21st Jun2021

ພະແນກສະກັດກັ້ນ ແລະ ຕ້ານຢາເສບຕິດນະຄອນຫຼວງວຽງຈັນຈັບຂະບວນການຄ້າຂາຍຢາເສບຕິດໄດ້ 4 ຄົນ

by somchan

ວັນທີ 16 ມິຖຸນາ 2021 ເຈົ້າໜ້າທີພະແນກສະກັດກັ້ນ ແລະ ຕ້ານຢາເສບຕິດຫ້ອງຕຳຫຼວດ ກອງບັນຊາການ ປກສ ນະຄອນຫຼວງວຽງຈັນ ໄດ້ກັກຕົວເປົ້າໝາຍຄ້າຂາຍຢາເສບຕິດ ໄດ້ຈຳນວນ 4 ຄົນ, ພ້ອມຂອງກາງຢາບ້າ 30,610 ເມັດ, ຢາໄອສ໌ 2 ຖົງນ້ອຍ ລົດຈັກ 2 ຄັນ, ເງິນ 2,200,000 ກີບ.

ພັທ ບຸດດີ ແກ້ວມະນີວົງ ຮອງຫົວໜ້າພະແນກສະກັດກັ້ນ ແລະ ຕ້ານຢາເສບຕິດນະຄອນຫຼວງວຽງຈັນ ໃຫ້ຮູ້ວ່າ: ການຈັບກຸ່ມເປົ້າໝາຍ ໃນຄັ້ງນີ້ ແມ່ນໄດ້ຮັບລາຍງານຂໍ້ມູນຈາກພົນລະເມືອງດີວ່າ: ມີຄົນເອົາຢາບ້າມາຂາຍໃຫ້ກຸ່ມໄວໜຸ່ມເພື່ອມົ້ວສຸມຢູ່ເຮືອນພັກ ເຂດບ້ານຄໍາຮຸ່ງ ເມືອງໄຊທານີ ນະຄອນຫຼວງວຽງຈັນ  ຈຶ່ງໄດ້ແຕ່ງຕັ້ງເຈົ້າໜ້າທີ່ຕິດຕາມເຫັນວ່າມີຂໍ້ມູນຄວາມຈິງ, ຮອດເວລາ 16:00 ໂມງ ຂອງວັນທີ 16 ມິຖຸນາ 2021 ຈິງໄດ້ມ້າງກຸ່ມແກ້ງດັ່ງກ່າວ ສາມາດຈັບຕົວເປົ້າໝາຍໄດ້ 2 ຄົນຄື:  ທ້າວ ສີສົມບັດ ຫຼື ຈີ້ນ ອາຍຸ 29 ປີ, ຢູ່ບ້ານໂພນຕ້ອງຈອມມະນີ ພ້ອມຢາບ້າ 400 ເມັດ ແລະ ລົດຈັກ 1 ຄັນ,  ທ້າວ ນິດຕິສັກ ຫຼື ຫຼອງ ອາຍຸ 33 ປີ ຢູ່ບ້ານໂພນຕ້ອງຈອມມະນີ ເມືອງຈັນທະບູລີ ນະຄອນຫຼວງວຽງຈັນ ພ້ອມຢາບ້າ 10 ເມັດ. ຈາກນັ້ນ, ເຈົ້າໜ້າທີ່ຈຶ່ງໄດ້ສືບສວນ-ສອບສວນຂະຫຍາຍຜົນຊອກຫາກຸ່ມແກ້ງຮ່ວມຂະບວນການມາຮອດເວລາ 17:00 ໂມງ ຂອງວັນດຽວກັນ ຈິ່ງໄດ້ກັກຕົວ ທ້າວ ສົມໃຈ ອາຍຸ 30 ປີ ຢູ່ບ້ານໂພນສະຫວັນໃຕ້ ເມືອງສີສັດຕະນາກ ນະຄອນຫຼວງວຽງຈັນ ພ້ອມຢາບ້າ 5 ຖົງ ເທົ່າກັບ 1000 ເມັດ, ລົດຈັກສະກຸບປີ້ 1 ຄັນ, ເງິນ 2,200,000 ກີບ ແລະ ເຂົ້າເຄຫະສະຖານເຮືອນຂອງຜູ້ກ່ຽວພົບເຫັນຢາບ້າອີກ 29,200 ເມັດ. ພ້ອມນີ້ຍັງໄດ້ສືບຕໍ່ສົມທົບກັບ ກອງພັນປ້ອງກັນເຄື່ອນທີ່ ນະຄອນຫຼວງວຽງຈັນ ເຂົ້າກັກຕົວເປົ້າໝາຍຄ້າຂາຍຢາເສບຕິດ ປະເພດຢາໄອສ໌ 1 ຄົນ ຄື: ທ້າວ ແກ້ວສຸພັນ ຫຼື ກິອາຍຸ 42 ປີ ພັກເຊົາຢູ່ບ້ານຮ່ອງໄກແກ້ວ ເມືອງຈັນທະບູລີ ນະຄອນຫຼວງວຽງຈັນ ພ້ອມຢາໄອສ໌ 2 ຖົງນ້ອຍ.

ປັດຈຸບັນເຈົ້າໜ້າທີພວມດຳເນີນຄະດີຕາມລະບຽບກົດໝາຍ.

Off

Comments are closed.