05th Jun2021

ລັດຖະບານລາວ ກໍານົດເປົ້າໝາຍສັກວັກແຊງປ້ອງກັນໂຄວິດ-19 ໃຫ້ປະຊາຊົນ ໃຫ້ໄດ້ 3,7 ລ້ານຄົນ ໃນປີ 2021

by somchan

ໃນວັນທີ 4 ມິຖຸນາ 2021 ກະຊວງສາທາລະສຸກ ໄດ້ຈັດກອງປະຊຸມຮ່ວມ ກັບສື່ມວນຊົນ ກ່ຽວກັບວັກແຊງ ກັນພະຍາດ ໂຄວິດ-19, ໂດຍການເປັນປະທານຂອງ ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ, ມີຕາງໜ້າອົງ ການຢູນີເຊບ, ອົງການອະນາໄມໂລກ ປະຈຳ ລາວ, ພ້ອມດ້ວຍບັນດາສື່ມວນຊົນ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ຈຸດປະສົງຂອງກອງປະຊຸມ ຮ່ວມກັບສື່ມວນຊົນຄັ້ງນີ້, ເພື່ອແນະນໍາໃຫ້ແກ່ ສື່ມວນຊົນກ່ຽວກັບ ວັກແຊງກັນພະຍາດ ໂຄວິດ-19 ທີ່ກໍາລັງສ້າງຄວາມເຊື່ອໝັ້ນ ຕໍ່ຄວາມປອດໄພ ແລະ ປະສິດທິຜົນຂອງວັກແຊງ. ພ້ອມນີ້, ກອງປະຊຸມ ຍັງຈະຖືໂອກາດແຈ້ງ ໃຫ້ບັນດານັກຂ່າວ ກ່ຽວກັບຜົນໄດ້ຮັບ ຂອງການສັກວັກແຊງໃນໄລຍະຜ່ານມາ ແລະ ເປົ້າໝາຍທີ່ຈະສັກວັກແຊງ ໃນໄລຍະຕໍ່ໄປ ສະບັບປັບປຸງທີ່ລັດຖະບານ ແຫ່ງ ສປປ ລາວ ກໍານົດໄວ້ ສໍາລັບ ປີ 2021.

ໃນໂອກາດດັ່ງກ່າວ, ທ່ານ ດຣ. ພອນປະເສີດ ອຸນາພົມ ໄດ້ກ່າວວ່າ: ລັດຖະບານ ແຫ່ງ ສປປ ລາວ ໄດ້ກໍານົດເປົ້າໝາຍ ໃຫ້ ປະຊາຊົນລາວ ໃຫ້ຮັບວັກແຊງ ກັນໂຄວິດ-19 ໃຫ້ໄດ້ 50% ຂອງປະຊາ ກອນທັງໝົດ ຫລື 3,7 ລ້ານຄົນ ສໍາລັບ ປີ 2021. ປັດຈຸບັນ ສປປ ລາວ ໄດ້ຮັບການຊ່ວຍເຫລືອ ວັກແຊງກັນໂຄວິດ-19 ຈາກບັນດາປະເທດອ້ອມຂ້າງ ແລະ ບັນດາປະເທດເພື່ອມິດທັງໝົດ 1,4 ລ້ານໂດສ. ໃນນັ້ນ, ມີ ວັກແຊງຊະນິດ ສະປຸກນິກວີ (Sputnik-v), ຊີໂນຟາມ (Sinopharm), ແອສຕຣາເຊນີກາ (Astrazenica) ແລະ ໄຟເຊີ (Pfizer). ປະຊາຊົນໄດ້ຮັບ ວັກແຊງກັນໂຄວິດ-19 ແລ້ວເຂັມທີ 1 ຈໍາ ນວນ 6 ແສນກວ່າຄົນ ແລະ ເຂັມທີ 2 ຈໍານວນ 1 ແສນກວ່າຄົນ ແລະ ກໍາລັງສືບຕໍ່ຈັດຕັ້ງ ປະຕິບັດ ໃຫ້ສຳເລັດຕາມເປົ້າໝາຍ ທີ່ໄດ້ກຳນົດໄວ້.

Off

Comments are closed.