16th Jun2021

ຄະນະກໍາມະການຕ້ານການຄ້າມະນຸດ ນະຄອນຫຼວງວຽງຈັນ ສຸມໃສ່ 5 ວຽກ ໃຫ້ປະກົດຜົນເປັນຈິງ ໃນປີ 2021 ນີ້

by somchan

ໃນວັນທີ 14 ມີຖຸນາ 2021 ທີ່ສໍານັກງານປົກຄອງນະຄອນຫຼວງວຽງຈັນ ໄດ້ຈັດກອງປະຊຸມ ສະຫຼຸບວຽກງານຕ້ານການຄ້າມະນຸດ ຢູ່ນະຄອນຫຼວງວຽງຈັນ ປີ 2020 ແລະ ວາງຄາດຫມາຍສູ້ຊົນຈັດຕັ້ງປະຕິບັດໃນປີ 2020 ໂດຍການເປັນປະທານຂອງທ່ານ ພູວົງ ວົງຄໍາຊາວ ຮອງເຈົ້າຄອງ ປະທານ ຄະນະກໍາມະການຕ້ານການຄ້າມະນຸດ ນະຄອນຫຼວງວຽງຈັນ, ມີ ພັອ ສຸກພະຈັນ ບຸດດາຄໍາ ຫົວຫນ້າ ກອງບັນຊາການ ປກສ ນະຄອນຫຼວງວຽງຈັນ, ມີກອງບັນຊາການທະຫານ ນະຄອນຫຼວງວຽງຈັນ, ຄະນະປະທານຄະນະກໍາມະການຕ້ານການຄ້າມະນຸດ 9 ຕົວເມືອງ ແລະ ແຂກຖືກເຊີນເຂົ້າຮ່ວມ.

ພັທ ທອງພັນ ທິລະສັກ ຫົວຫນ້າພະແນກຕຳຫຼວດຕ້ານການຄ້າມະນຸດ ຫົວຫນ້າຫ້ອງການ ກອງເລຂາຄະນະກໍາມະການຕ້ານການຄ້າມະນຸດ ນະຄອນຫຼວງວຽງຈັນ ໄດ້ລາຍງານໃຫ້ຮູ້ວ່າ: ໃນ 5 ວຽກ ທີ່ຄະນະກໍາມະການຕ້ານການຄ້າມະນຸດ ນະຄອນຫຼວງວຽງຈັນ ຈະສຸມໃສ່ມີຄື: ວຽກງານ ນະໂຍບາຍ; ວຽກງານປ້ອງກັນສະກັດກັ້ນ ສຸມໃສ່ເກັບກໍາສະຖິຕິເປົ້າຫມາຍຄ້າມະນຸດ, ຄ້າ-ຂາຍປະເວນີ ແລະ ອາດຊະຍາກໍາອື່ນໆ ຕາມໂຮງແຮມ, ຮ້ານອົບນວດ, ຮ້ານເສີມສວຍ, ຈຸດຫຼໍ່ແຫຼມ ພື້ນທີ່ສັບສົນ ໃຫ້ລະອຽດຊັດເຈນ ໃນການຕິດຕາມ ແລະ ຄຸ້ມຄອງ, ໂຄສະນາໃຫ້ພໍ່, ແມ່ປະຊາຊົນທຸກຊັ້ນຄົນ ໃຫ້ ຮັບຮູ້ລະບຽບກົດຫມາຍ ແລະ ຜົນຮ້າຍຂອງການຄ້າມະນຸດຢ່າງທົ່ວເຖິງ; ວຽກງານດໍາເນີນຄະດີ, ບັງຄັບ ໃຊ້ກົດຫມາຍ ແລະ ແກ້ໄຂເປົ້າຫມາຍຄ້າ-ຂາຍປະເວນີ ສຸມໃສ່ດໍາເນີນຄະດີທີ່ຍັງຄົງຄ້າງໃຫ້ສໍາເລັດ ປະຕິບັດຫນ້າທີ່ຕາມຫຼັກການລວມສູນປະຊາທິປະໄຕຮັບປະກັນໄດ້ຄວາມຍຸດຕິທໍາ ເພື່ອປົກປ້ອງຜູ້ຖືກ ເຄາະຮ້າຍ ແລະ ນໍາຜູ້ກະທໍາຜິດມາລົງໂທດຕາມກົດຫມາຍ, ຂຶ້ນແຜນລົງແກ້ໄຂບັນດາເປົ້າຫມາຍ ຄ້າມະນຸດ, ຄ້າ-ຂາຍປະເວນີ ພື້ນທີ່ສັບສົນ ແລະ ຈຸດຫຼໍ່ແຫຼມ ຕາມຄວາມອາດສາມາດຂອງຕົນ; ວຽກ ງານດ້ານການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍແມ່ນ ສຸມໃສ່ເຮັດວຽກງານຕິດຕາມກວດກາ ຄົນເຂົ້າ-ອອກດ່ານສາກົນ, ທ້ອງຖິ່ນ ແລະ ສະຖານທີ່ຕ່າງໆ, ປະສານສົມທົບຢ່າງກົມກຽວ ກັບ ພາກສ່ວນກ່ຽວຂ້ອງ ເຮັດຫນ້າທີ່ຊ່ວຍເຫຼືອຜູ້ຖືກເຄາະຮ້າຍໃຫ້ທັນເວລາ ແລະ ມີຄວາມປອດໄພ ແລະ ພ້ອມນີ້ກໍ່ສຸມໃສ່ດ້ານການພົວພັນ ແລະ ຮ່ວມມືກັບຕ່າງປະເທດໃຫ້ຖືກຕ້ອງສອດຄ່ອງຕາມລະບຽບ ຫຼັກການ.

