14th Jun2021

ຮອງລັດຖະມົນກະຊວງປ້ອງກັນຄວາມສະຫງົບ ຊີ້ນໍາວຽກງານຢູ່ ປກສ ສະຫວັນນະເຂດ

by somchan

ວັນທີ 11 ມິຖຸນາ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງຊີ້ນໍາວຽກງານຢູ່ບັນຊາການ ປກສ ແຂວງສະຫວັນນະເຂດ ໂດຍການຕ້ອນຮັບຂອງ ພັອ ສັງທອງ ສີປະເສີດ ຮອງກອງບັນຊາການ ປກສ ແຂວງສະຫວັນນະເຂດ ພ້ອມດ້ວຍຄະນະ, ມີຄະນະພັກ-ຄະນະບັນຊາ ຫ້ອງຂ້າງເຂົ້າຮ່ວມ

ໃນໂອກາດນີ້ ທ່ານຮອງລັດຖະມົນຕີກະຊວງ ປກສ ໄດ້ຮັບຟັງການລາຍງານຈາກຄະນະພັກ-ຄະນະບັນຊາກອງບັນຊາການ ປກສ ແຂວງ ເຊີ່ງໄດ້ຍົກໃຫ້ເຫັນ ການປະຕິບັດຫນ້າທີ່ວຽກງານໃນໄລຍະຜ່ານມາ, ປະກົດການຕ່າງໆທີ່ເກີດຂື້ນໃນສັງຄົມ ເປັນຕົ້ນແມ່ນບັນຫາລັກຊັບ, ປຸ້ນຈີ້ ຊິງຊັບ, ຢາເສບຕິດ ແລະ ອຸປະຕິເຫດ, ເຊີ່ງຍັງເກີດຂຶ້ນ ຄຽງຄູ່ກັບໄລຍະການແຜ່ລະບາດຂອງພະຍາດໂຄວິດ-19 ເຊີ່ງກອງບັນຊາການ ປກສ ແຂວງສະຫວັນນະເຂດ ໄດ້ເອົາໃຈໃສ່ປະຕິບັດມາດຕະການ ແລະ ຄໍາສັ່ງຕ່າງໆ ກ່ຽວກັບການສະກັດກັ້ນ ແລະ ປ້ອງ ກັນການແຜ່ລະບາດຂອງເຊື້ອພະຍາດດັ່ງກ່າວຢ່າງບໍ່ລົດລະ ເປັນຕົ້ນແມ່ນຈັດຕັ້ງກໍາລັງວິຊາສະເພາະລົງປະຈ່າຈຸດ, ຕັ້ງດ່ານ ກວດກາ ລະຫວ່າງແຂວງຕໍ່ແຂວງ ເມືອງຕໍ່ເມືອງ ແລະ ບັນດາຊາຍແດນທີ່ຕິດກັບປະເທດເພື່ອນບ້ານ, ໄດ້ເຮັດວຽກ, ງານໂຄສະນາ ໂດຍນໍາໃຊ້ລົດຈະລາຈອນ ແລະ ລະດົມພາກສ່ວນທີ່ມີລົດເຄື່ອງຂະຫຍາຍສຽງ ເພື່ອມາເຮັດວຽກງານ ໂຄສະນາເຜີຍແຜ່ກ່ຽວກັບການປະຕິບັດມະຕິຄໍາສັ່ງ ແລະ ມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ເຊິ່ງເຫັນວ່າປະຊາຊົນໃຫ້ການຮ່ວມມືເປັນຢ່າງດີ ແຕ່ກໍ່ຍັງມີບາງກຸ່ມຄົນທີ່ສວຍໂອກາດໃນໄລຍະນີ້ກໍ່ການກະທໍາຜິດ ເປັນຕົ້ນ ປະກົດການຫຍໍ້ທໍ່ພາຍໃນກໍາລັງ ປກສ, ປະກົດການຫຍໍ້ທໍ້ໃນສັງຄົມ ບັນຫາສັງຄົມອອນໄລນ໌, ການພະນັ້ນອອນໄລນ໌, ການຟອກເງິນ, ການປຸ້ນຈີ້ຊິງຊັບທີ່ມີຄວາມຮຸນແຮງມີການນໍາໃຊ້ອາວຸດເຂົ້າໃນການກະທໍາຜິດ.

