06th Jun2021

ບໍລິສັດ ຟຸດແພນດາ ມອບເຄື່ອງຊ່ວຍເຫຼືອຕ້ານໂຄວິດ-19 ໃຫ້ໂຮງໝໍແຂວງເຊກອງ

by somchan

ເມື່ອບໍ່ດົນມານີ້, ບໍລິສັດ ເດລີເວີລີ ຮີໂລ ຟຸດແພນດາ ( Delivery Hero foodpanda ) ໄດ້ນໍາເອົາເຄື່ອງບໍລິໂພກ-ອຸປະໂພກ ມີ: ນໍ້າດື່ມຈຳນວນ 20 ແກັດ, ຜ້າອັດປາກ-ດັງ 15 ກັບ, ເຈວລ້າງມື 10 ຂວດ ແລະ ເຄື່ອງວັດແທກອຸນຫະພູມ 1 ເຄື່ອງ ລວມມູນຄ່າ 2 ລ້ານກີບ ມອບໃຫ້ໂຮງໝໍແຂວງເຊກອງ ເພື່ອນໍາໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ກ່າວມອບໂດຍທ່ານ ນາງ ມະລິດາ ໄຊຍະແສງ ຕາງໜ້າບໍລິສັດ ແລະ ເປັນກຽດກ່າວຮັບໂດຍທ່ານ ເພັດສະໄໝ ເທບວົງສາ ຜູ້ອໍານວຍການໂຮງໝໍແຂວງ ພ້ອມດ້ວຍພະນັກງານວິຊາການທັງສອງຝ່າຍເຂົ້າຮ່ວມເປັນສັກຂີພະຍານ.

ໂອກາດນີ້ ທ່ານ ເພັດສະໄໝ ເທບວົງສາ ໄດ້ກ່າວສະແດງຄວາມຂອບໃຈມາຍັງ ບໍລິສັດ ເດລິເວີລີ ຮີໂລ ຟຸດແພນດາ ທີ່ປະກອບສ່ວນມອບການຊ່ວຍເຫຼືອເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ການປະກອບສ່ວນດັ່ງກ່າວ ແມ່ນສອດຄ່ອງກັບຄວາມຮຽກຮ້ອງຕ້ອງການຕົວຈິງ ແລະ ໃຫ້ຄໍາໝັ້ນສັນຍາວ່າຈະນໍາໃຊ້ອຸປະກອນທີ່ໄດ້ຮັບຈາກການຊ່ວຍເຫຼືອໃນຄັ້ງນີ້ ໃຫ້ຖືກເປົ້າໝາຍ ແລະ ເກີດປະໂຫຍດສູງສຸດ.

Off

Comments are closed.