06th Jun2021

ເຈົ້າແຂວງຈຳປາສັກ ພ້ອມຄະນະ ພົບປະໂອ້ລົມປະຊາຊົນ ບ້ານຕົວເມືອງນ້ອຍຊົນນະບົດສິງສຳພັນ

by somchan

ໃນວັນທີ 4 ມິຖຸນາ 2021 ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ພົບປະໂອ້ລົມອຳນາດການປົກຄອງ ແລະ ປະຊາຊົນ ບ້ານຕົວເມືອງນ້ອຍຊົນນະບົດສິງສຳພັນ ເມືອງຊະນະສົມບູນ ແຂວງຈຳປາສັກ. ໂດຍມີ ທ່ານ ສອນສະຫວັນ ສີວິໄລ ເຈົ້າເມືອງຊະນະສົມບູນ, ມີການນຳພະແນກການທີ່ກ່ຽວຂ້ອງຈາກແຂວງ ແລະ ເມືອງ, ພ້ອມດ້ວຍອົງການປົກຄອງບ້ານ ແລະ ປະຊາຊົນ ບ້ານຕົວເມືອງຊົນນະບົດສິງສຳພັນ ໃຫ້ການຕ້ອນຮັບ.

ທ່ານ ບຸນທຳ ຊາຕະກຸນ , ນາຍບ້ານ ຕາງໜ້າອຳນາດການປົກຄອງບ້ານຕົວເມືອງນ້ອຍຊົນນະບົດສິງສຳພັນ ໄດ້ລາຍງານກ່ຽວກັບ ຈຸດພິເສດ ແລະ ການປະຕິບັດວຽກງານຂອງບ້ານໃນໄລຍະຜ່ານມາວ່າ:  ບ້ານຕົວເມືອງນ້ອຍຊົນນະບົດສິງສຳພັນ ທິດຕາເວັນຕົກຕິດກັບແມ່ນ້ຳຂອງ ແລະ ອຳເພີໂຂງຈຽມ(ປະເທດໄທ). ມີເນື້ອທີ່ທັງໝົດ 3.145 ເຮັກຕາ, ມີພົນລະເມືອງທັງໝົດ 1.290 ຄົນ, ປະຊາຊົນສ່ວນຫຼາຍແມ່ນຍຶດຖືອາຊີບປູກຝັງ, ລ້ຽງສັດກວມເຖິງ 70% ແລະ ອາຊີບຄ້າຂາຍ, ຫາປາ ກວມ 30%. ມີແຫລ່ງທ່ອງທ່ຽວທາງດ້ານທຳມະຊາດ, ວັດທະນະທຳ ແລະ ປະຫວັດສາດ ເປັນຕົ້ນ: ຫີນພູຂ້ອງ, ຫີນຫົງ, ຫີນເຜົ່າ. ພິເສດ ຍັງເປັນບ່ອນຕັ້ງດ່ານປະເພນີ ລະຫວ່າງ ເມືອງຊະນະສົມບູນ ກັບ ອຳເພີໂຂງຈຽມ ປະເທດໄທ.

ໂອກາດດັ່ງກ່າວ, ທ່ານ ວິໄລວົງ ບຸດດາຄໍາ ເຈົ້າແຂວງຈຳປາສັກ ໄດ້ມີຄຳເຫັນໂອ້ລົມ, ເຊິ່ງທ່ານ ໄດ້ຍ້ອງຍໍຊົມເຊີຍ ອຳນາດການປົກຄອງ ພ້ອມດ້ວຍປະຊາຊົນ ບ້ານຕົວເມືອງນ້ອຍຊົນນະບົດສິງສຳພັນ ທີ່ໄດ້ພ້ອມກັນສຸມທຸກເຫື່ອແຮງສະຕິປັນຍາ ໃນການປົກປັກຮັກສາອະທິປະໄຕຂອງປະເທດ ກໍ່ຄືເຮັດໜ້າທີ່ປ້ອງກັນຊາດ – ປ້ອງກັນຄວາມສະຫງົບ ແລະ ສ້າງຄວາມເຂັ້ມແຂງທາງດ້ານເສດຖະກິດ ໃຫ້ທ້ອງຖິ່ນ,  ພ້ອມທັງເນັ້ນໜັກໃຫ້ພາກສ່ວນທີ່ກ່ຽວຂ້ອງ ຕ້ອງໄດ້ພ້ອມກັນສືບຕໍ່ ເພີ່ມທະວີການຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ, ການສ້າງບ້ານ-ກຸ່ມບ້ານພັດທະນາ, ສ້າງບ້ານພັດທະນາປະຊາຊົນຢູ່ດີ-ກິນດີ, ເອົາໃຈໃສ່ຊຸກຍູ້ການພັດທະນາ, ປັບປຸງພື້ນຖານໂຄງລ່າງ, ການບໍລິການທາງຜ່ານ ເຊື່ອມໂຍງ-ເຊື່ອມຈອດ ເພື່ອກະຕຸ້ນເສດຖະກິດ,  ສືບຕໍ່ການຮ່ວມມືຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ ເພື່ອພ້ອມກັນແກ້ໄຂສະພາບຕ່າງໆ ທີ່ເກີດຂຶ້ນ.

Off

Comments are closed.