06th Jun2021

ແຮງງານນອກລະບົບ ແລະ ຜູ້ທຸກຍາກ ອຸ່ນໃຈໄດ້ ລັດພວມເລັ່ງຊ່ວຍເຫລືອ

by somchan

ການແພ່ລະບາດພະຍາດໂຄວິດ-19 ຮອບສອງ ປີນີ້, ໄດ້ສົ່ງຜົນກະທົບຕໍ່ແຮງງານ ແລະ ຫົວໜ່ວຍທຸລະກິດຢ່າງໜັກ ເຮັດໃຫ້ມີແຮງງານຖືກໂຈະວຽກເຖິງ 50.000 ກວ່າຄົນ ສະເພາະຢູ່ນະຄອນຫລວງວຽງຈັນ ມີຫົວໜ່ວຍແຮງງານຈໍານວນໜຶ່ງໄດ້ຢຸດກິດຈະການ ເຊັ່ນ:ໂຮງງານຕັດຫຍິບ 11 ແຫ່ງ, ໂຮງງານຜະລິດເຫລັກ 2 ແຫ່ງ ແລະ ມີແຮງງານ 10.000 ຄົນຖືກໂຈະວຽກ. ແນ່ນອນເມື່ອ ບໍ່ໄດ້ເຮັດວຽກ ລາຍຮັບກໍ່ບໍ່ມີ ຈຶ່ງສົ່ງຜົນກະທົບຢ່າງໜັກຕໍ່ການດໍາລົງຊີວິດຂອງເຂົາເຈົ້າ. ສໍາລັບແຮງງານ ທີ່ຢູ່ລະບົບປະກັນສັງຄົມ ຫລື ເປັນສະມາຊິກປະກັນສັງຄົມແມ່ນໄດ້ຮັບການຊ່ວຍເຫລືອ ຕາມລະບຽບການຂອງກະຊວງແຮງງານ ແລະ ສະຫວັດດີການສັງຄົມ. ແຕ່ສິ່ງທີ່ໜ້າເປັນຫວງແມ່ນແຮງງານນອກລະບົບທີ່ມີເກືອບ 2 ພັນຄົນ ຈະໄດ້ຮັບການຊ່ວຍແນວໃດ.