ໂອກາດນີ້ ທ່ານ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ເນັ້ນຫນັກໃຫ້ຄະນະພັກ-ຄະນະບັນຊາກອງບັນຊາການ ປກສ ແຂວງສະຫວັນນະເຂດ ເປັນເຈົ້າການເອົາໃຈໃສ່ນໍາພາ ໂດຍສະເພາະການປະຕິບັດມາດຕະການ ແລະ ຄໍາສັ່ງຂອງຂັ້ນ ເທິງ ກໍ່ຄືແຂວງ ວາງອອກ ໃນການສະກັດກັ້ນປ້ອງກັນການແຜ່ລະບາດຂອງພະຍາດໂຄສິດ-19, ເອົາໃຈໃສ່ໂຄສະນາ, ຈັດ ຕັ້ງກໍາລັງກວດກາຄຸ້ມຄອງ ການເຂົ້າ-ອອກ ຕາມຊາຍແດນ, ແຂວງຕໍ່ແຂວງ ເມືອງຕໍ່ເມືອງ ລົງໄປຮອດບ້ານ, ໃຫ້ມີຄວາມ ອົດທົນ ເພີ່ມທະວີຄວາມສາມັກຄີ, ໂດຍສະເພາະຄະນະພັກ-ຄະນະບັນຊາ ພົບບັນຫາຫຍຸ້ງຍາກສັບສົນກໍ່ບໍ່ໃຫ້ທໍ່ຖອຍລົດ ລະ, ໃຫ້ປຸກລະດົມຈິດໃຈອ້າຍນ້ອງ ໃນຄະນະທີ່ບ້ານເມືອງຫຍຸ້ງຍາກສັບສົນຫຼາຍດ້ານ ຕ້ອງໄດ້ບືນຕົວຮັບເອົາບັນຫາມາ ແກ້ໄຂ, ເອົາໃຈໃສ່ສຶກສາອົບຮົມການເມືອງ ກໍາລັງ ປກສ ທຸກສະຫາຍ ໃນຊ່ວງໄລຍະຫຍຸ້ງຍາກໃຫ້ມີຄວາມອົດທົນ, ອຸ່ນອ່ຽນຖຸ່ນທ່ຽງ ໃຫ້ມີຄວາມເປັນແບບຢ່າງ ຈາກ ປກສ ລົງສູ່ປະຊາຊົນ, ຄະນະພັກຄະນະບັນຊາແຕ່ລະຫ້ອງ ໃຫ້ເອົາໃຈໃສ່ຊີ້ ນໍາ-ນໍາພາ ກໍາລັງວິຊາສະເພາະຢ່າງໄກ້ຊິດຕິດແທດ, ໃຫ້ເກັບກໍາບັນຊີຂໍ້ມູນຂອງແຮງງານລາວທີ່ມາຈາກປະເທດເພື່ອນບ້ານ ຢ່າງລະອຽດ, ຖອດຖອນບົດຮຽນການແກ້ໄຂຄະດີຕ່າງໆ ໂດຍສະເພາະ ຄະດີຢາເສບຕິດ ແລະ ການພະນັ້ນອອນໄລນ໌. ເປັນແບບຢ່າງປຸກລະດົມກໍາລັງ ປກສ ແລະ ປະຊາຊົນ ໄປຮັບການສັກວັກແຊງກັນພະຍາດໂຄວິດ-19 ໃຫ້ທົ່ວສັງຄົມ.

 

 

 

Off

Comments are closed.