ສໍາລັບໃນ 1 ປີຜ່ານມາ ໄດ້ດໍາເນີນຄະດີທັງຫມົດ 28 ເລື່ອງ, ໃນນີ້ ມີຄ້າມະນຸດ 2 ເລື່ອງ, ຄ້າ ປະເວນີ 7 ເລື່ອງ, ທໍາມິດສະຈານ 10 ເລື່ອງ, ຂົ່ມຂືນທໍາສໍາເລົາ 3 ເລື່ອງ, ຂົ່ມຂືນທໍາສໍາເລົາເດັກ 1. ເລື່ອງ, ເຜີຍແຜ່ສິ່ງລາມົກ 1 ເລື່ອງ, ທໍາຮ້າຍຮ່າງກາຍ 3 ເລື່ອງ, ການໃຊ້ເລ່ລ່ຽມເພື່ອມີເພດສໍາພັນ 1 ເລື່ອງ, ໄດ້ນໍາສົ່ງໄອຍະການແກ້ໄຂ 15 ເລື່ອງ, ບໍ່ເປີດການສືບສວນ-ສອບສວນ 6 ເລື່ອງ, ສົ່ງ ພາກສ່ວນທີ່ກ່ຽວຂ້ອງ 1 ເລື່ອງ ແລະ ສືບຕໍ່ດໍາເນີນຄະດີ 6 ເລື່ອງ.

ໃນໂອກາດດັ່ງກ່າວ ທ່ານ ພູວົງ ວົງຄໍາຊາວ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ ຄະນະກໍາມະການຕ້ານການຄ້າມະນຸດ ນະຄອນຫຼວງວຽງຈັນ ສາມາດຍາດມາໄດ້ໃນໄລຍະຜ່ານມາ, ພ້ອມທັງເນັ້ນໃຫ້ຄະນະຮັບຜິດຊອບ ແລະ ພາກສ່ວນທີ່ກ່ຽວຂ້ອງຕ່າງໆຢູ່ບັນດາທ້ອງຖິ່ນ ກໍຄື 9 ຕົວ ເມືອງທີ່ຂື້ນກັບ ນະຄອນຫຼວງວຽງຈັນ ໃຫ້ເອົາໃຈໃສ່ສືບຕໍ່ໃຫ້ຄວາມຊ່ວຍເຫຼືອຜູ້ທີ່ປະສົບເຄາະຮ້າຍ ເປັນຕົ້ນ: ຈາກການຄ້າປະເວນີ້, ຄ້າ-ຂາຍມະນຸດ, ທໍາຮ້າຍຮ່າງກາຍ, ຂົ່ມຂືນທໍາສໍາເລົາ ແລະ ອື່ນໆ ພ້ອມທັງເນັ້ນໃຫ້ແກ້ໄຂບັນດາຄະດີທີ່ຍັງຄົງຄ້າງ ໃຫ້ມີຄວາມລະອຽດ, ຈະແຈ້ງ ແລະ ຊັດເຈນ ເພື່ອ ຫຼີກລ່ຽງບັນດາສຽງວິພາກວິຈານຈາກສັງຄົມ ໃນການແກ້ໄຂ, ລົງເເກ້ຄະດີຕ່າງໆຂອງເຈົ້າຫນ້າທີ່.

 

 

Off

Comments are closed.