17th Jun2021

ກອງປະຊຸມເປີດກວ້າງ ຄົບຄະນະບໍລິຫານງານພັກກອງບັນຊາການ ປກສ ແຂວງໄຊສົມບູນ ປະຈຳ 06 ເດືອນຕົ້ນປີ 2021.

by somchan

ໃນວັນທີ 14 ມີຖຸນາ 2021 ນີ້ກອງບັນຊາການ ປກສ ແຂວງໄຊສົມບູນ ໄດ້ປິດກອງປະຊຸມເປີດກວ້າງຄົບຄະນະບໍລິຫານງານພັກກອງບັນຊາການ ປກສ ແຂວງ ປະຈຳ 06 ເດືອນຕົ້ນປີ 2021 ແລະ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ພາຍໃຕ້ການເປັນປະທານຂອງສະຫາຍ ພົຈວ ບົວພັນ ອິນທະປັນຍາ ກຳມະການພັກແຂວງ, ເລຂາຄະນະພັກກອງບັນຊາການ ປກສ ແຂວງໄຊສົມບູນ, ມີບັນດາຄະນະປະຈຳພັກ, ຄະນະພັກກອງບັນຊາການ, ຄະນະພັກຮາກຖານ, ໜ່ວຍພັກບັນດາຫ້ອງ, ກອງພັນ, ຄ້າຍຄຸມຂັງ-ດັດສ້າງ ແລະ ອົງການຈັດຕັ້ງມະຫາຊົນຊາວໜຸ່ມ-ແມ່ຍິງເຂົ້າຮ່ວມ.