ຕໍ່ກັບບັນຫານີ້, ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ມາຮອດປັດຈຸບັນ, ຂະແໜງການທີ່ກ່ຽວຂ້ອງພາຍໃຕ້ການນຳພາ-ຊີ້ນຳ ຂອງກະຊວງແຮງງານ ແລະ ສະຫວັດດີການສັງຄົມ ໄດ້ລົງເກັບກຳຈຳນວນຕົວເລກ ແຮງງານນອກລະບົບປະກັນສັງຄົມ ແລະ ປະຊາຊົນທຸກຍາກທີ່ໄດ້ຮັບຜົນກະທົບ ແລະ ມີຄວາມເດືອດ ຮ້ອນຂາດເຂີນປັດໄຈ ໃນການດໍາລົງຊີວິດປະຈໍາວັນ ເນື່ອງຈາກການລະບາດຂອງເຊື້ອພະຍາດໂຄວິດ-19 ໃນຮອບ   ໃໝ່ນີ້ ໂດຍສັງລວມປະຊາຊົນທີ່ທຸກຍາກໄດ້ຮັບຜົນກະທົບ ມີ 84.000 ກວ່າຄົນ ແລະ ແຮງງານນອກລະບົບປະກັນສັງຄົມ ຫລາຍກວ່າ 1.700 ຄົນ ແລະ ພວມກໍາລັງລວບລວມຂໍ້ມູນໃຫ້ສຳເລັດໂດຍໄວ ເພື່ອຫາທາງແກ້ໄຂ ແລະ ຊ່ວຍເຫລືອຮີບດ່ວນ. ສຳລັບເປົ້າໝາຍທີ່ຈະໃຫ້ການຊ່ວຍເຫລືອຮີບດ່ວນ ໃນທົ່ວປະເທດ ແມ່ນ ກຸ່ມຄົນທີ່ຖືກຢຸດວຽກ ບໍ່ໄດ້ຮັບເງິນເດືອນ/ຖືກເລີກຈ້າງ ມີຄວາມເດືອດຮ້ອນ, ຂາດເຂີນ, ບໍ່ມີອັນຢູ່ອັນກິນ, ຂາດທີ່ເພິ່ງພາອາໄສ ໃນໄລຍະປະຕິບັດເຂັ້ມງວດມາດຕະການຂອງລັດຖະບານນີ້, ໂດຍໄດ້ຮັບການຢັ້ງຢືນຈາກບ້ານ, ເປັນຄົນລາວ ທີ່ມີສໍາມະໂນຄົວ ຫລື ໃບອະນຸຍາດພັກເຊົາຢູ່ບ້ານ ໃນເວລາເກັບກໍາຂໍ້ມູນ, ເປັນຄອບຄົວທີ່ບໍ່ແມ່ນພະນັກງານ-ລັດຖະກອນ, ທະຫານ, ຕໍາຫລວດ, ພະນັກງານບໍານານ ແລະ ຜູ້ທີ່ໄດ້ເຂົ້າລະບົບປະກັນສັງຄົມ ໂດຍສະເພາະແມ່ນ ພະນັກງານ/ລູກຈ້າງ ຂອງບັນດາຜູ້ປະກອບການ ທີ່ໄດ້ຖືກສັ່ງປິດກິດຈະການຊົ່ວຄາວເພື່ອປ້ອງກັນການລະບາດຂອງໂຄວິດ-19 (ສະຖານບັນເທິງ, ຮ້ານນວດ, ສູນອອກກໍາລັງກາຍ, ຮ້ານເສີມສວຍ, ຮ້ານຕັດຜົມແລະ  ອື່ນໆ); ຜູ້ທີ່ຮັບຈ້າງ/ອອກແຮງານລາຍວັນ ແຕ່ໄລຍະນີ້ບໍ່ມີວຽກເຮັດງານທໍາ, ຜູ້ທີ່ຢູ່ຫ້ອງເຊົ່າ, ຫໍພັກ, ຂາດທີ່ເພິ່ງພາອາໄສຢູ່ໃນບັນດາຕົວເມືອງໃຫຍ່; ນັກສຶກສາທີ່ຂາດເຂີນທຶນຮອນ ດ້ານການສຶກສາທີ່ຢູ່ຫ້ອງເຊົ່າ/ຫໍພັກ ທີ່ກໍາລັງສຶກສາຢູ່ສະຖາບັນການສຶກສາຂອງລັດ (ອາໄສການເຮັດວຽກໃນຍາມຫວ່າງ ໂດຍການຫາລາຍໄດ້ລາຍວັນເສີມ ຈາກການເປັນພະນັກງານເສີບ/ອະນາໄມຕາມພັດທະຄານ, ຮ້ານອາຫານ, ສະຖານບັນເທີງ, ອື່ນໆ) ທີ່ຖືກສັ່ງປິດກິດຈະການ ໃນໄລຍະການລະບາດຂອງພະຍາດໂຄວິດ-19.

ທັງໝົດນັ້ນ ສະແດງໃຫ້ເຫັນວ່າ ພາກລັດ ບໍ່ເຄີຍເມີນເສີຍຕໍ່ຄວາມເດືອດຮ້ອນຂອງປະຊາຊົນ ກໍຄື ບັນດາແຮງງານທີ່ໄດ້ຮັບຜົນກະທົບຈາກວິກິດພະຍາດໂຄວິດ-19 ແລະ ຂໍຊົມເຊີຍຢ່າງຈິງໃຈຕໍ່ປະຊາຊົນຄົນລາວ ກໍຄືຜູ້ທີອາໄສຢູ່ໃນຜືນແຜ່ນດິນລາວ ທີ່ມີນ້ຳຈິດນ້ຳໃຈເອື້ອເຟື້ອເພື່ອແຜ່ ຊ່ວຍເຫລືອຜູ້ທີ່ໄດ້ຮັບຜົນກະທົບ ຜູ້ທີ່ຂາດເຂີນ ທຸກຍາກ ຍ້ອນພິດໂຄວິດແບບນີ້. ຍາມຫຍຸ້ງຍາກ ຈຶ່ງຮູ້ວ່າ ເນື້ອແທ້ຄົນລາວເປັນຄົນແນວໃດ ສໍາລັບຜູ້ທີ່ບໍ່ສາມາດຊ່ວຍເຫລືອຜູ້ອື່ນໄດ້ ກໍຂໍໃຫ້ສົ່ງກໍາລັງໃຈ ສົ່ງຄວາມຫວັງດີໃຫ້ເຂົາເຈົ້າ, ຄວນຫລີກທີ່ສຸດແມ່ນການສ້າງກະແສຍົວະ ຫລື ສຽດສີວ່າຜູ້ອື່ນ,  ພາກສ່ວນອື່ນບໍ່ເຮັດຫຍັງ ບໍ່ຊ່ວຍຫຍັງໂດຍທີ່ຕົນເອງບໍ່ຮູ້ເລິກເຖິງຖອງ ເພາະຈະເປັນການສ້າງຄວາມແຕກແຍກໃນສັງຄົມ.

 

Off

Comments are closed.