12th Jun2021

ລັດຖະມົນຕີກະຊວງ ອຸດສາຫະກຳ ແລະ ການຄ້າ ຕ້ອນຮັບທູດສະຫະພາບເອີຣົບ

by somchan

ທ່ານ ຄຳແພງໄຊ ສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບ ທ່ານ ນາງ ອິນາ ມາຊິວລີໂອນີເຕ (lna MARCIULIONYTE) ເອກອັກຄະລັດຖະທູດ ແຫ່ງສະຫະພາບເອີຣົບ ປະຈຳ ສປປ ລາວ ເຂົ້າຢ້ຽມຂໍ່ານັບ ເມື່ອວັນທີ 11 ມີຖຸນານີ້ ທີ່ກະຊວງດັ່ງກ່າວ, ໃນໂອກາດທີ່ ທ່ານ ຄຳແພງ ໄຊສົມແພງ ໄດ້ຮັບໜ້າທີ່ເປັນລັດຖະມົນຕີກະຊວງອຸດສາຫະກຳ ແລະ ການຄ້າຄົນໃໝ່.

ໂອກາດດັ່ງກ່າວທ່ານລັດຖະມົນຕີກະຊວງ ອຸດສາຫະກຳ ແລະ ການຄ້າ  ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທ່ານທູດແຫ່ງສະຫະພາບເອີຣົບປະຈຳລາວ ທີ່ມາສະແດງຄວາມຍິນດີຕໍ່ການໄດ້ຮັບໜ້າທີ່ເປັນລັດຖະມົນຕີກະຊວງ ອຸດສາຫະກຳ ແລະ ການຄ້າ ຄົນໃໝ່ ຊຶ່ງຈະໄດ້ສືບຕໍ່ຮັດ  ແໜ້ນສາຍພົວພັນຮ່ວມມືທີ່ດີຕໍ່ກັນລະຫວ່າງລາວ – ສະຫະພາບເອີຣົບ ທີ່ມີມາແລ້ວນັ້ນໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ, ໂອກາດດັ່ງກ່າວ ທ່ານທູດສະຫະພາບເອີຣົບ ໄດ້ນຳເອົາເອກກະສານກ່ຽວກັບການປະຕິຮູບຂອງອົງການການຄ້າໂລກມອບໃຫ້ແກ່ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມນີ້ຍັງໄດ້ສົນທະນາໂອ້ລົມວຽກງານການຮ່ວມມືກັນລະຫວ່າງລາວ-ສະຫະພາບເອີຣົບ ທີ່ຜ່ານມາ ແລະ ໃນຕໍ່ໜ້າ.

ການພົວພັນການຄ້າ ແລະ ການລົງທຶນ ລະຫວ່າງລາວ ແລະ ອີຢູ ໃນໄລຍະຜ່ານມາແມ່ນຈັດຕັ້ງປະຕິບັດຕາມສັນຍາລົງທຶນສອງຝ່າຍ ແລະ ສິດທິພິເສດທາງດ້ານການຄ້າເຊັ່ນ: EBA ທີ່ ອີຢູໄດ້ໃຫ້ແກ່ບັນດາປະເທດດ້ອຍພັດທະນາ, ອີຢູໄດ້ສະໜັບສະໜູນລາວໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ການຈັດຕັ້ງປະຕິບັດວິໃສທັດ 2025 ແລະ ວາລະການພັດທະນາ ປີ 2030, ອີຢູແມ່ນຄູ່ຮ່ວມມືທີ່ເຂັ້ມແຂງ ແລະ ເປັນຜູ້ສະໜັບສະໜູນຢ່າງຫ້າວຫັນໃນການພັດທະນາຂະແໜງການຄ້າ ແລະ ພາກເອກກະຊົນຂອງລາວມາຕັ້ງແຕ່ປີ 2004, ໄດ້ຈັດກອງປະຊຸມໜ່ວຍງານຮ່ວມມືດ້ານການຄ້າລາວ-ອີຢູ ຄັ້ງທີ 7 ໃນວັນທີ 20 ມັງກອນ 2021, ໂຄງການໃໝ່ທີ່ຈະຊ່ວຍເຫຼືອເລື່ອງສະຖິຕິຂອງລາວ under ARISE PLUS Project, ໃນໄລຍະຜ່ານມາ ສປປ ລາວກໍໄດ້ຮັບການຊ່ວຍເຫຼືອ ແລະ ໄດ້ຮັບການຮ່ວມມືຈາກສະຫະພາບເອີຣົບຫຼາຍໂຄງການ ແລະ ໄດ້ຮັບການຈັດຕັ້ງປະຕິບັດເປັນຢ່າງດີ.

Off

Comments are closed.