11th Jun2021

ປກສ ເມືອງສີສັດຕະນາກ ແກ້ໄຂຮ້ານຊວດຈຳລັກລອບເປີດບໍລິການອິນເຕີເນັດກາເຟບໍ່ຖືກຕ້ອງ

by somchan

ເຈົ້າໜ້າທີ່ກອງບັນຊາການ ປກສ ເມືອງສີສັດຕະນາກ ນວ ສົມທົບກັບ ປກສ ກຸ່ມວັດນາກ ແລະ ອຳນາດການປົກຄອງບ້ານທ່າພະລານໄຊ ແກ້ໄຂຮ້ານຊວດຈຳທີ່ຕິດພັນກັບການຫຼີ້ນການພະນັນຕ້ອງຫ້າມດ້ວຍຮູບການເປີດອິນເຕີເນັດຄາເຟ ບໍ່ມີໃບອະນຸຍາດຈາກຫ້ອງການໄປສະນີໂທລະຄົມມະນາຄົມ ແລະ ການສື່ສານຈຳນວນ 1 ຮ້ານ, ຢູ່ເຂດບ້ານທ່າພະລານໄຊ ເມືອງສີສັດຕະນາກ ນວ ທັງເປັນການລະເມີດຕໍ່ຄຳສັ່ງເລກທີ 15/ນຍ ແລະ ແຈ້ງການເລກທີ 02/ ຈນວ ຈັດຕັ້ງປະຕິບັດຄຳສັ່ງວ່າດວ້ຍການເພີ່ມທະວີມາດຕະການປ້ອງກັນ, ຄວບຄຸມສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ 19 ແລະ ຂໍ້ຕົກລົງເລກທີ 828/ ປກສ ວ່າດ້ວຍການບໍລິການອິນເຕີເນັດເຄເຟ ແລະ ແຕະຕ້ອງຕໍ່ປະມວນກົດໝາຍອາຍາມາດຕາ 141.

ພັຕ ສີທາດ ໜູການ ຮອງຫົວໜ້າພະແນກຕຳຫຼວດ ປກສ ເມືອງສີສັດຕະນາກໃຫ້ຮູ້ວ່າ: ໃນວັນທີ 9/6/2021 ເວລາ 19:00 ໂມງ ເຈົ້າໜ້າທີ່ໄດ້ລົງກວດພົບຮ້ານຊວດຈໍາລັກລອບເປີດເຕີມເຊີເກມອອນລາຍ ແລະ ພົບເຫັນຊາວໜຸ່ມຈຳນວນ 2 ຄົນເຂົ້າໄປເຕີມເຊີເກມ ຈຶ່ງໄດ້ກວດກາພາຍໃນຮ້ານພົບເຫັນພະນັກງານຢູ່ໃນຮ້ານ 2 ຄົນພ້ອມດ້ວຍອຸປະກອນເຄື່ອງມືທີ່ຄອຍໃຫ້ບໍລິການ ຜ່ານການກວດກາຮ້ານດັ່ງກ່າວແມ່ນບໍ່ມີໃບອະນຸຍາດຈາກພາກສ່ວນທີ່ກ່ຽວຂອງ ແລະ ເຈົ້າໜ້າທີ່ເຫັນວ່າເປັນການລະເມີດຕໍ່ແຈ້ງການເລກທີ່ 15/ນຍ ແລະ ແຈ້ງການເລກທີ່02/ຈນວ; ຂໍ້ຕົກລົງເລກທີ່ 828/ປທສ ແລະ ຜິດຕໍ່ປະມວນກົດໝາຍມາດຕາ 141 ວ່າດ້ວຍການຫຼີ້ນການພະນັນທີ່ຕ້ອງຫ້າມ.

ເຈົ້າໜ້າທີ່ຈື່ງໄດ້ຢຶດອຸປະກອນມີຄອມພິວເຕີໂນດບຸກ 1 ເຄື່ອງ ແລະ ເຄື່ອງພິມ 1 ໜ່ວຍ ມາໄວ້ທີ່ກອງບັນຊາການ ປກສ ເມືອງສີສັດຕະນາກ, ເພື່ອປະສານສົມທົບກັບຫ້ອງການໄປສະນີໂທລະຄົມມະນາຄົມ ແລະ ການສື່ສານເມືອງ ໃນການນຳໃຊ້ມາດຕະການແກ້ໄຂຕາມຂັ້ນຕອນຂອງກົດໝາຍ.

Off

Comments are closed.