ພັທ ວິໄລ ແກ້ວວິໄລຫົງ ຄະນະພັກກອງບັນຊາການ ປກສ ແຂວງໄດ້ຜ່ານບົດສະຫຼຸບວຽກງານພັກ-ວຽກງານການເມືອງປະຈຳ 06 ເດືອນຕົ້ນປີ ແລະ ວາງທິດທາງແຜນການ 06 ເດືອນທ້າຍປີ 2021 ຕະຫຼອດ 06 ເດືອນຜ່ານມາ ຄະນະພັກກອງບັນຊາການ ປກສ ແຂວງ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ ແລະ ສຳຄັນສອດຫ້ອຍເຂົ້າໃນທຸກຂົງເຂດວຽກງານ ດ້ວຍຫຼາຍວິທີ, ປົກກະຕິ ແລະ ຕໍ່ເນື່ອງ ເປັນຕົ້ນແມ່ນເຂົ້າຮ່ວມເຊື່ອມຊຶມມະຕິ XI ຂອງສູນກາງພັກທີ່ແຂວງຈັດຂຶ້ນ, ຈັດຕັ້ງເຜີຍແຜ່ເຊື່ອມຊຶມ ເອກະສານຕ່າງໆທີ່ສໍາຄັນຂອງພັກ-ຂອງຊາດ ແລະຈັດຕັ້ງພິທີ ປະຖະກະຖາວັນສະຖາປະນາ ສປປ ລາວ ຄົບຮອບ 45 ປີ, ຄ້າຍວັນເກີດຂອງປະທານໄກສອນ ພົມວິຫານ ຄົບຮອບ 100 ປີ ແລະ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ ທັງໄດ້ເສີມຂະຫຍາຍທາດແທ້ມູນເຊື້ອຂອງພັກ-ຂອງຊາດ ແລະ ຂອງກຳລັງ, ເຊີດຊູແນວຄິດປະຕິວັດ, ເຊື່ອໝັ້ນຕໍ່ການນຳພາຂອງພັກ, ເດັດດ່ຽວຕ້ານປະກົດການຫຍໍ້ທໍ້ໃນກຳລັງ ພ້ອມທັງຍົກສູງຄຸນນະພາບຂອງສະມາຊິກພັກໃນກຳລັງໃຫ້ສູງຂຶ້ນ. ເອົາໃຈໃສ່ນຳພາ, ກວດກາ, ປັບປຸງແບບແຜນການນໍາພາຂອງຄະນະພັກກອງບັນຊາການ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ລະບອບແບບແຜນການນຳພາດີຂຶ້ນ, ປະຕິບັດລະບອບສ່ອງແສງລາຍງານປະຈຳທິດ, ເດືອນ, ໄຕມາດ ເປັນປົກກະຕິຕໍ່ເນື່ອງ ໂດຍຖືເອົາ 05 ໜ້າທີ່, 05 ຫຼັກການ, 03 ທິດນໍາຂອງພັກເປັນເນື້ອໃນຕົ້ນຕໍ ໃນການສໍາຫຼວດກວດກາ, ຕໍ່ານິ່ສົ່ງຂ່າວເຊິ່ງກັນ ແລະ ກັນ; ດ້ານຂົງເຂດວຽກງານວິຊາສະເພາະ ກໍໄດ້ສຸມໃສ່ກຳແໜ້ນສະພາບການເຄື່ອນໄຫວຂອງກຳລັງອິດທິປໍລະປັກ ແລະ ກຸ່ມຄົນບໍ່ດີທີ່ຫວັງທຳລາຍມ້າງເພແນວທາງນະໂຍບາຍຂອງພັກ-ລັດ, ແກ້ໄຂບັນດາປະກົດການຫຍໍ້ທໍ້ໃນສັງຄົມ ກໍຄືໃນກໍາລັງປ້ອງກັນຄວາມສະຫງົບໃຫ້ໄດ້ຢ່າງຂາດຕົວ;ດ້ານຂົງເຂດວຽກງານພະລາທິການໄດ້ສຸມໃສ່ແກ້ໄຂບັນຫາຄວາມຫຍຸ້ງຍາກທາງດ້ານງົບປະມານ, ເງິນເດືອນ, ເງິນອຸດໜູນ, ເງິນບໍລິຫານ ແລະ ເຂົ້າກິນຂອງພະນັກງານໃຫ້ທ່ວງທັນກັບເວລາ; ສ່ວນດ້ານຂົງເຂດວຽກງານເສນາທິການ ໄດ້ສຸມໃສ່ຊຸກຍູ້ ແລະ ປັບປຸງວຽກງານບໍລິຫານຫ້ອງການ ສາມາດຊ່ວຍໃຫ້ຄະນະພັກ-ຄະນະກອງບັນຊາການ ປກສ ແຂວງ ຕົກລົງບັນຫາໄດ້ຢ່າງຖືກຕ້ອງ ແລະ ທັນກັບເຫດການ. ພ້ອມນັ້ນ, ຍັງໄດ້ຜ່ານບັນດາທິດທາງແຜນການເຄື່ອນໄຫວ ຂອງວຽກງານພັກ-ວຽກງານການເມືອງ ປະຈຳ 06 ເດືອນທ້າຍປີ 2021 ແລະ ບົດໂຄງການດໍາເນີນງານຂອງຄະນະພັກກອງບັນຊາການ ປກສ ແຂວງໄລຍະ 05 ປີຕໍ່ໜ້າແຕ່ປີ 2021-2025. ຈາກນັ້ນຜູ້ເຂົ້າຮ່ວມກອງປະຊຸມ ກໍໄດ້ພ້ອມກັນສຸມທຸກສະຕິປັນຍາຂອງຕົນ ເຂົ້າໃນການປະກອບຄໍາຄິດເຫັນໃສ່ບົດສະຫຼຸບຢ່າງກົງໄປກົງມາ ເພື່ອເຮັດໃຫ້ບົດສະຫຼຸບດັ່ງກ່າວມີເນື້ອໃນສົມບູນ, ຄົບຖ້ວນ ແລະ ຄວາມເປັນເອກະພາບໃນການຈັດຕັ້ງປະຕິບັດວຽກງານພັກ-ວຽກງານການເມືອງໃນຕໍ່ໜ້າໃຫ້ໄດ້ຮັບປະສິດທິພາບ, ປະສິດທິຜົນສູງສຸດ. ໃນກອງປະຊຸມ ຍັງໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ກັບ 06 ໜ່ວຍພັກທີ່ຂຶ້ນກັບຄະນະພັກກອງບັນຊາການ ໂດຍເປັນກຽດມອບຂອງ ພົຈວ ບົວພັນ ອິນທະປັນຍາ ກໍາມະການພັກແຂວງ, ເລຂາຄະນະພັກກອງບັນຊາການ ປກສ ແຂວງ.

 

Off

Comments are closed.