06th Jun2021

ປກສ ບ້ານ ໂນນຫວາຍ ເມືອງໄຊເສດຖາ ຈັບຕົວຜູ້ລັກຊັບ, ເສບແລະຂາຍຢາບ້າ

by somchan

ວັນທີ 2 ມິຖຸນາ ນີ້, ເຈົ້າໜ້າທີ່ ປກສ ບ້ານ ໂນນຫວາຍ ເມືອງໄຊເສດຖາ ນະຄອນຫຼວງວຽງຈັນ ໄດ້ຈັບຕົວເປົ້າໝາຍລັກຊັບ ຢູ່ແຄ້ມໃນບ່ອນເຮັດວຽກກໍ່ສ້າງ ເຂດບ້ານໂນນຫວາຍ ສົ່ງໃຫ້ກອງຄະດີ ປກສ ເມືອງໄຊເສດຖາດຳເນີນຄະດີ.

ເຈົ້າໜ້າທີ່ ປກສ ເມືອງໄຊເສດຖາ ໃຫ້ຮູ້ວ່າ: ຜູ້ຖືກຫາ ຊື່ ທ້າວ ສົມເພັດ ອາຍຸ 31 ປີ ຢູ່ບ້ານໂນນຫວາຍ. ຜູ້ກ່ຽວສາລະພາບວ່າ ໄດ້ເສບຢາບ້າ ມາ 4-5 ປີແລ້ວ, ເສບຄັ້ງລະ 5-10 ເມັດ, ສ່ວນຢາບ້າທີ່ຊື້ມາເສບແມ່ນໄປຊື້ນໍາໄວລຸ້ນຢູ່ຮ້ານເກມບ້ານໂນນຫວາຍ ເມືອງໄຊເສດຖາ ຊື້ລາຄາເມັດລະ 5.000 ກີບ. ມາຮອດໄລຍະເດືອນ ເມສາ 2021 ຜູ້ກ່ຽວບໍ່ມີເງິນຊື້ຢາບ້າເສບ ຈຶ່ງໄດ້ເລີ່ມເຄື່ອນໄຫວລັກຊັບ ເຊິ່ງໄດ້ໄປລັກໄຟເບີ້ຕັດເຫຼັກຂອງ ທ້າວ ເພັງວິໄລ, ໂດຍຜູ້ກ່ຽວໄດ້ປີນເຂົ້າກໍາແພງເຮືອນ ແລ້ວໃຊ້ເຫຼັກງັດປະຕູປ່ອງຢ້ຽມເຂົ້າໄປເອົາ ແລະ ເອົາໄປຂາຍໃຫ້ຄົນບ້ານດຽວກັນ ໃນລາຄາ 200.000 ກີບ. ຫຼັງຈາກໄດ້ເງິນແລ້ວ ກໍໄປຊື້ຢາບ້າຢູ່ຮ້ານເກມບ້ານໂນນຫວາຍ ຊື້ຈຳນວນ 50 ເມັດ ໃນລາຄາເມັດລະ 3.000 ກີບ. ຫຼັງຈາກຊື້ຢາບ້າ ກໍເອົາມາເສບ ແລະ ຂາຍໃຫ້ກໍາມະກອນກໍ່ສ້າງ ຢູ່ໃນບ້ານດຽວກັນ ຂາຍເມັດລະ 5.000 ກີບ, ມາ ຮອດວັນທີ 27 ເມສາ 2021 ເວລາປະມານ 3:00 ໂມງ ກໍໄດ້ເຂົ້າໄປລັກເອົາໂທລະສັບຂອງນາງ ສົມ ບ້ານໂນນຫວາຍ ຈໍານວນ 2 ເຄື່ອງ ແລ້ວໄດ້ເອົາໂທລະສັບໄປຈໍານໍາ ກັບຄົນບ້ານເມືອງນ້ອຍ ເມືອງໄຊເສດຖາ ທີ່ເປັນຫົວໜ້າຮັບເໝົາກໍ່ສ້າງຢູ່ບ້ານໂນນຫວາຍ ຈຳນວນ 200.000 ກີບ ຫຼັງຈາກໄດ້ເງິນ ກໍໄປຊື້ຢາບ້າ ຈຳນວນ50ເມັດ ໃນລາຄາ 150.000 ກີບ, ເມື່ອຊື້ຢາບ້າໄດ້ແລ້ວ ກໍເອົາກັບມາເສບຢູ່ເຮືອນ ແລະ ຂາຍໃຫ້ກໍາມະກອນກໍ່ສ້າງຢູ່ພາຍໃນບ້ານ ຂາຍເມັດລະ 5.000 ກີບ.

ມາຮອດວັນທີ 2 ມິຖຸນາ, ໄດ້ຍ່າງໄປຊື້ຢາບ້າ ຈໍານວນ 50 ເມັດ ຊື້ລາຄາ 150.000 ກີບ ແລ້ວເອົາ ມາເສບຢູ່ເຮືອນ 5 ເມັດ, ສ່ວນຢາບ້າທີ່ເຫຼືອ ແມ່ນຂາຍໃຫ້ກຳມະກອນຈົນໝົດ, ມາຮອດເວລາປະ ມານ 17:00 ໂມງ ກໍຍ່າງໄປຊື້ຢາບ້າ ອີກ 50 ເມັດ ແລະ ໄດ້ເອົາໄປຂາຍ ຈໍານວນ 10 ເມັດ, ພໍຮອດເວລາປະມານ 21:00 ໂມງ ກໍຖືກ ເຈົ້າໜ້າທີ່ ປກສ ບ້ານໂນນຫວາຍ ຈັບຕົວສົ່ງໃຫ້ກອງຄະດີ ເມືອງໄຊເສດຖາ ດຳເນີນຄະດີຕາມກົດໝາຍ.

Off

Comments are closed.