20th Jun2021

ລັດຖະບານ ມອບຫຼຽນກາມິດຕະພາບ ໃຫ້ຜູ້ຕາງໜ້າອົງການອະນາໄມໂລກປະຈໍາ ສປປ ລາວ

by somchan

ໃນວັນທີ 18 ມິຖຸນາ 2021 ຢູ່ທີ່ກະຊວງການຕ່າງປະເທດ ໄດ້ມີພິທີປະດັບຫຼຽນກາມິດຕະພາບ ໃຫ້ແກ່ ທ່ານ ດຣ. ມາກ ເອັນດຣິວ ຈາຄັອບ (Mark Andrew JACOBS) ຜູ້ຕາງໜ້າອົງການອະນາໄມໂລກ (WHO) ປະຈໍາ ສປປ ລາວ, ເພື່ອເປັນການຍ້ອງຍໍຊົມເຊີຍຜົນງານຂອງຜູ້ກ່ຽວ ພາຍຫຼັງສິ້ນສຸດ ການປະຕິບັດໜ້າທີ່ຢູ່ ສປປ ລາວ. ຕາງໜ້າລັດຖະບານລາວປະດັບຫຼຽນກາມິດຕະພາບໃນຄັ້ງນີ້ແມ່ນ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໂດຍມີການເຂົ້າຮ່ວມຂອງການນຳຂັ້ນສູງຈາກ ບັນດາກະຊວງຂະແໜງການກ່ຽວຂ້ອງ ແລະ ຜູ້ຕາງໜ້າຫ້ອງການຜູ້ປະສານງານ ສະຫະປະຊາຊາດ ປະຈຳ ສປປ ລາວ ເຂົ້າຮ່ວມ.

ໃນພິທີດັ່ງກ່າວ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດໃນການປະຕິບັດໜ້າທີ່ວຽກງານໃນໄລຍະຜ່ານມາຂອງ ທ່ານ ມາກ ຈາຄັອບ ທີ່ໄດ້ປະກອບສ່ວນຢ່າງຕັ້ງໜ້າໃນການຮ່ວມມື ແລະ ຊ່ວຍເຫຼືອ ສປປ ລາວ ໂດຍສະເພາະໃນການຮັບມືກັບບັນຫາການລະບາດຂອງພະຍາດໂຄວິດ-19 ທີ່ພວກເຮົາ ກໍາລັງປະເຊີນໜ້າຢູ່ໃນປັດຈຸບັນ, ໃນດ້ານການໃຫ້ຄໍາປຶກສາທາງດ້ານວິຊາການ, ມາດຕະການປ້ອງກັນການຕິດເຊື້ອ, ການປິ່ນປົວ, ການນໍາໃຊ້ວັກແຊງ ແລະ ການຂົນຂວາຍອຸປະກອນການແພດທີ່ຈຳເປັນ ແລະ ທຶນຈຳນວນໜຶ່ງ. ນອກຈາກນັ້ນ, ພາຍໃຕ້ການນໍາພາຂອງ ທ່ານ ດຣ. ມາກ ເອັນດຣິວ ຈາຄັອບ ຫ້ອງການອົງການອະນາໄມໂລກ ປະຈໍາ ສປປ ລາວ ຍັງໄດ້ໃຫ້ການຊ່ວຍເຫຼືອ ແລະ ແນະນຳໃນການສ້າງແຜນພັດທະນາຂະແໜງສາທາລະນະສຸກແຫ່ງຊາດ, ຍຸດທະສາດຂອງຂະແໜງສາທາລະນະສຸກ ແລະ ຍຸດທະສາດດ້ານການເງິນຂອງຂະແໜງສາທາລະນະສຸກ, ການຄວບຄຸມການລະບາດຂອງພະຍາດໄຂ້ຍຸງລາຍ, ໄຂ້ໝາກແດງໃຫຍ່, ການປັບປຸງສຸຂະພາບແມ່ ແລະ ເດັກ, ການສ້າງຄວາມເຂັ້ມແຂງໃຫ້ແກ່ຂະແໜງສາທາລະນະສຸກ ຕໍ່ກັບການປ່ຽນແປງດິນຟ້າອາກາດ ແລະ ໄພພິບັດ, ສ້າງຄວາມເຂັ້ມແຂງ ໃຫ້ລະບົບຂໍ້ມູນຂ່າວສານ ດ້ານສຸຂະພາບແຫ່ງຊາດ ແລະ ຄວາມສາມາດໃນການຕອບສະໜອງຂໍ້ມູນໃນລະດັບຊາດ, ແຂວງ ແລະ ທ້ອງຖິ່ນ, ແລະ ອື່ນໆ, ດັ່ງນັ້ນ, ອີງໃສ່ຜົນງານອັນພົ້ນເດັ່ນດັ່ງກ່າວ, ລັດຖະບານ ແຫ່ງ ສປປ ລາວ ຈຶ່ງໄດ້ຕົກລົງຍ້ອງຍໍປະດັບຫຼຽນກາມິດຕະພາບ ເພື່ອເປັນການຈາລຶກຜົນງານການປະກອບສ່ວນໃນການສ້າງສາພັດທະນາຢູ່ ສປປ ລາວ ຂອງຜູ້ກ່ຽວ. ພ້ອມດຽວກັນ ທ່ານ ດຣ. ມາກ ເອັນດຣິວ ຈາຄັອບ ກໍໄດ້ສະແດງຄວາມຂອບໃຈຕໍ່ການຮ່ວມມື ແລະ ສະໜັບສະໜູນຂອງລັດຖະບານລາວ ຕະຫຼອດໄລຍະການປະຕິບັດໜ້າທີ່ຂອງທ່ານ ໃນໄລຍະເວລາເກືອບ 4 ປີທີ່ຜ່ານມາ, ພ້ອມທັງຢືນຢັນຈະສືບຕໍ່ປະກອບສ່ວນຊຸກຍູ້ໃຫ້ມີການຊ່ວຍເຫຼືອ ແລະ ສະໜັບສະໜູນຮ່ວມມືຂອງ ອົງການ ອະນາໄມໂລກ ຫຼື WHO ໃຫ້ແກ່ ສປປ ລາວ ໃນຕໍ່ໜ້າ.

Off

Comments are closed.