12th Jun2021

ແຂວງເຊກອງ ສະຫລຸບຖອດຖອນບົດຮຽນວຽກງານປ້ອງກັນໂຄວິດ-19

by somchan

ກອງປະຊຸມສະຫລຸບຖອດຖອນບົດຮຽນການເຄື່ອນໄຫວວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ຈັດຂຶ້ນໃນວັນທີ 10 ມິຖຸນາ 2021 ທີ່ພະແນກສາທາລະນະສຸກແຂວງ ໂດຍການເປັນປະທານຂອງທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ຫົວໜ້າຄະນະສະເພາະກິດຂັ້ນແຂວງ, ມີຫົວໜ້າ-ຮອງຫົວໜ້າຄະສະເພາະກິດຂັ້ນແຂວງ-ຂັ້ນເມືອງ ແລະ ວິຊາການກ່ຽວຂ້ອງເຂົ້າຮ່ວມ.

ທ່ານ ຄໍາໄຫລ ສັນຕິພູມ ຫົວໜ້າພະແນກສາທາລະນະສຸກແຂວງ, ຮອງຫົວໜ້າຄະນະສະເພາະກິດຂັ້ນແຂວງໄດ້ລາຍງານວ່າ: ພາຍຫລັງໄດ້ຮັບຄໍາສັ່ງຂອງນາຍົກລັດຖະ ມົນຕີເລກທີ 15/ນຍ ລົງວັນທີ 21 ເມສາ 2021 ແລະ ຄໍາສັ່ງຂອງເຈົ້າແຂວງ, ຄະນະສະ ເພາະກິດຂັ້ນແຂວງໄດ້ຮີບຮ້ອນຈັດຕັ້ງປະຕິບັດ ດ້ວຍການແຈ້ງປິດແຂວງ, ແຈ້ງປິດກິດຈະ ການຕ່າງໆ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ໄດ້ຢ່າງທັນການ. ພ້ອມດຽວກັນນັ້ນ ກໍໄດ້ເປັນເຈົ້າການໂຄສະນາ, ປຸກລະດົມບັນດາອົງການຈັດຕັ້ງພັກ-ລັດ, ອົງຈັດຕັ້ງສາກົນ, ປະເທດເພື່ອນມິດຍຸດທະສາດ, ບໍລິສັດຫ້າງຮ້ານ, ຫົວໜ່ວຍທຸລະກິດ ແລະ ປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງ ເປັນເຈົ້າການປະກອບສ່ວນດ້ານວັດຖຸ-ປັດໄຈ ແລະ ໃຫ້ການຮ່ວມມືປະຕິບັດມາດຕະການຕ່າງໆໃນການປ້ອງກັນ  ແລະ ຕ້ານການລະບາດຂອງພະຍາດໂຄວິດ-19, ເຊິ່ງເຮັດໃຫ້ແຂວງສາມາດສະກັດກັ້ນການລະບາດຂອງພະຍາດໂຄວິດ-19 ໄດ້ເປັນຢ່າງດີ ໂດຍນັບແຕ່ວັນທີ 21 ເມສາ-7 ມິຖຸນາ 2021 ທົ່ວແຂວງມີຜູ້ຕິດເຊື້ອສະສົມ 1 ກໍລະນີ (ເປັນຄົນຕ່າງປະທດ) ປັດຈຸບັນ ແມ່ນປິ່ນ ປົວຫາຍດີແລ້ວ. ຂະນະດຽວກັນ ກໍໄດ້ເກັບຕົວຢ່າງບຸກຄົນທີ່ເດີນທາງມາຈາກຕ່າງແຂວງ, ຕ່າງປະເທດ ແລະ ຜູ້ທີ່ມີອາການເຂົ້າກັບນິຍາມພະຍາດໂຄວິດ-19 ໄປກວດວິເຄາະຫາເຊື້ອພະຍາດໂຄວິດ-19 ທັງໝົດ 316 ຕົວຢ່າງ, ຜົນກວດແມ່ນບໍ່ພົບເຊື້ອ. ສ່ວນວຽກງານສັກວັກຊິນ ແຂວງເຊກອງ ໄດ້ຮັບການແບ່ງປັນວັກຊິນປ້ອງກັນໂຄວິດ-19 ຈາກລັດຖະບານຈໍານວນ 12 ພັນໂດສ໌, ມີເປົ້າໝາຍສັກໃຫ້ໄດ້ 6 ພັນຄົນ ໂດຍມາຮອດວັນທີ 7 ມິຖຸນາ 2021 ມີຜູ້ໄດ້ຮັບການສັກວັກຊິນເຂັມທີ I ແລ້ວຈໍານວນ 5.757 ຄົນ, ໃນນັ້ນມີ 3.558 ຄົນໄດ້ສັກເຂັມທີ II.

ໂອກາດນີ້, ທ່ານ ຄໍາສອນ ກອນເຍີ ໄດ້ມີຄໍາເຫັນຊີ້ນໍາ ແລະ ຮຽກຮ້ອງມາຍັງຄະນະສະເພາະກິດຂັ້ນແຂວງ-ເມືອງ ກໍຄື ປະຊາຊົນບັນດາເຜົ່າທຸກຊັ້ນຄົນພາຍໃນແຂວງເຊກອງ ຈົ່ງສືບຕໍ່ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ຕິດພັນກັບການອະນາໄມ 3 ສະອາດຄື: ກິນສະອາດ, ຢູ່ສະອາດ, ເຄື່ອງນຸ່ງຫົ່ມສະອາດ; ກ່ອນຈະອອກຈາກເຮືອນໃຫ້ໃສ່ຜ້າປິດປາກ-ປິດດັງ, ລ້າງມືດ້ວຍສະບູ, ນໍ້າສະອາດ ຫລື ເຈວລ້າງມືຖ້າບໍ່ຈໍາເປັນຫ້າມເດີນທາງໄປຕ່າງແຂວງ, ຕ່າງປະເທດ ໂດຍສະເພາະແມ່ນເຂດທີ່ມີການລະບາດ ແລະ ທີ່ສໍາຄັນຜູ້ທີ່ໄດ້ຮັບການສັກວັກຊິນເຂັມທີ I ແລ້ວ ຂໍເຊີນຊວນໃຫ້ໄປສັກເຂັມທີ II ຕາມສະຖານທີ່ຈຸດບໍລິການຕ່າງໆຕາມກໍານົດເວລາ. ຈາກນັ້ນ ກໍໄດ້ມອບເຄື່ອງອຸປະໂພກ-ບໍລິໂພກ ແລະ ອຸປະກອນການແພດ ໃຫ້ຫ້ອງການສາທາລະນະສຸກ 4 ເມືອງຕື່ມອີກ.

Off

Comments are closed.