22nd Oct2013

ການນຳພັກ-ລັດ ແລະ ປະຊາຊົນຮ່ວມກັນ ໄຫວ້ອາໄລເຖິງດວງວິນຍານຂອງຜູ້ຖືກເຄາະ ຮ້າຍເຮືອບິນຕົກທີ່ເມືອງປາກເຊ

by somchan

ໃນເວລາ 14:15 ໂມງຂອງວັນທີ 21 ຕຸລາ 2013  ການນຳພັກ -ລັດ,ສຳນັກງານ-ອົງການແລະປະຊາ ຊົນລາວທົ່ວປະເທດໄດ້ຮ່ວມກັນໄຫວ້ອາໄລເຖິງ ດວງວິນຍານຂອງຜູ້ຖືກເຄາະຮ້າຍອຸບັດຕິເຫດ ເຮືອບິນ ATR 72-600 ຖ້ຽວບິນ QV 301ຂອງ ສາຍການບິນລາວທີ່ບັນຈຸຜູ້ ໂດຍ ສານ ຈໍານວນ 44 ຄົນ ແລະ ຈຸບິນອີກ 05 ຄົນ ຕົກລົງກາງແມ່ນ້ຳຂອງກ່ອນຈະເຖິງສະໜາມບິນປາກເຊ ແຂວງຈຳປາສັກ ໃນເວລາ 16:00 ໂມງຂອງວັນທີ 16 ຕຸລາ 2013 ທີ່ຜ່ານມາ,ໂດຍການນຳພາຂອງທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ,ມີບັນດາລັດຖະມົນຕີວ່າການ,ຊ່ວຍວ່າການ ແລະ ອົງການຕ່າງໆທັງພາກລັດ ແລະ ເອກະຊົນໃນທົ່ວປະເທດເຂົ້າຮ່ວມໄຫວ້ອາໄລຢ່າງເສົ້າສະຫຼົດໃຈ.ນອກຈາກນັ້ນໃນເວລາດຽວກັນ ກະຊວງ ປກສ ນຳໂດຍທ່ານ ພົຈວ ສົມແກ້ວ ສີລາວົງ ລັດຖະມົນຕີຊ່ວຍວ່າການກະຊວງ ປກສ ກໍ່ຮ່ວມກັນໄຫວ້ອາໄລຢູ່ທີ່ກະຊວງ ປກສ ເຊັ່ນດຽວກັນ.

ສຳລັບການຈັດຕັ້ງຊອກຄົ້ນ,ກູ້ຊາກສົບຜູ້ຖືກເຄາະຮ້າຍໃນເຫດການເຮືອບິນຕົກໃນຄັ້ງນີ້ ທ່ານ ແສງປະເສີດ ມະທຸຈັນ ຮອງຜູ້ອຳນວຍການລັດວິສະຫະກິດການບິນລາວ ກະຊວງໂຍທາທິການ ແລະ ຂົນສົ່ງ ໄດ້ອອກແຈ້ງການສະບັບເລກທີ 053/ກບລ ລົງວັນທີ 21 ຕຸລາ 2013 ໃຫ້ບັນດາທ່ານໄດ້ຮັບຊາບກ່ຽວກັບຄວາມຄືບໜ້າໃນການຄົ້ນຫາຜູ້ປະສົບເຄາະຮ້າຍຈາກອຸບັດຕິເຫດ ເຮືອບິນ ATR 72-600 ຖ້ຽວບິນ QV 301 ຈົນເຖິງວັນທີ 21 ຕຸລາ 2013 ນີ້,ຄະນະກູ້ໄພທັງໝົດສາມາດຄົ້ນພົບຜູ້ປະສົບເຄາະຮ້າຍໄດ້ຕື່ມອີກ ລວມທັງໝົດເປັນ 43 ສົບ ທາງເຈົ້າໜ້າທີ່ທີ່ກ່ຽວຂ້ອງລາວປະສານສົມທົບກັບເຈົ້າໜ້າທີ່ ແລະ ໜ່ວຍສັນລະສູດສົບຈາກຣາຊະອານາຈັກໄທຍັງສືບຕໍ່ຄົ້ນຫາ ແລະ ພິສູດເອກະລັກຂອງບຸກຄົນເພື່ອນຳຜູ້ປະສົບເຄາະຮ້າຍຄືນໃຫ້ຄອບຄົວ ແລະ ຍາດພີ່ນ້ອງ.

ໃນການປະຕິບັດຄົ້ນຫາຊາກສົບຜູ້ຖືກເຄາະຮ້າຍຈາກເຫດຍົນຕົກທີ່ປາກເຊນັ້ນ, ລາຍງານຫຼ້າສຸດໃຫ້ຮູ້ວ່າ ນັກວິຊາການຈາກປະເທດຝຣັ່ງຕົວແທນຈາກບໍລິສັດຜູ້ຜະລິດຍົນລຳດັ່ງກ່າວໄດ້ເປີດເຜີຍວ່າ:ປະຈຸບັນໄດ້ຄົ້ນພົບຕຳແໜ່ງທີ່ຢູ່ຂອງ “ກ່ອງດຳ” ແລ້ວແຕ່ຍັງບໍ່ສາມາດນໍາຂື້ນມາໄດ້ໃນຕອນນີ້ ເນື່ອງຈາກກະແສນ້ຳທີ່ໄຫຼແຮງເຮັດໃຫ້ເປັນອຸປະສັກກີດຂວາງການເຮັດວຽກຂອງເຈົ້າໜ້າທີ່.

Off

Comments are closed.