23rd Jun2021

ແຂວງ ໄຊຍະບູລີ ຖອດຖອນບົດຮຽນກ່ຽວກັບການຈັດຕັ້ງປະຕິບັດແກ້ໄຂ ແລະ ຕອບໂຕ້ ໄພນໍ້າຖ້ວມ

by somchan

ໃນວັນທີ 23 ມິຖຸນາ ນີ້, ທີ່ສະໂມສອນຫ້ອງວ່າການແຂວງ ໄຊຍະບູລີ ໄດ້ຈັດກອງປະຊຸມ ສະຫຼຸບຖອດຖອນບົດຮຽນກ່ຽວກັບ ການຈັດຕັ້ງປະຕິບັດວຽກງານແກ້ໄຂຜົນກະທົບໄພນໍ້າຖ້ວມທົ່ວແຂວງ ໄຊຍະບູລີ, ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງ, ປະທານຄະນະຄຸ້ມຄອງໄພພິບັດຂັ້ນແຂວງ, ມີຄະນະຄຸ້ມຄອງໄພພິບັດຂັ້ນແຂວງ ແລະ ຂັ້ນເມືອງເຂົ້າຮ່ວມ.

ໃນກອງປະຊຸມ ທ່ານ ໜູເກນ ພັນລັກ ຮັກສາການຫົວໜ້າພະແນກ ແຮງງານ ແລະສະຫວັດດີການແຂວງໄຊຍະບູລີ ໄດ້ຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານແກ້ໄຂຜົນກະທົບໄພພິບັດນໍ້າຖ້ວມທີ່ເກີດຂຶ້ນຢູ່ແຂວງໄຊຍະບູລີ ຄັ້ງວັນທີ 14 ມິຖຸນາ 2021 ທ່ານໄດ້ກ່າວວ່າ: ນໍ້າຖ້ວມແຂວງ ໄຊຍະບູລີ ຄັ້ງນີ້ໄດ້ສ້າງຄວາມເສຍຫາຍຢ່າງໜັກໜ່ວງເປັນຕົ້ນແມ່ນ: ນໍ້າຖ້ວມເຮືອນປະຊາຊົນ, ຖ້ວມເນື້ອທີ່ການຜະລິດ, ເສັ້ນທາງຈໍານວນໜຶ່ງຖືກຕັດຂາດ, ຕາ​ຂ່າຍ​ໄຟ​ຟ້າ ແລະ ເສົາໄຟຟ້າຫັກໂຄ້ນ, ສັດລ້ຽງຖືກນໍ້າພັດໄຫຼໜີ ແລະ ລົ້ມຕາຍຈໍານວນຫຼວງຫຼາຍ, ປະຊາຊົນຂາດທີ່ຢູ່ອາໄສຈໍານວນໜຶ່ງ, ຂອບ​ເຂດ​ຂອງ​ໄພ​ພິ​ບັດ​ຄັ້ງ​ນີ້ກວມ​ເອົາ 8 ເມືອງທີ່ໄດ້ຮັບຜົນກະທົບ, ມີ 130 ບ້ານ, ມີ 4.816 ຄອບຄົວ ໃນນັ້ນ: ຢູ່ເມືອງໄຊຍະບູລີ ໄດ້ຮັບຜົນກະທົບຫຼາຍກວ່າໝູ່, ລວມ​ມູນ​ຄ່າ​ເສຍ​ຫາຍ​ທັງ​ໝົດໃນທົ່ວແຂວງ 136,57 ຕື້ກວ່າກີບ, ເຫດໄພນໍ້າຖ້ວມຄັ້ງນີ້ແມ່ນບໍ່ມີຄົນເສຍຊີວິດ, ມີແຕ່ບາດເຈັບເລັກນ້ອຍ, ການຈັດຕັ້ງປະຕິບັດ​ຊ່ວຍເຫຼືອປະຊາຊົນໃນເວລາເກີດເຫດການ ຄະນະນໍາຂອງແຂວງ, ຂອງເມືອງ ກໍ່​ຄືຄະນະກໍາມະການຄຸ້ມຄອງໄພພິບັດຂັ້ນແຂວງໄດ້ສົມທົບກັບກອງກໍາລັງປ້ອງກັນຊາດ-ປ້ອງກັນຄວາມສະຫງົບ, ພະ​ນັກ​ງານ-​ລັດ​ຖະ​ກອນ, ໜ່ວຍ​ງານ​ ກູ້​ໄພ ແລະ ຊາວໜຸ່ມຢູ່ພາຍໃນພະ​ແນກ​ການ​ອ້ອມ​ຂ້າງ​ແຂວງ, ເມືອງ ໄຊ​ຍະ​ບູ​ລີ, ທີມງານຄຸ້ມຄອງໄພພິບັດ ແລະ   ໜ່ວຍກູ້ໄພ ແຂວງຫຼວງພະບາງ ແລະ ກໍາລັງ ທະຫານເມືອງນານ, ​ຊຶ່ງໄດ້ເຄື່ອນຍ້າຍປະຊາຊົນ ຢູ່ເຂດທີ່ອັນຕະລາຍ ແລະ ວັດຖຸສິ່ງຂອງທີ່ຈໍາເປັນຈໍານວນໜຶ່ງໄປຢູ່ຈຸດປອດໄພ, ໄດ້​ນຳ​ໃຊ້ພາຫະນະປະເພດ: ກົນຈັກໜັກຈໍານວນ 7 ຄັນ, ລົດບັນທຸກ ຈໍານວນ 38 ຄັນ ແລະ ເຮືອ, ຫຼັງນໍ້າຖ້ວມແມ່ນໄດ້ຮີບຮ້ອນລົງເກັບກໍາຂໍ້ມູນຄວາມເສຍຫາຍຂອງປະຊາຊົນ, ລົງຊ່ວຍເຫຼືອໃນການອານາໄມບ້ານເຮືອນ, ສໍານັກງານອົງການຂອງລັດ, ລົງແຈກຢາຍນໍ້າກິນ-ນໍ້າໃຊ້, ເຂົ້າສານອາຫານແຫ້ງ, ເຄື່ອງນຸ່ງຮົ່ມ, ເຄື່ອງໃຊ້ເຮືອນຄົວ ແລະ ປຸກເຮືອນໃຫ້ຄອບຄົວທີ່ຖືກນໍ້າພັດໄຫຼ, ສໍາລັບການລະດົມທຶນຈາກຫຼາຍພາກສ່ວນທັງພາກລັດ ແລະ ເອກະຊົນ ພາຍໃນ ແລະ ຕ່າງແຂວງ ທີ່ເປັນວັດຖຸ ແລະ ເງິນສົດ ຮອດປະຈຸບັນລວມທັງໝົດ 1,7 ຕື້ກວ່າກີບ, ຈາກນັ້ນກອງປະຊຸມກໍ່ໄດ້ມີການປະກອບຄໍາຄິດຄໍາເຫັນ, ເຊິ່ງແຕ່ລະທ່ານທີ່ມີຄໍາເຫັນນັ້ນແມ່ນໄດ້ຍົກໃຫ້ເຫັນສະພາບຕົວຈິງໃນການຊ່ວຍເຫຼືອປະຊາຊົນໃນມື້ນໍ້າຖ້ວມ ແລະ ຫຼັງນໍ້າຖ້ວມ, ບັນຫາຫຍຸ້ງຍາກທີ່ພົບເຫັນໃນການຊ່ວຍເຫຼືອ, ພ້ອມດຽວກັນກໍ່ໄດ້ຮ່ວມກັນວາງແຜນການໃນການຟື້ນຟູ ແລະ ໃຫ້ການຊ່ວຍເຫຼືອປະຊາຊົນໃນໄລຍະຍາວ.

 

Off

Comments are closed.