21st Jun2021

ປະກາດການຈັດຕັ້ງຮອງຫົວໜ້າຄະນະຄຸ້ມຄອງເຂດເສດຖະກິດພິເສດແຂວງ ບໍ່ແກ້ວ

by somchan

ພິທີປະກາດແຕ່ງຕັ້ງຮອງຫົວໜ້າຄະນະຄຸ້ມຄອງເຂດເສດຖະກິດພິເສດ ໃນຕອນເຊົ້າ ວັນທີ 18 ມິຖຸນາ 2021 ນີ້ ຢູ່ທີ່ຫ້ອງປະຊຸມກອງບັນຊາການ ປກສ ເຂດເສດຖະກິດພິເສດສາມຫຼ່ຽມຄໍາ ໃຫ້ກຽດເຂົ້າຮ່ວມ ຂອງ ທ່ານ ເພັງສອນ ແກ້ວວິໄລ ຮອງເລຂາພັກແຂວງ ຜູ້ຊີ້ນໍາວຽກງານພັກ – ພະນັກງານ, ມີທ່ານນາງ ທອງຄູນ ພົນທອງສີ ຫົວໜ້າຄະນະຄຸ້ມຄອງເຂດເສດຖະກິດພິເສດແຂວງ ບໍ່ແກ້ວ, ມີຄະນະຈັດຕັ້ງ, ຄະນະກວດກາ, ພະແນກພາຍໃນແຂວງ, ຄະນະບັນຊາກອງບັນຊາການ ປກສ ເຂດ, ບັນດາຂະແໜງການອ້ອມຂ້າງເຂດເສດຖະກິດພິເສດສາມຫຼ່ຽມຄໍາ ຕະຫຼອດຮອດພະນັກງານຄະນະຄຸ້ມຄອງເຂດ ເຂົ້າຮ່ວມ.

ທ່ານ ແກ້ວລາ ນໍລະສິງ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງຂອງກະຊວງແຜນການ ແລະ ການລົງທຶນ ວ່າດ້ວຍການແຕ່ງຕັ້ງຮອງຫົວໜ້າຄະນະຄຸ້ມຄອງເຂດເສດຖະກິດພິເສດແຂວງ ບໍ່ແກ້ວ ເຊິ່ງຕົກລົງແຕ່ງຕັ້ງ ທ່ານ ຄຳສະຫວາດ ແກ້ວປັນຍາ ຫົວໜ້າຂະແໜງສັງລວມ ເປັນຮອງຫົວໜ້າຄະນະຄຸ້ມຄອງເຂດເສດຖະກິດພິເສດແຂວງ ບໍ່ແກ້ວ.

ໂອກາດນີ້ ທ່ານ ເພັງສອນ ແກ້ວວິໄລ ກໍ່ໄດ້ມີຄຳເຫັນຫຼາຍບັນຫາຕໍ່ຄະນະຄຸ້ມຄອງເຂດ, ພະນັກງານພາຍໃນຄະນະຄຸ້ມຄອງ ແລະ ຮອງຫົວໜ້າຄະນະຄຸ້ມຄອງທີ່ໄດ້ຖືກແຕ່ງຕັ້ງເພີ່ມໃນຄັ້ງນີ້ ກ່ອນອື່ນທ່ານໄດ້ສະແດງຄວາມຍ້ອງຍໍຊົມຊົມເຊີຍຕໍ່ຄະນະຄຸ້ມຄອງເຂດທີ່ໄດ້ມີຜົນສຳເລັດຫຼາຍດ້ານໃນການຄຸ້ມຄອງ ແລະ ປະສານງານກັບບັນດາຜູ້ພັດທະນາ, ນັກລົງທຶນ ແລະ ບັນດາຫົວໜ່ວຍທຸລະກິດພາຍໃນ ຂສພຄ ໃນການດຳເນີນກິດຈະການຕ່າງໆພາຍໃນເຂດ ເຮັດໃຫ້ເຂດມີການພັດທະນາຫຼາຍດ້ານ ແລະ ດຳເນີນຖືກຕ້ອງຕາມແນວທາງນະໂຍບາຍ ລະບຽບກົດໝາຍຂອງພັກ – ລັດ ແຕ່ຄຽງຄູ່ກັບຜົນສຳເລັດນັ້ນ ກໍ່ຍັງມີສິ່ງທ້າທາຍຫຼາຍດ້ານໃນການຄຸ້ມຄອງການພັດທະນາເຂດ ເຊິ່ງທາງຄະນະຄຸ້ມຄອງຈະຕ້ອງໄດ້ສືບຕໍ່ນໍາພາພະນັກງານທີ່ຢູ່ໃນຄວາມຮັບຜິດຊອບຂອງຕົນ, ສືບຕໍ່ປະສານງານກັບຂະແໜງການປິ່ນອ້ອມພາຍໃນເຂດ, ຂະແໜງການຂອງແຂວງ – ເມືອງ,

ຜູ້ພັດທະນາ, ນັກລົງທຶນ, ຫົວໜ່ວຍທຸລະກິດ ແລະ ປະຊາຊົນໃນທ້ອງຖິ່ນໃນການພັດທະນາດ້ານຕ່າງໆໃຫ້ມີຄວາມເຂົ້າໃຈເຊິ່ງກັນ ແລະ ກັນ ເພື່ອຫຼີກລ່ຽງຜົນກະທົບດ້ານຕ່າງໆທີ່ອາດຈະເກີດຂຶ້ນ ພ້ອມນັ້ນກໍ່ໃຫ້ເອົາໃຈໃສ່ດ້ານວຽກງານພັກ – ພະນັກງານ ໂດຍສະເພາະແມ່ນການສ້າງໜ່ວຍພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ເອົາໃຈໃສ່ດ້ານວຽກງານປ້ອງກັນຊາດ – ປ້ອງກັນຄວາມສະຫງົບ ໂດຍສະເພາະແທ່ນການປະສານສົມທົບກັບສອງກຳລັງຂອງເຂດໃນການປາບປາມຢາເສບຕິດ, ເພີ້ມທະວີຄວາມສາມັກຄີພາຍໃນຄະນະຄຸ້ມຄອງ ແລະ ຂະແໜງການປິ່ນອ້ອມ, ເອົາໃຈໃສ່ຄຸ້ມຄອງຄົນເຂົ້າ – ອອກເຂດໃນໄລຍະທີ່ ມີການແຜ່ລະບາດຂອງພະຍາດ ໂຄວິດ – 19.

Off

Comments are closed.