06th Jun2021

ເຈົ້າແຂວງຄຳມ່ວນມອບອຸປະກອນການຜະລິດໃຫ້ບ້ານເປົ້າໝາຍຂອງໂຄງການຊົນລະປະທານນໍ້າກະຕະ

by somchan

ຫວ່າງບໍ່ດົນມານີ້, ຫ້ອງການກະສິກຳ – ປ່າໄມ້ເມືອງບົວລະພາ, ໄດ້ຈັດພິທີມອບ – ຮັບ ແນວພັນ ແລະ ອຸປະກອນການຜະລິດໃຫ້ຊາວກະສິກອນບ້ານເປົ້າໝາຍຂອງໂຄງການຊົນລະປະທານນໍ້າກະຕະທັງ 3 ບ້ານຄື: ບ້ານທ່າແຮ່, ບ້ານນາສົມບູນ ແລະ ບ້ານປ່າກ້ວຍໃຕ້ ເມືອງບົວລະພາ ແຂວງຄຳມ່ວນ, ເຄື່ອງຊ່ວຍເຫຼືອດັ່ງກ່າວປະກອນມີ 16 ລາຍການຄື: ເຄື່ອງດຳນາ, ເຄື່ອງກ່ຽວເຂົ້າ, ເຄື່ອງຄັດເມັດ, ເຄື່ອງຕັດຫຍ້າ, ເຄື່ອງປະສົມຝຸ່ນ, ເຄື່ອງຕີດິນ, ເຄື່ອງເສຍຫຍ້າ, ເຄື່ອງຟັກຫຍ້າ ອຸປະກອນເຮັດເຮືອນຮົ່ມ, ຜ້າຢ່າງເຮັດເຮືອນຮົ່ມ, ແນວພັນຫຍ້າ, ເຄື່ອງຫວ່ານແກ່ນ, ໜາມໝາກຈັບ, ສັງກະສີ, ເຫຼັກຕະປູ, ແນວພັນເຂົ້າ ໂດຍໄດ້ຮັບທຶນຊ່ວຍເຫຼືອຈາກອົງການ (AFD) ຂອງປະເທດຝຣັ່ງ

ລວມມູນຄ່າທັງໝົດ 131 ລ້ານກວ່າກີບ ໃຫ້ກຽດມອບໃນຄັ້ງນີ້ ໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໂດຍມີບັນດາການຈັດຕັ້ງບ້ານທັງ 3 ບ້ານ ຕາງໜ້າໃຫ້ກັບປະຊົນພາຍໃນບ້ານເປັນຜູ້ຮັບ, ມີບັນດາການນຳຂັ້ນແຂວງ, ຂັ້ນເມືອງ ພ້ອມດ້ວຍພະນັກງານ, ວິຊາການທີ່ກ່ຽວຂ້ອງ ເຂົ້າຮ່ວມເປັນສັກຂີພະຍານ.

ໃນໂອກາດນີ້ ທ່ານ ສີລິຄອນ ຂຸນໂນລາດ ຫົວໜ້າໂຄງການຊົນລະປະທານນໍ້າກະຕະ ໄດ້ຜ່ານບົດລາຍງານຜົນການກໍ່ສ້າງຝ່າຍນໍ້າລົ້ນ ຊົນລະປະທານ ນໍ້າກະຕະ ໃນໄລຍະຜ່ານມາຈົນເຖິງປັດຈຸບັນ ພ້ອມກັນນັ້ນ ຍັງໄດ້ຍົກໃຫ້ເຫັນ ຂໍ້ສະດວກ ແລະ ຂໍ້ຫຍຸ້ງຍາກຂອງການຈັດຕັ້ງປະຕິບັດໂຄງການ;        ພ້ອມນີ້ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ກໍໄດ້ຍ້ອງຍໍຊົມເຊີຍມາຍັງໂຄງການອົງການ (AFD) ຂອງປະເທດຝຣັ່ງ ທີ່ໄດ້ນຳເອົາອຸປະກອນການຜະລິດໃນຄັ້ງນີ້ມາມອບໃຫ້ກັບພໍ່ແມ່ປະຊາຊົນ ທັງ 3 ບ້ານ ພ້ອມກັນນັ້ນ ທ່ານຍັງໄດ້ ຮຽກຮ້ອງໃຫ້ບັນດາພາກສ່ວນທີ່ກ່ຽວຂ້ອງ ຂັ້ນແຂວງ, ຂັ້ນເມືອງ ຕ້ອງໄດ້ເຄື່ອນໄຫວຊຸກຍູ້ ແນະນຳການນຳໃຊ້ອຸປະກອນດັ່ງກ່າວ ເພື່ອເຮັດໃຫ້ນຳໃຊ້ຢ່າງຍາວນານ ແລະ ໄດ້ຮັບຜົນເປັນຢ່າງດີ ພ້ອມກັນນັ້ນທ່ານຍັງໄດ້ເນັ້ນໜັກຕື່ມ ກ່ຽວກັບວຽກງານການສະກັດກັ້ນ ແລະ ປ້ອງພະຍາດໂຄວິດ-19 ທີ່ກຳລັງແຜ່ລະບາດໃນປັດຈຸບັນນີ້ ເປັນຕົ້ນແມ່ນຕ້ອງໄດ້ມີສະຕິໃນການຮັບຂໍ້ມູນຂ່າວສານໃຫ້ຊັດເຈນໂດຍຫຼິີກລ່ຽງຂ່າວລື, ຂ່າວປອມ ທີ່ບໍ່ມີຄວາມຊັດເຈນ,  ເພື່ອເຮັດໃຫ້ບ້ານກໍຄືເມືອງໄດ້ມີຄວາມສະຫງົບ ປອດໄພ ແລະ ພາຍຫຼັງສຳເລັດພິທີ ມອບ-ຮັບ ໃນຄັ້ງນີ້ແລ້ວ ທ່ານເຈົ້າແຂວງຄຳມ່ວນ ພ້ອມດ້ວຍຄະນະການນຳຂັ້ນແຂວງ ແລະ ຂັ້ນເມືອງ ກໍຍັງໄດ້ລົງຕິດຕາມການກໍ່ສ້າງຝາຍນໍາລົ້ນຊົນລະປະທານ ນໍ້າກະຕະ ທີ່ບ້ານນາສົມບູນເມືອງບົວລະພາ ຕື່ມອີກ.

 

Off

Comments are closed.