຊາການ ປກສ ນະຄອນຫຼວງວຽງຈັນ

ໃນວັນທີ 2 ມິຖຸນາ 2021 ນີ້ ພົຈວ ປອ ສຸ​ວັນ​ນີ ສີ​ສຸ​ພາບ​ມີ​ໄຊ  ຮອງຫົວໜ້າ​ກົມ​ໃຫຍ່​ການ​ເມືອງ ປກ​ສ ໄດ້​ຕາງ​ໜ້າ​ກົມ​ໃຫຍ່​ການ​ເມືອງ ປກ​ສ ​ມອບ​ເງິນ​ຈຳ​ນວນ 30 ລ້ານ​ກີບ , ເຈວ​ລ້າງ​ມື 1 ແກັດ , ຜ້າອັດ​ປາກ​ດັງ 2 ແກັດ  ໃຫ້ ກອງ​ບັນ​ຊາ​ການ ປກ​ສ ນະຄອນຫຼວງວຽງຈັນ  ຕາງ​ໜ້າ​ຮັບ​ໂດຍ ພັນເອກ ສຸກ​ພະ​ຈັນ ບຸດ​ດາ​ຄຳ ຫົວ​ໜ້າ ກອງ​ບັນ​ຊາ​ການ ປກ​ສ ນະຄອນຫຼວງວຽງຈັນ, ເພື່ອ​ນຳ​ໄປ​ໝູນ​ໃຊ້​ເຂົ້າ​ໃນ​ການ​ປະ​ຕິ​ບັດ​ໜ້າ​ທີ່​ວຽກ​ງານ​ວິ​ຊາ​ສະ​ເພາະ​​ຂອງ ພະ​ນັກ​ງານ​ນົກ​ຮົບພາຍ​ໃນ​ກອງບັນ​ຊາ​ການ ປກ​ສ ນະຄອນຫຼວງວຽງຈັນ  ທີ່​ປະ​ຕິ​ບັນ​ໜ້າ​ປະ​ກອບ​ສ່ວນ​ໃນ​ການ​ຕ້ານ ແລະ ​ສະ​ກັດ​ກັ້ນການ​ລະ​ບາດ​ຂອງ​ພະ​ຍາດ​ໂຄວິດ-19 ໃນປະ​ຈຸ​ບັນ​ນີ້.

ໂອ​ກາດ​ດຽວ​ກັນ​ນີ້ ພົຈວ ປອ ສຸວັນນີ ສີສຸພາບມີໄຊ  ຮອງກົມໃຫຍ່ການເມືອງ ປກສ ກໍ່​ໄດ້​ຮຽກ​ຮ້ອງ​ໃຫ້ ພະ​ນັກ​ງານ-ນັກ​ຮົ​ບ ພາຍ​ໃນ ກອງ​ບັນ​ຊາກ​ານ ປກ​ສ ນະຄອນຫຼວງວຽງຈັນ  ເປັນ​ເຈົ້າ​ການ​ໃນ​ການ​ປະ​ຕິ​ບັດ​ໜ້າ​ທີ່​ວຽກ​ງານ ວິ​ຊາ​ສະ​ເພາະ​ຂອງ​ຕົນ​ຕາມ​ການມອບ​ໝາຍ​ໃຫ້​ສຳ​ເລັດ​ຜົນ ເພື່ອ​ເຮັດ​ໃຫ້​ນະ​ຄອນຫຼວງວຽງ​ຈັນ ມີ​ຄວາມ​ສະ​ຫງົບ​ປອດ​ໄພ ແລະ ເປັນລະບຽບຮຽບຮ້ອຍ.

ພ້ອມກັນນີ້ ພັນເອກ ສຸກ​ພະ​ຈັນ ບຸດ​ດາ​ຄຳ ຍັງໄດ້ສະແດງຄວາມຂອບໃຈຕໍ່ການຈັດຕັ້ງ ກົມໃຫ່ຍການເມືອງ ປກສ  ກໍຄືກະຊວງ ປກສ ທີ່ມີຄວາມເປັນຫວ່າງເປັນໄຍ, ລົງໃກ້ຊິດຕິດແທດ ແລະ ມອບວັດຖຸປັດໃຈຕ່າງໆໃຫ້ໃນຄັ້ງນີ້.