16th Jun2021

ແຂວງເຫງະອານ ສສ ຫວຽດນາມ ຊ່ວຍສ້າງສຸກສາລາຢູ່ເມືອງ ໄຊຈໍາພອນ ແຂວງບໍລິຄໍາໄຊ ມູນຄ່າ 14 ຕື້ ກວ່າດົງ

by somchan

ວັນທີ 14 ມິຖຸນາ 2021 ນີ້, ຢູ່ທີ່ດ່ານສາກົນ ນໍ້າ ພາວ-ເກົ່າແຈວ ໄດ້ມີພິທີລົງນາມບົດບັນທຶກ ມອບ-ຮັບສຸກສາລາ ຢູ່ບ້ານ ສົບເຕີງ ກຸ່ມນ້ໍາອ້ອນ ເມືອງ ໄຊຈໍາພອນ ແຂວງບໍລິຄໍາໄຊ ລະຫວ່າງ ອົງການປົກຄອງແຂວງ ບໍລິຄໍາໄຊ ສປປ ລາວ ແລະ ອົງການ ປົກຄອງ ແຂວງ ເຫງະອານ ສສ ຫວຽດນາມ ໂດຍການຮ່ວມລົງນາມລະຫວ່າງ ທ່ານ ຄໍາແຫວນ ປັນຍານຸວົງ ຮອງເຈົ້າແຂວງ ບໍລິຄໍາໄຊ ແລະ ທ່ານ ບຸ່ຍດິງລ່ອງ’ ຮອງປະທານຄະນະກໍາມະການ ປະຊາຊົນ ແຂວງເຫງະອານ ໂດຍມີພາກສ່ວນກ່ຽວຂ້ອງສອງຝ່າຍເຂົ້າຮ່ວມ.

ໂຄງການກໍ່ສ້າງອາຄານສຸກສາລາຢູ່ບ້ານສົບເຖີງ ເມືອງໄຊຈໍາພອນ ແຂວງ ບໍລິຄໍາໄຊ ໄດ້ດໍາເນີນ ການກໍ່ສ້າງມາຕັ້ງແຕ່ກາງເດືອນ ກໍລະກົດ ປີ 2017 ແລະ ສໍາເລັດການກໍ່ສ້າງໃນຕົ້ນປີ 2020 ລວມ ມູນຄ່າການກໍ່ສ້າງ 14 ຕື້ກວ່າດົງ, ເປັນອາຄານ 2 ຊັ້ນ ໂດຍໄດ້ຮັບທຶນຊ່ວຍເຫຼືອລ້າ ຈາກຄະນະພັກ, ສະພາປະຊາຊົນ, ຄະນະກໍາມະການແນວໂຮມ ແຂວງເຫງະອານ ສສ ຫວຽດນາມ ກໍ່ສ້າງໂດຍກອງ ບັນຊາການທະຫານຊາຍແດນ ປະຈໍາດ່ານ ນ້ຳອ້ອນ-ແທັງຖຸຍ. ທັງນີ້ ກໍເພື່ອເປັນການຍົກສູງດ້ານການ ບໍລິການທາງການແພດ ເພື່ອອໍານວຍຄວາມສະດວກໃນການເຂົ້າເຖິງການບໍລິການ ດ້ານສາທາລະນະ ສຸກຂອງປະຊາຊົນເຂດໃກ້ຄຽງ ໃຫ້ມີຄວາມສະດວກສະບາຍ.

ໃນໂອກາດດຽວກັນ, ທ່ານ ບຸ່ຍດິງລ່ອງ ກໍ່ໄດ້ຕາງຫນ້າໃຫ້ຄະນະພັກ, ຄະນະປົກຄອງແຂວງ ເຫງະອານ ມອບເຂົ້າສານຫນຽວຈໍານວນ 10 ໂຕນ ແລະ ເຄື່ອງມືທາງການແພດຈໍານວນຫນຶ່ງ ລວມມູນ ຄ່າ 250 ລ້ານດົງ ໃຫ້ແຂວງບໍລິຄໍາໄຊ ເພື່ອປະກອບສ່ວນນໍາໃຊ້ເຂົ້າໃນວຽກງານປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ຢູ່ພາຍໃນແຂວງບໍລິຄໍາໄຊ ຕື່ມອີກ.

ຈາກນັ້ນ, ທ່ານ ຄໍາແຫວນ ປັນຍານຸວົງ ກໍຕາງຫນ້າໃຫ້ລັດຖະບານ ແຫ່ງ ສປປ ລາວ ກໍຄື ຕາງ ຫນ້າໃຫ້ຄະນະພັກຄະນະປົກຄອງແຂວງ ມອບຫລຽນກາພັດທະນາ ຂອງລັດຖະບານ ສປປ ລາວ ແລະ ໃບກຽດຕິຄຸນຂອງແຂວງບໍລິຄໍາໄຊ ໃຫ້ຄະນະພັກຄະນະປົກແຂວງເຫງະອານ ທີ່ມີຜົນງານ ປະກອບສ່ວນສ້າງສຸກສາລາ ແລະ ມອບອຸປະກອນທາງການເເພດໃຫ້ແຂວງ ບໍລິຄໍາໄຊ ແລະ ມອບໃບ ກຽດຕິຄຸນຂອງແຂວງ ໃຫ້ກອງບັນຊາການທະຫານຊາຍແດນ ແຂວງເຫງະອານ ໃນນາມຜູ້ລົງມືຈັດຕັ້ງ ປະຕິບັດໂຄງການກໍ່ສ້າງສຸກສາລາດັ່ງກ່າວ.

 

Off

Comments are closed.